1 OSSORANNA DATU 26

To ma’kampa babangan, to ma’kampa ianan na to ma’parenta

26:1-32

1Diona golonganna to ma’kampa babangan. Dio mai to Korah iamotu Meselemya, anakna Kore, dio mai bati’na Asaf.

2Iatu anakna muane Meselemya iamotu Zakharia, pa’bunga’na, ma’penduanna Yediael, ma’pentallunna Zebaja, ma’penna’pa’na Yatniel,

3ma’pelimanna Elam, ma’pennannanna Yohanan, ma’pempitunna Elyoënai.

4Iatu anakna muane Obed-Edom iamotu Semaya, pa’bunga’na’, ma’penduanna Yozabad, ma’pentallunna Yoah, ma’penna’pa’na Sakhar, ma’pellimanna Netaneel,

5ma’pennannanna Amiel, ma’pempitunna Isakhar, ma’pengkaruanna Peuletai; belanna Napamasakke Puang Matua.

6Iatu Semaya, anakna muane, undadian pia muane tu umpangului rapunna, belanna iatu tau iato mai pa’barani lalong.

7Iatu anakna Semaya iamotu Otni, Refael, Obed, Elzabad na siulu’na, to malute nasang, sia Elihu na Semakhya.

8Iamote tu mintu’ bati’na Obed-Edom; tau iato mai, tu anakna muane sia siulu’na, to malute, manarang untoe pentoeanna; mintu’i bati’na Obed-Edom annan pulona ndua.

9Na iatu anakna muane sia siulu’na Meselemya, to malute, sangpulo karuai.

10Na iatu anakna Hosa, dio mai bati’na Merari, iamotu Simri, tu pangulu – moi anna tangia pa’bunga’, apa naangka’ ambe’na dadi pangulu –,

11ma’penduanna Hilkia, ma’pentallunna Tebalya, ma’penna’pa’na Zakharia; iatu anakna muane sia siulu’na Hosa sangpulo tallui sola nasang.

12Iate golonganna to ma’kampa babangan situru’ golonganna, pada-pada siulu’na dipatage’i pentoean lan banuanNa PUANG.

13Nalotereimi tu to la ungkampai simisa’-misa’ babangan unturu’ rapunna la adinna la kakanna.

14Iatu pa’loterei diona babangan rampe matallo Selemya nakanna; iatonna loterei tau tu Zakharia, anakna muane, misa’ pa’bisara unnampui tangnga’ kinaa, babangan rampe rekkenami nakanna.

15Iatu babangan rampe sau’na Obed-Edom nakanna, na iatu mai anakna muane bilik pangnannan nakanna.

16Iatu babangan rampe matampu’ sola babangan Syalekhet, sikandappi’ batatta tumuka’, Supim sola Hosa nakanna, iatu inan pa’kampan misa’ sitingoan tu inan pa’kampan misa’nao;

17dio rampe matallo nanii annan to Lewi (kiallo-kiallo), rampe rekkena nanii a’pa’ tau kiallo-kiallo, rampe sau’na nanii a’pa’ tau kiallo-kiallo, na dio to’ bilik pangnannan da’dua tau sisonda-sonda;

18dio Tambing banua kabusungan dio rampe matampu’ a’pa’ tau dio batatta anna da’dua dio Tambing.

19Iamote tu golonganna to ma’kampa babangan dio mai bati’na Korah sia dio mai bati’na Merari.

20Iatu to Lewi, siulu’na tau iato mai, tu ungkampai ianan banuanNa Puang Matua sia ianan dipamarimbangan,

21iamotu bati’na Ladan, to Gerson, iamo pangulu rapunna Ladan, to Gerson, iamotu Yehiel.

22Iatu anakna Yehiel, iamotu Zetam na Yoël, siulu’na: umpoissan ianan banuanNa PUANG.

23Dio mai to Amram, to Yizhar, to Hebron na to Uziel,

24iamotu Sebuel, anakna Gersom, anakna Musa, arung to ma’kampa ianan.

25Iatu mintu’ sangdadian lan kasikandeanna Eliezer iamotu Rehabya, anakna muane Eliezer, na Yesaya, anakna muane Rehabya, na Yoram, anakna muane Yesaya, na Zikhri, anakna muane Yoram, na Selomit, anakna muane Zikhri.

26Iamote Selomit iate sola mintu’ siulu’na umpoissanni tu mintu’ ianan dipamarimbangan, tu napamarimbangan datu Daud sia pangulu rapu sia kamandangna sangsa’bu tau sia saratu’ tau sia kamandangna surodadu.

27Iatu pangrampa lan kasirarian napamarimbangan tau iato mai, la umpamala’bi’ banuanNa PUANG.

28Dio duka mai tu mintu’ apa napamarimbangan Samuel, to patanda-tandan, Saul, anakna Kish, Abner, anakna Ner, sia Yoab, anakna Zeruya, ba’tu minda-minda duka tu umpamarimbanganni, napoissan nasang Selomit sola mintu’ siulu’na.

29Dio mai to Yizhar iamotu Kenanya sola mintu’ anakna muane dipamanassa lako mintu’ pengkarangan salianna kamenomban, anna dadi parea sia to ma’paolai salu dio to Israel.

30Dio mai to Hebron iamotu Hasabya sola sangdadianna sangsa’bu pituratu’ muane malinta’ dipamanassa umparenta to Israel dio rampe matampu’na Yordan, tu umpoissan mintu’ pentoeanNa PUANG sia kamengkaolan lako datu.

31Dio mai to Hebron iamotu Yeria, pangulunna bati’na sia rapunna to Hebron;

Iatonna taun ma’patangpulona kadatuanna Daud diparessami tu tau iato mai, anna diapparan tu ba’tu pira-pira pa’barani lalong dio Yaezer lan lili’na Gilead.

32Iatu sangdadinna, muane malinta’ nasang, duangsa’bu mpituratu’ pangulu rapu. Iatu tau iato mai naangka’ datu Daud la umparenta to Ruben, to Gad na sangsese suku Manasye diona mintu’ kamenomban lako Puang Matua sia mintu’ pengkaranganna datu.

Currently Selected:

1 OSSORANNA DATU 26: SDA

Highlight

Copy

Compare