Ikwaan̄ 16

Timọti îgọọk Pọọlu mè Sailas ije

1Pọọlu onenije isi ire Dabi, mè iraka isi ire Lisitira. Me Lisitira ke Pọọlu onichichini gwun̄ Nte ge ekigwen Timọti. Ogwu uga ìre ogwu Ju, mè ire si gwun̄ Nte. Sà ogwu ute ore ogwu Giris. 2Otutuuk bọn Nte ìkup me Lisitira mè Aikoniọm mîtumu ata ikọ ofolek kè Timọti. 3Mije keya, Pọọlu oweweek imọmọnọ Timọti itap me lek kan̄. Eya orọ, Pọọlu obebe mè efieek Timọti afi, inyi ebi Ju ebọkọ ọmọ etap, mije, otutuuk ebi Ju ìkup me agan̄ ya mîriọọn̄ ibe ke Timọti ìre ogwu Giris; ke ìkare ogwu Ju. 4Mgbọ eya orakabe, Pọọlu onenibene ikijijen̄e ikana me ama me ama, mè ikikpa inu ebi otuchieen̄ mè ebi ugane ntitiin̄ me Jeruselem edọmọbe inyi bọn Nte ebi ekarege ebi Ju, mè ikibe ema esun̄ ikan cha. 5Sa me ikeya, ebi ntitiin̄ cha ekekeke inye me emen ichechieek, mè ikimumana me otu ifuk me usen me usen.

Pọọlu îmun̄ ilaak ọkpọchieen̄ ofolek Mesidonia

6Pọọlu mè ebi melek kan̄ enenije itibi agan̄ Firijia, mè Galesia, mije Ekwukwu Mbuban ikachieekge ibe ema elook ata etip me agan̄ Esia. 7Mgbọ ema ejebe inire oke ijọn̄ Misia, ema mîweek ijeje inin̄ agan̄ Bitinia. Ire, Ekwukwu kè Jisọs ìkachieek ibe ema enin̄. 8Mije keya, ema ejeje iraka agan̄ Misia, mè isi ama Torowas. 9Mgbọ ema erebe ama ya, me eririeen̄, Pọọlu omumun̄ ilaak ọkpọchieen̄ ubọk ogwu enerieen̄ Mesidonia ge okekebe me isi kan̄, mè ikibeek ọmọ ibe, “Soso, saba na me Mesidonia na tap ubọk nyi eji!” 10Mgbọ Pọọlu omun̄be ilaak ọkpọchieen̄ ya isan̄a, eji ebebene mgbọ yaage ikibem lek isisi Mesidonia, mije, eji mîchieek ibe ke îre Awaji ogwen eji ibe esi elook ebi agan̄ ya ata etip.

Lidia îgwu ikom me Filipai

11Eji eninin̄ uji awala me Torowas, mè ikọp ejit yaage iraka ifo achọ ekigwen Samoteres. Ofit iwele kan̄, eji ekọkọp isaba itoon̄ me atasuk ama Niapolis. 12Eji eneninan̄a me Niapolis ije ukot ukot isi ama Filipai. Filipai ìre ama ebi Rom ekikpulu, mè ire si isi ama me agan̄ Mesidonia. Eji eluluk ijọn̄ọ usen me ama ya.

13Me Usen Mbuban, eji enanan̄a me ama ya ije isibi isi agba okwaan̄ ge ere eji ekeekbe ibe ke mêmun̄ ere ebi Ju ekiriaak uriaak. Eji esisiki ikweek irek, mè ibene ikitumu ikọ Awaji melek ebibaan̄ ìtititiin̄ me ere ya. 14Ene ge me lek ebi ìgbagban̄ ikọ Awaji ya ìre ogwu enenwaan̄ ge ekigwen Lidia, ònan̄a me ama Tiyatira. Ogwu enenwaan̄ ya ìkinyam ekwut unye otu ewe irio irio. Ọmọ ìre si ogwu òkitọbọ ebum inyi Awaji. Okaan̄-ene ochichili ejit ogwu enenwaan̄ ya, ibọbọkọ ikọ Awaji Pọọlu otumube ya itap. 15Mgbọ îbọkọbe ikọ ya itap, egwogwook ọmọ mè otutuuk ebi uwu kan̄ mun̄. Mgbọ egwookbe ọmọ mun̄ isan̄a, igwegwen eji ibe enu me uwu kan̄, mè itumu inyi eji ibe, “Ire enyi imọnọ emi kubọk ogwu òchechieek me lek Okaan̄-ene, ìna ìnigọọk emi iluk.” Îriaak eji mege eji echechieek, mè igọọk ọmọ ifo uwu kan̄.

Mîtap Pọọlu mè Sailas mkpọn

16Usen ge eji ekije isi ere uriaak ya, ogwu enenwaan̄ usun̄ ge erumun̄ ido-inu okupbe me emen onenichichini eji me oniin̄. Ogwu enenwaan̄ yi îkisa ido-inu yi ibọm ikpoko enenen inyi ebikaan̄ kan̄. 17Ogwu enenwaan̄ ya onenikigọọk Pọọlu mè otutuuk kiji ikije ikana ere, mè ikitaan̄ ukpo itumu ibe, “Ebirieen̄ chi ìre ebi ikwaan̄ Awaji Ogwu Òbebene Ichit. Ema enu ibeniteme enyi oniin̄ enyi ebesa ikaan̄ unyan̄a.” 18Ogwu enenwaan̄ ya îrọ inu yi owuwa usen. Usen ge, Pọọlu onanaan̄ ejit, mè ikana isi ida ọmọ, mè igana inyi ijo erumun̄ ya ibe, “Me erieen̄ kè Jisọs, ǹkitọ inyi owu ibe owu, nan̄a me emen gwun̄ enenwaan̄ yi sibi!” Mgbọ yaage, erumun̄ ya onanan̄a isibi me emen kan̄.

19Mgbọ ebikaan̄ usun̄ enenwaan̄ ya eriọọn̄be ibe ke otu oniin̄ ema ekisa ikaan̄ ikpoko îchit, ema etetet Pọọlu mè Sailas mgbọ yaage, mè idut ema isi me isi ebi ibot ama, me oyet ewe. 20Me isi ebi oyerebet ebi Rom cha, ema etutumu ibe, “Ife chi ìre ebi Ju. Ema enu inikitap ufialek me ama kiji, 21mè ikisa orọmijọn̄ ikatatge me lek ikan kiji ebi Rom inikifiat ebi kiji ibot.”

22Ogbogbo ebi ama ya egọgọọk itap lek irọ Pọọlu mè Sailas inu. Ebi oyerebet ebi Rom cha enyinyi ida ibe esan̄a Pọọlu mè Sailas ofọnti me lek, mè esa njijan̄ esulu ema. 23Mgbọ ife cha esulube Pọọlu mè Sailas imem, edudut ema isi igon ikam me uwu mkpọn, mè inyi ogwu ibot uwu mkpọn ya ida ibe igwuun̄ chieen̄ ikpọ ema. 24Mije ogwu ibot uwu mkpọn ya obọkọbe ojelek etip òkup ikeya, isasa ema isi itap me agwut mkpọn eyi òkup me emen emen, mè igon ukot kiban̄ ikam me agbagba chieen̄ mgba-mfiik ekisa igon uyọt uyọt ebi mkpọn.

25Me ejit eririeen̄, Pọọlu mè Sailas ekekiriaak uriaak, mè ikikọt okwa itọn̄ Awaji. Ebi mkpọn kechilọ ekekigban̄. 26Me ekakpọge chieen̄, ijọn̄ obebene ikisisik me ere ya atalek unye unye, mè isisik ire lek ọdọ uwu mkpọn ya. Mgbọ yaage, otutuuk isotu uwu mkpọn ya ogwugwuku ibook. Otutuuk mkpọn esabe igon ebi mkpọn cha geelek ogegen̄ igwook. 27Ogwu ibot uwu mkpọn ya obobolo chieen̄, mè imun̄ ubọk otutuuk isotu uwu mkpọn ya ogwukube ibook. Mgbọ îmun̄be ikeya, iwọwọọk oge akọn̄ kan̄ ibosa ikpan̄ lek, mije, ìkeek ibe ke otutuuk ebi mkpọn cha mîlim ifon isan̄a kpai. 28Ire, Pọọlu okukup imun̄ inu ene ya oborọ, mè itaan̄ ukpo itumu inyi ibe, “Kasak unan geege me lek kwun̄. Eji otutuuk ene òwa me ere keyi!”

29Ogwu ibot uwu mkpọn ya obebe esa mkpukan̄ ejet ọmọ. Mgbọ îbọkọbe mkpukan̄ ya, iwuwulu inin̄ emen uwu ya, mè irọn̄ me isi kè Pọọlu mè Sailas, mè ikiran. 30Inenisan̄a ema isibi, mè ido ema ibe, “Ebi nte n̄a, ìre keke ke mbarọ mè ikaan̄ unyan̄a?”

31Ema efọfọọk ọmọ ibe, “Chieek me lek Okaan̄-ene Jisọs, ke mênyan̄a owu, mè otutuuk ebi uwu kwun̄.” 32Pọọlu mè Sailas enenitumu ikọ eyi Okaan̄-ene inyi ọmọ mè otutuuk ebi uwu kan̄. 33Me ejit eririeen̄ ya si, ogwu ibot uwu mkpọn ya osasa ema isi igwọk chieen̄ unan cha etapbe ema me lek mgbọ esulube ema. Pọọlu mè Sailas egwogwook ọmọ mè otutuuk ebi uwu kan̄ mun̄. 34Inenisa ema inu me uwu kan̄, mè irọ inorie iyik inyi ema erie. Ọmọ mè otutuuk ebi uwu kan̄ ebebele ejit enenen, mije ichechieek ema enichieek me lek Awaji.

35Mgbọ egwe owelebe, ebi oyerebet cha eraria ebi ikan ido ibe esi elook ogwu ibot uwu mkpọn ya ibe itele mè ebirieen̄ iba cha efon. 36Ogwu ibot uwu mkpọn ya ololook Pọọlu mè Sailas ibe, “Ebi oyerebet cha mîria etip inu ibe emi ǹtele mè enyi efon. Eya orọ, ìnan̄a isibi, mè ìfo me esuuk.”

37Ire, Pọọlu otutumu inyi ebi ikan ido cha ibe, “Ìkpọ, eji ìre bọn owot Rom. Ebi oyerebet cha kpesibi oyerebet geege me ibot kiji isasa iriọọn̄ mè eji mîrọn̄ ikan, mè ìre eji kperọn̄, kubọk ikan ebi Rom odobe. Ekpọkpọ itet eji isut me isi otutuuk ene, mè igon eji ikam me uwu mkpọn, mè ibeninween̄ lek isan̄a eji isibi mgbọ keyi me nlelet, me ebi ene ekariọọn̄ge. In̄-in̄, eya ìkporọ! Ema me lek kiban̄ enu enesa eji eje esibi me uwu mkpọn!”

38Ebi ikan ido cha egwugwu ikom, mè isa ikọ ya isi ikpa inyi ebi oyerebet cha. Mgbọ ebi oyerebet cha enọbe ibe ke Pọọlu mè Sailas ìre bọn owot Rom, ukpook otetet ema. 39Ema enunu iniriaak Pọọlu mè Sailas, mè isa ema ije inan̄a me uwu mkpọn ya isibi, mè iriaak ema ibe esibi me ama ya. 40Mgbọ Pọọlu mè Sailas enan̄abe me uwu mkpọn ya isibi, ema ejeje isi uwu kè Lidia. Me uwu ya, ema echichichini owuwa bọn Nte, mè itumu ikọ ukarajit me emen ichechieek inyi ema, mè isibi itele ama ya.

Currently Selected:

Ikwaan̄ 16: Obolo

Highlight

Copy