Ikwaan̄ 28

Pọọlu mè ebi melek kan̄ me achọ Mọlita

1Mgbọ otutuuk kiji egwọkbe isi ire ijọn̄, mè inwọnọ mkpa, eji eneniriọọn̄ ibe ke ere ya eji ekupbe ìre achọ Mọlita. 2Ebi ìluk me inyọn̄ achọ ya ekakaan̄ ata ejit òmimin enenen me lek kiji, mè ibọkọ eji itap ubọk ògbegbe. Ike ibot ya okpọkpọ ikirep, mè itap eji utọọk me emen, ife cha esọsọk ukan̄ inyi eji egwele. 3Pọọlu onenikpulu bọn nkirika me ere ya ibotap me ukan̄. Mgbọ îsabe nkirika cha igbet lek ukan̄, mije uyok ukan̄ ya, ijo ulu ge onanan̄a me emen nkirika cha isibi, mè ilom Pọọlu me ubọk, mè ijeen̄ ibia ikeya. 4Mgbọ ebi ama ya emun̄be ubọk ijo ulu ya ojeen̄be Pọọlu me ubọk, ema ebebene ikitumu me etete kiban̄ ibe, “Me atikọ, ene yi ìkpolọlọ irere ogwu òkpan̄ ene. Mije, înwọnọ mkpa me okwaan̄, ire, ijo inu kan̄ oyayaka iniweek si ọmọ imun̄ me inyọn̄ ijọn̄. Awọ îtet, ìkpoluk ugwem.” 5Ire, Pọọlu osisisik ubọk kan̄, ijo ulu ya owawaka irọn̄ inin̄ emen ukan̄, ìkasak Pọọlu unan geege me lek. 6Ife cha ekekikpọ chieen̄ ibe ke Pọọlu ìkpolọlọ ifufuuk. Ire ìkafuuk, ke ìbokpọkpọ inan̄a irọn̄, mè ikwu. Ire, ema mîkpọ igak, mgbọ îjọn̄ọ me lek, kpemun̄ ubọk inu geege orọbe Pọọlu me lek. Ema enwenwene ejit, mè ibe me atikọ, ke ene yi ìre yọk ge.

7Ogwu ibot mkpulu ekigwen Pubọlọs, ogwu ebi Rom etobe ibe ikikpulu otutuuk achọ ya, îkaan̄ owuwa ijọn̄ uko me agba lek ere ya. Pubọlọs yi obọbọkọ eji itap me uwu kan̄, mè iriak eji ichen enenen. Eji eluluk me uwu kan̄ usen ita. 8Me mgbọ ya, ogwu ute me inyọn̄ mkpilaak, lek ìkanye. Ukan̄ îbak ichit lek, ikekigwook si asuk eje eje. Pọọlu onenije isi ikpọ ọmọ, mè itoon̄ ọmọ ubọk me lek, mè iriaak uriaak inyi, lek kan̄ onyenye. 9Mgbọ inu yi orọbe, otutuuk ebi lek ikanyege me inyọn̄ achọ ya enunu me lek kè Pọọlu, Pọọlu ogwagwa ema otutuuk ene. 10Ife cha mînyi eji umin me owuwa oniin̄ òkup esese esese me mgbọ eji egọọkbe ema ikup. Mgbọ eji ebenan̄a me achọ ya, ema etatap inorie mè owuwa inu geelek eji mêweekbe me okwaan̄ ijot uji inyi eji.

Pọọlu mè ebi melek kan̄ mîre Rom

11Mgbọ eji ekupbe me ere ya iso onyan̄ ita, eji enenigọọk inin̄ uji ebi Alikisendira ge ekigwen “Awaji M̀gban Iba,” mè ikọp inan̄a isi Rom. Uji ya ìkup me achọ ya otutuuk mgbọ utọọk ya. Esa uji ya igwen yọk iba ekigwen Kasitọ mè Polọkis echi ekọbe isi kiban̄ me otu uji ya. 12Eji enenikọp isi itoon̄ me ama Sirakọs, mè ikup me ere ya egwe ita, 13mè ininan̄a me ere ya ikọp isi itoon̄ me ama Regiọm. Ofit iwele kan̄, eji esasan̄a uji me ere ya, efet awaji obeben eji ikọp mege egwe ofifit, mè iwele, sabum eji enire ama Putioli. 14Eji enenimun̄ owuwa bọn Nte me ama ya. Ema enenibeek ibe eji egọọk ema ekup nde ge. Eji egọgọọk ema ikup, mè inije ifo Rom. Ikeya ke ije osa iben eji itutobo inire Rom. 15Bọn Nte ìkup me Rom mînọ ibe ke eji mêkinu. Eya orọ, ema enanan̄a ije inigwook me ama ekigwen “Ewe Apiọs” mè eyi ekigwen “Uwu Iwọ-ifi Ita” inikup ikpọ eji. Mgbọ Pọọlu omun̄be ebirieen̄ chi, itọtọn̄ Awaji, mè ikaan̄ ukarajit.

Pọọlu îtumu ikọ Awaji me Rom

16Mgbọ eji erebe Rom, etetele inyi Pọọlu iluk me lek kan̄, mè ito ogwu akọn̄ ge ibe ikibem ọmọ. 17Usen ita iraraka, Pọọlu ogwegwen otutuuk ebi ibot ebi Ju ititiin̄. Mgbọ ema etitiin̄be, Pọọlu onenitumu inyi ema ibe, “Ebi ngwan̄ n̄a, me atikọ, kpunu ijo inu geege nrọbe ebi kiji, kpunu si orọmijọn̄ ebi nte nte kiji geege eyi mfiatbe. Ire, ebi kiji etetet emi me Jeruselem kubọk ogwu mkpọn, mè ikana emi itap me ubọk ebi Rom. 18Ebi ibot mkpulu ebi Rom eneniwọlọ emen ikọ ya ikpọ, mè imun̄ ibe ke kpunu ikan geege nrọn̄be eyi ògbegbe mkpa, mè iweek itetele emi inyi ǹje m̀fo. 19Ire, ebi Ju ejijit otu oyerebet ya. Mije keya ke mbe esa oyerebet n̄a enu me isi ogwu Sisa. Ìkakaan̄ ikan geege ngwenbe ikeme ebi kiji. 20Îre mije keyi ke mweek imumun̄ enyi, mè itumu ikọ yi melek kinyi. Ìkare mije ofifi inu ke etap emi mkpọn yi. Îre mije ikpọchieen̄ eyi otutuuk ebi Ijeren ekaan̄be ke etap emi mkpọn.”

21Ife cha efọfọọk Pọọlu ibe, “Eji kpebọkọ-nu ikpa ulook geege ofolek kwun̄ inan̄a me Judia. Kpunu si ebi ngwan̄ kiji geege ìsasa etip inan̄a me ere ya inilook eji ofolek kwun̄, kpetutumu si ijo ikọ geege ibak owu. 22Mgbọ keyi eji ekiweek inọnọ inu owu okeekbe ofolek ebi otu ogbo yi eyi ekigwen Oniin̄ Okaan̄-ene, mije, ebi ene me ere geelek mêkitumu ikọ ikeme ebi otu ogbo yi.”

23Ema melek kè Pọọlu enenitumu ifieek me lek ofifi usen ema ebeyaka inititiin̄. Mgbọ usen ya orebe, ema enunu me uwu ere Pọọlu olukbe. Otu ifuk ebi ìnunu me usen ya îwa igak ebi ìnunu me adasi usen. Pọọlu onenibene me ewelegwe ya ilook ema etip ofolek mkpulu eyi Awaji mege ifit egwe usen ya, mè ikisa inu egebe me emen Ikan kè Mosis mè emen ikpa ebi nriran ikiweek inwenwene ebi ife cha ejit ofolek ogwu Jisọs orebe. 24Usini ebi ife cha enwenwene ejit bak me lek ikọ Pọọlu otumube. Ire, usini kiban̄ kpechieek. 25Wọlọwọlọ oninin̄ me etete kiban̄, ema echeche lek, mè ibene ikije ifon mgbọ Pọọlu otumube òta ikọ kan̄ inyi ema. Òta ikọ ya ìre eyi Pọọlu otumube inyi ema ibe, “Ikọ Ekwukwu Mbuban otumube me otu kè Asaya ogwu nriran inyi ebi nte nte kinyi ìkpọkpọ itat. Ekwukwu Mbuban ìtumu inyi Asaya ibe,

26“ ‘Je si lek ife chi, mè tumu nyi ema ibe,

Enyi mênọ, ire, enyi kpebekọt igobo itet.

Enyi mêmun̄, ire, enyi kpebekọt imọọn̄ itet.

27Mije, ejit ife chi înye enenen.

Utọn̄ kiban̄ ìkayaka ìkigwat lek ìnọ ikọ.

Ema mîtet chieen̄ kiban̄ ichit.

Mebe ìkare ikeya, kè ema esa chieen̄ kiban̄ emọọn̄ inu,

mè esa utọn̄ kiban̄ ènọ ikọ,

mè esa ejit kiban̄ egobo inu ètet,

mè ègwu ekom ènu me lek n̄a, inyi emi ǹgwa ema.’#28:27 Asaya 6:9,10

28“Eya orọ, emi ǹkiweek ibe mè enyi eriọọn̄ ibe ke Awaji îra iria unyan̄a kan̄ yi ijet ebi ekarege ebi Ju. Ebi ife chi mêgban̄ utọn̄, mè ibọkọ si unyan̄a yi itap.” [ 29Ikọ keyi itata Pọọlu me otu, ebi Ju cha ebebene ikiwut ifan̄a me etete kiban̄, mè inan̄a me ere ya isibi.] 30Pọọlu îluk me Rom ototuuk acha iba me uwu eyi ubọk kan̄, eyi îbọkọbe, mè ikikpe ikpoko me lek. Ebi ene ekekinu inikpọ ọmọ, ọmọ okekibọkọ ema itap ijaan̄ lek. 31Pọọlu okukup me Rom ya, mè ikilook ata etip eyi mkpulu eyi Awaji, mè itet lek inye ikijeen̄ ene geelek inu ofolek Okaan̄-ene Jisọs Karais, ìkatet ukpook. Kpunu ene geege òyayaka ikput ọmọ.

Currently Selected:

Ikwaan̄ 28: Obolo

Highlight

Copy