Ikwaan̄ 23

1Pọọlu ogwugwuun̄ chieen̄ ikpọ ebi Oru ya siì, mè inibe ema, “Ebi ngwan̄ n̄a, ejit n̄a ìkafieek emi ikọ geege, mije, nluk ugwem n̄a me isi Awaji ubọk îgbebe mege inire cherekeyi.” 2Mije usem ya, Ananayas ogwu òban Awaji onyinyi ida ibe ebi ìkekeke iriaak me lek kè Pọọlu esulu Pọọlu ada me lek otu. 3Pọọlu otutumu inyi ọmọ ibe, “Awaji môsulu owu ada si, owu agba uwu keyi esabe ndun̄ iken! Ìre owu òsiki ìkweek me ere keya ibosibi emi oyerebet me ibot igọọk me lek Ikan kè Mosis, mè idasi inyi ida ibe esulu emi ada me lek otu? Ìre ìkare Ikan ire eya owu orọn̄be?”

4Ife cha ìkekeke iriaak ọmọ egagana inyi ọmọ ibe, “Ìre ikeya ke okinye chieen̄ inyi ogwu òban Awaji òkifaka mfaka inyi Awaji?”

5Pọọlu ofọfọọk ibe, “Chei, ebi ngwan̄ n̄a, ìkpukpa, ke ǹkariọọn̄ ibe ke ene yi ìre ogwu òban Awaji, mije ege me Ikpa Mbuban ibe, ‘Katumu ijo ikọ ìbak ogwu òkikpulu ebi kinyi.’#23:5 Isis 22:28 ”

6Mije Pọọlu oriọọn̄be ibe ke usini me lek ebi Oru ya ìre ebi Farisi, sà usini ere ebi Sadusi, itataan̄ ukpo itumu inyi ema ibe, “Ebi ngwan̄ n̄a, emi ìre ogwu Farisi. Nte n̄a me lek kan̄ si ìre ogwu Farisi. Mgbọ keyi, ekisibi emi oyerebet me ibot, mije nkaan̄be ikpọchieen̄ ibe ke ebi ìkwakwaan̄ mêjomo me mkpa.” 7Ikọ ya itata Pọọlu me otu, ebi Farisi mè ebi Sadusi ebebene ikibaak ibaak. Uwu Oru ya ocheche irek iba. 8(Mije ebi Sadusi kpechieek ibe ke ebi ìkwakwaan̄ mêjomo me mkpa, kpechieek si ibe ke ebi osat mè ebi erumun̄ òwa. Ire, ebi Farisi mîchieek ibe ke otutuuk cha òwa.)

9Okput ibaak ya onyenye enenen. Usini me lek ebi ìjeen̄ Ikan ìrere ebi Farisi enanan̄a ikeke, mè ikigbini ikọ ya atalek unye unye, mè ikibe, “Eji kpemun̄ ijo inu geege ogwu enerieen̄ yi orọbe. Ekene oriọọn̄, môkọt ire erumun̄, mè ìre ogwu osat ge onitumu ikọ inyi!” 10Ubọk ifan̄a ya onyebe enenen, mè ikup afa afa, ogwu ibot akọn̄ ya ofefieek owot ibe ke agan̄ iba cha mêkọt itaba Pọọlu igwak. Inyinyi ebi akọn̄ ida ibe enin̄ etete ife cha, mè esan̄a Pọọlu esibi me etete kiban̄ me unye, mè esa esi etap me oyet egep ebi akọn̄.

11Me eririeen̄ usen ya, Okaan̄-ene onenikeke me agba lek kè Pọọlu, mè itumu inyi ibe, “Kafieek owot! Ike otumube emi isibi me Jeruselem, ikeya si, owu môtumu emi isibi me Rom.”

Mîtọt ikpakpan̄ Pọọlu

12Me ofit iwele kan̄, me ewelegwe, usini ebi Ju enwenween̄ lek ititiin̄ ikup itọt otitọt, mè igbaan̄ inyan̄a ibot ibe ke ema kpeberie inorie geege, kpebenwọ si miin̄ geege mege ire mgbọ ema mêkpan̄be Pọọlu. 13Ebi ìninin̄ oru yi mîwa iraka akọp ene ini. 14Ema esisi itumu inyi ebi ibot ngwugwa mè ebi ugane ama ibe, “Eji mînyan̄a ibot ibe ke eji kpeberie inu geege mege ire mgbọ eji mêkpan̄be Pọọlu. 15Me mgbọ keyi, enyi melek ebi Oru, ìge ikpa ge ìjet ogwu ibot akọn̄ ya, mè ìfiaan̄ ìtumu ìnyi ibe iria Pọọlu inu me isi kinyi, ke enyi ekiweek inọnọ otutuuk atikọ ofolek ikọ kan̄. Sabum Pọọlu mônije ire ere keyi, eji mêcho ọmọ ifiin̄ me oniin̄.”

16Ire, gwun̄ enerieen̄ ge òrere gwun̄ ngwan̄ kè Pọọlu enenwaan̄ onọnọ otitọt ya, mè ije inin̄ emen oyet egep ebi akọn̄ ya isi ikpa inyi Pọọlu.

17Pọọlu ogwegwen ene ge me lek ebi ibot akọn̄ me ere ya, mè itumu inyi ibe, “Sa gwun̄ enerieen̄ yi si me isi ogwu ibot otutuuk ebi akọn̄, mije, îkaan̄ inu ìbokpa inyi.”

18Ogwu ibot akọn̄ ya osasa gwun̄ enerieen̄ ya isi me isi ogwu ibot otutuuk ebi akọn̄, mè itumu inyi ibe, “Pọọlu ogwu mkpọn ya obeek ibe emi ǹsa gwun̄ enerieen̄ yi ǹnu me isi kwun̄, mije ke îkaan̄ inu ìbotumu inyi owu.”

19Ogwu ibot otutuuk ebi akọn̄ ya onenitet gwun̄ enerieen̄ ya me ubọk, mè isa ije ida ibọkọ, mè ido ibe, “Ìre kpasi ikọ ke oweek itutumu inyi emi?”

20Gwun̄ enerieen̄ ya otutumu inyi ibe, “Ebi Ju mîgbaan̄ itọt isan̄a ibe ke ema mêfiaan̄ ibeek ibe owu òria Pọọlu ònu me isi ebi Oru me iyakwut, mije ke ema ekiweek inọnọ otutuuk atikọ ofolek ikọ kan̄. 21Soso, kachieek, mije, ebi Ju ìraraka akọp ene ini mîlet me agba oniin̄ ikikpọ mgbọ Pọọlu oboniraka, inyi ema ekpan̄ ọmọ sabum ìbore isi ebi Oru. Ife chi mînyan̄a ibot ibe ke ema kpebechak inu geege me otu, mè ìre inorie, mè ìre miin̄, mege ire mgbọ ema mêsan̄abe ugwem kè Pọọlu. Ema mîbem lek isan̄a mgbọ keyi, ekikup ikpọ mgbọ owu môsan̄abe Pọọlu isibi inyi ema.”

22Ogwu ibot ya obebe gwun̄ enerieen̄ ya, “Fo, mè katumu ìnyi ene geege ibe ke onikpa ikọ yi inyi emi.”

Mîria Pọọlu isi ama Sisaria

23Ogwu ibot otutuuk ebi akọn̄ ya onenigwen ene iba me lek ebi ibot akọn̄ ìkup me irak kan̄, mè inyi ema ida ibe, “Ìgwat lek ìtitiin̄ efit ebi akọn̄ iba, mè ofifi akọp ebi akọn̄ jaaba ebi ìkilibi me inyọn̄ inyinya, mè ebi akọn̄ ìkitọbọ otunwa, efit iba, mè ìbem lek. Òfuk-mgbọ isisulu onaan̄ge me ikakwun̄ cherekeyi, enyi mêsa Pọọlu isi Sisaria. 24Ìgobo si inyinya echi Pọọlu obokọp, mè ìmun̄ ibe ke enyi mîsa Pọọlu isi ire isi kè Filikis ogwu ibot mkpulu me utelelek.”

25Ogwu ibot otutuuk ebi akọn̄ ya onenige ikpa igbaalek inyi ema. Ìge ikpa ya ikeyi:

26“Emi Kọlọdiọs Lisias nge ikpa etip keyi ijet owu Filikis, ogwu ibot mkpulu, ogwu otutuuk ebi ene ekinyi umin.

“Ntọp owu amọn!

27“Ebi Ju etet ene yi ibekpan̄ me unye. Ire, mgbọ nnọbe ibe ke ọmọ ìre gwun̄ owot Rom, nsasa ebi akọn̄ n̄a isi ere ya isi inyan̄a ọmọ isibi me ubọk kiban̄. 28Mgbọ mweekbe irọriọọn̄ ikan òtetet ọmọ, nnenisa ọmọ isi me isi Oru kiban̄. 29Me ere ya, emi nniweek imun̄ ibe ke uraamọn ekitoon̄ ọmọ ìgbaan̄ me lek Ikan kiban̄. Ire, ǹkamun̄ ikan geege îrọn̄be eyi ebesa me lek ikpan̄ ọmọ, mè ìyaka ire, eyi ebesa itap ọmọ mkpọn. 30Mgbọ yi, mbọkọ si etip ibe ke mîtọt isan̄a ikpakpan̄ ogwu enerieen̄ yi. Eya orọ mbe ke m̀kpayaka ifiat mgbọ, mè iria ọmọ ijet owu. Ntumu si inyi ebi ìkitoon̄ ọmọ uraamọn cha ibe egọọk enu me isi kwun̄, enetumu unaan̄-ejit kiban̄ ejeen̄ owu.”

31Ebi akọn̄ cha erọrọ ubọk enyibe ema ida, mè isa eririeen̄ yaage isan̄a Pọọlu isibi me ama, mè isa ọmọ isi ire ama ekigwen Antipatiris. 32Me ofit iwele kan̄, ebi ibot akọn̄ cha mè otutuuk kebilọ enenibe mè ebi ìkikọp inyinya cha esa Pọọlu esi ere Sisaria, mè igwu ikom eyi kiban̄ ika inu oyet egep ebi akọn̄ me Jeruselem. 33Ebi ìkikọp inyinya cha esasa Pọọlu ikọp inire Sisaria, mè isa ikpa etip ya inyi Filikis ogwu ibot mkpulu, mè ikana Pọọlu itap ọmọ me ubọk. 34Filikis ofufuk ikpa ya isan̄a, mè inido Pọọlu agan̄ înan̄abe. Mgbọ înọbe ibe ke Pọọlu ìre ogwu Silisia, 35itutumu inyi Pọọlu ibe, “Mâgwen ikọ kwun̄ isibi mgbọ ebi ìtotoon̄ owu uraamọn isinu.” Inyinyi ida ibe esa Pọọlu esi etap me uwu ubọọn̄ eyi Erọdu ogwu ubọọn̄ onamabe, mè eto ebi akọn̄ inyi ekebem.

Currently Selected:

Ikwaan̄ 23: Obolo

Highlight

Copy