Ikwaan̄ 19

Pọọlu înu me Efesọs

1Mgbọ Apọlọs okupbe me Kọrint, Pọọlu onenije me inyọn̄ inyọn̄ ikana isi Efesọs, mè ichichini usini ebi ìchechieek me ama ya, 2mè ido ema ibe, “Ìre enyi mîbọkọ Ekwukwu Mbuban me mgbọ enyi echieekbe?”

Ema efọfọọk ibe, in̄-in̄, ke ema kperarak inọnọ ibe ke Ekwukwu Mbuban ọmọ òwa.

3Pọọlu ododo ema ibe, “Ire ikeya, ìre kpasi igwook-mun̄ ke enyi ebọkọ?”

Ema efọfọọk ibe ke îre igwook-mun̄ kè Jọn.

4Pọọlu otutumu inyi ema ibe, “Igwook-mun̄ kè Jọn ìre igwook-mun̄ eyi òkijeen̄ ibe ke ene îgwu ikom itele ijo kan̄. Jọn ìtumu inyi ebi ene ibe echieek me lek ogwu òbonu me udun̄ kan̄, òrere Jisọs.” 5Mgbọ ema enọbe ikọ yi, egwogwook ema mun̄ me erieen̄ Okaan̄-ene Jisọs. 6Pọọlu onenitoon̄ ema ubọk me lek. Ekwukwu Mbuban oninin̄ ema me emen, ema ebebene ikitumu ikọ me nke nke usem, mè ikiben nriran. 7Ema otutuuk ìre akọp mè ebirieen̄ iba.

8Pọọlu onanan̄a isi inin̄ uwu ntitiin̄ ebi Ju, mè inye otu ikigọọk ema igbini ikọ ikiweek inwenwene ema ejit me lek ijejeen̄ eyi mkpulu eyi Awaji. Îkup me ama ya onyan̄ ita ikigọọk ema igbini ikọ. 9Ire, usini kiban̄ etetet ejit inye, mè ijit ichechieek me lek kè Jisọs. Kpan̄asi ikeya ema ekekitumu Oniin̄ eyi Okaan̄-ene ifiat me isi ebi ntitiin̄ ebi Ju. Eya orọ Pọọlu onanan̄a isibi itele ema, mè isa ebi ìchechieek me lek kè Jisọs igbaalek kan̄ ikisi ijeen̄ inu usen geelek me uwu ikpa kè Tiranọs. 10Pọọlu îjeen̄ inu me ere ya ikeya acha iba. Sa me ikeyi, otutuuk ebi Ju mè ebi Giris ìluk me agan̄ Esia ya enọnọ ikọ Okaan̄-ene iso.

Bọn kè Sikiba

11Awaji orọrọ owuwa uyeke uyeke inu inan̄a me ubọk kè Pọọlu, 12ire lek ekisa akisi ubọk mè ekwut ekitobo ijeen̄ me isi ejit isa isi ikwaan̄ inichak me lek kè Pọọlu, mè isa isi ikitoon̄ me lek ebi orukan̄, mè ebi ijo erumun̄ okupbe me emen, lek ebi orukan̄ îra inye, ijo erumun̄ cha îra isibi itele ebi îkupbe me emen.

13Usini ebi Ju ebi ìkijijen̄e ikana ikilap ijo erumun̄ isibi me emen ene eneniweek isasa erieen̄ Okaan̄-ene Jisọs ilap ijo erumun̄ isan̄a ene me emen. Ema ekekitumu inyi ijo erumun̄ cha ibe, “Nsa erieen̄ kè Jisọs, ogwu Pọọlu okitumu isibi, igana inyi owu ibe owu, sibi!” 14Îkaan̄ nsabọn irieen̄ jaaba ìkirọ inu yi. Ema ìre bọn kè Sikiba ogwu ibot ngwugwa ebi Ju. 15Usen ge, ijo erumun̄ ya ofọfọọk ema ibe, “Nriọọn̄ Jisọs, mè iriọọn̄ si Pọọlu. Ire, enyi ìre ebi owa?” 16Ogwu enerieen̄ ya ijo erumun̄ okupbe me emen owuwulu inin̄ etete kiban̄, mè inye lek igak otutuuk kiban̄, mè isut ema ijaan̄ lek. Eje okekisibi ema me lek. Ema ebeben unan me lek ilibi njak njak isibi me uwu ya.

17Mgbọ otutuuk ebi Ju mè ebi Giris ìluk me Efesọs enọbe ukpatu inu ya òrọrọ, ukpook otetet ema enenen. Ema enyinyi erieen̄ Okaan̄-ene Jisọs ikpele ulibi òmimin igak adasi mgbọ. 18Otutuuk ebi ìchechieek me lek kè Jisọs enunu initumu ijo inu kiban̄ isibi me isi otutuuk ene. 19Owuwa ebi ìkido ido-inu ekpukpulu ikpa kiban̄ cha ema ekisa ido inu inigwook me ere ge, mè itap ukan̄ iwọp me isi otutuuk ene. Mgbọ efukbe ikpoko ikpa cha obenbe, isisibi akọp obop darakima go. 20Sa me ikeyi, ikọ Okaan̄-ene okpọkpọk ikana ere, unye kan̄ si okekimin.

21Mgbọ otutuuk inu chi orọbe iraka, Pọọlu obeben me ejit ibe ke ọmọ môje itibi Mesidonia mè Akaya isi Jeruselem, mè itumu ifieek ibe, ọmọ isinan̄a me Jeruselem, ke ọmọ môsi Rom si. 22Ineniria Timọti mè Irasitọs, ene iba me lek ebi ìkitap ubọk inyi ọmọ, isi Mesidonia, mè ibia me agan̄ Esia ya sọnja mgbọ.

Mîtap okput me ama Efesọs

23Me ike mgbọ ya si, ikpele ufialek oninin̄ me ama Efesọs, mije Oniin̄ eyi Okaan̄-ene. 24Îkaan̄ ogwu enerieen̄ ge me ama ya ekigwen Demetirọs ogwu òkisa alata okuket itọkọ mkpọmfaka eyi yọk ekigwen Atemis. Ọmọ mè ebi usọ ebi melek kan̄ ekirọ ikwaan̄ ya mîkikaan̄ oruru enenen inan̄a me ubọk ikwaan̄ ya. 25Usen ge, Demetirọs onenigwen otutuuk ebi usọ ebi ìkigọọk ọmọ isi ikwaan̄ ya mè ofifi ebi usọ ìkisi ojelek ikwaan̄ ya si ititiin̄, mè itumu inyi ema ibe, “Ebi melek n̄a, enyi mîriọọn̄ ibe ke ubọk ikwaan̄ kiji yi îkinyi eji atalek oruru. 26Mgbọ keyi enyi mîsa chieen̄ kinyi imun̄, mè isa utọn̄ kinyi inọ ubọk ogwu enerieen̄ yi ekigwen Pọọlu okitumu ikana ere ibe ke awaji echi ebilene esabe ubọk irom ìkare awaji kubọk ge, mè isa me ikeya ifiat owuwa ene ibot, mè inwene ogbogbo ene ejit me ama Efesọs yi, mè otutuuk agan̄ Esia. 27Inu yi môrọ inyi ukot mbọm kiji ikaan̄ ijo erieen̄. Ire, eyi òfefieek ichit ìre ke uwu ikpele yọk kiji, Atemis, môkana inu ochak. Atemis me lek kan̄ si, ogwu otutuuk ebi agan̄ Esia, mè otutuuk linyọn̄ ekitọbọ ebum inyi môkana inu ikike. Umin eyi ekinyi ọmọ kubọk yọk môchep isi ge dìp dìp.”

28Mgbọ yaage ebi ife cha enọbe ikọ ya, ejit onanaan̄ ema enenen, ema ebebene ikitaan̄ ukpo ibe, “Atemis ebi Efesọs ore yọk òmimin!” 29Mgbọ yaage, otutuuk ama ya odidimi. Ebi afa cha esasa me ejit ge igbuku inin̄ ama, mè itet Gayọs mè Arisitakọs ebi ìgọgọọk Pọọlu me udun̄ inan̄a me Mesidonia inu, mè itaba ema isa isi oyet ile. 30Pọọlu îweek isisibi isi oyet ile ya, ire, ebi ìchechieek me lek kè Jisọs kpechieek. 31Usini ebi ibot ikwaan̄ ebi Rom ìkup me agan̄ Esia si ebi ìrere unene kè Pọọlu eraria etip ijet Pọọlu ibe, soso, mè ogwugwu ikalululuk ìsibi ìsi oyet ile ya.

32Wọlọwọlọ oninin̄ me etete urum ene cha, ema otutuuk ene ekekitaan̄ ukpo itumu ikọ. Mgbọ usini ene ekitumu ikọ ge, ebi ofifi ene ekitumu ofifi ikọ. Owuwa me lek ebi ife cha kperọriọọn̄ si ibot inu òrọrọ ema etitiin̄be me oyet ile ya. 33Usini ebi Ju esasan̄a Alikisenda ito me isi, mè itumu ikọ itap me otu. Alikisenda owuwuwum ubọk inyi ema ibe eriaan̄ otu, inyi ọmọ itumu ubọk inu ya osabe irọ inyi ema. 34Ire, mgbọ ebi ife cha emun̄be ibe ke Alikisenda ya ìre ogwu Ju, otutuuk kiban̄ esasa me ida ge itaan̄ ukpo ejit yaage iso mbubak mgbọ iba, ikibe, “Atemis ebi Efesọs ore yọk òmimin!”

35Ogwu uti ikpa ama ya onenirọ inyi okput ya iwọ, mè itumu inyi ema ibe, “Enyi ebirieen̄ ama Efesọs, ǹdo enyi nu, ìre îkaan̄ ene geege me otutuuk linyọn̄ ogwu ikariọọn̄ge ibe ke îre ebi Efesọs ekiban uwu Atemis mè ewuuk kan̄ ya eyi ònan̄a me inyọn̄ irọn̄ me ijọn̄? 36Eya orọ, ubọk otutuuk ene eriọọn̄be atikọ kechi, înwọn ibe enyi egele lek, mè ekarọ inu geege kubọk ebi ekanọge lek. 37Ebirieen̄ chi enyi esabe inu me ere keyi kpechiin̄ inu me isi yọk geege me ama kiji, kpetumu si ikọ geege ilọ inyi Atemis kiji kubọk ge. 38Ire Demetirọs mè ebi ikwaan̄ kan̄ ikaan̄ ikọ melek ene, isotu uwu oyerebet ìbobook, ebi ibot oyerebet si òwa. Demetirọs mè ebi melek kan̄ esa ikọ kiban̄ esi ere ògbegbe, mè etumu eta. 39Ire iyaka ikaan̄ ofifi esese inu enyi eweekbe igwegwen isibi, ìsan̄a ìsibi me etete ebi ìkisibi oyerebet, inyi etumu efieek. 40Me lek inu eji erọbe cherekeyi, kpegbala chieen̄ ikpọ, ebi ibot mkpulu mêkọt itoon̄ eji ikọ, ibe ke eji mîtim etim ijọn̄. Ire irọ ikeya, eji kpebekọt itumu inwọnọ, mije, kpunu inu geege eyi morọ inyi eji erọ ojelek inu eji erọbe cherekeyi.” 41Ikọ ya itata ọmọ me otu, ibebe ema otutuuk ene eyat. Ema enanan̄a me ere ya ifon.

Currently Selected:

Ikwaan̄ 19: Obolo

Highlight

Copy