TYENDO NE SIIREI TUGUL 5
5
Karwotitoet agobo chamyet
1Kaanyo mbareennyu, chepkamennyu, murerennyu.
Kaayum tuguukyuk che uu igomoik ak tuguuk che ng'uu ne anyiny.
Kaamde masamekyuk kumyanyun,
kaaee divaikyuk ak alu chekyuk.
Oamisye, ee choronok, oeeise,
ee oeeise miising' ee chamanikyuk.
2Ki anuuchi, ago kigasu muguleldanyu.
Kutitap chamanennyu ne igongong'isyei, koleen,
yaatwa, chepkamennyu, chamanennyu,
cheptugennyu, nenyu ne libwoop.
Amu nyiitaat metinnyu rewoot,
ak nyiitaat sumeekyuk che iletotin, rewootap kemoi.
3Kaareegu kotinnyu; ta alaaktoi ano kogeny?
Kaaun keelyekyuk, ta andoitoi ano simdo kogeny?
4Kiyogoune chamanennyu eunnyi konda ne mi kurgeet,
ak ki igaskei muguleldanyu agobo ineendet.
5Ki ang'eet aleen ayaatyi chamanennyu,
ki saitae eunekyuk tuguuk che uu igomoik,
ki saitae morikyuk tuguuchooto uu igomoik che uu peek,
eng' eunegap karnet ne ki kigee.
6Ki ayaatyi chamanennyu,
ago kiwelelgei chamanennyu ak kwo.
Kitanui saboondanyu ye kingo twekwa.
Ki acheeng' ineendet, ago ma amuuch anyoor,
ki aguur ineendet, ago ma wolwo.
7Kinyoorwo riibiik che pendoti eng' nganaseet,
kibira, ki iguotena,
ki ibeno riibiigap irimoik ngoryennyu ne po parak.
8Asoomok, ee tiibiigap Jerusalem,
ale, ngot onyooru chamanennyu,
omwachi ineendet oleenji,
amyani agobo emostap chamyet.
Tiibiik
9Siirei eng' nee chamaneng'ung' chamaneet age,
inyee ne ii karaaran isiir tiibiik tugul?
Siirei eng' nee chamaneng'ung' chamaneet age,
kot iyasyewech ko uu nooto?
Murereet
10Leel chamanennyu ago tilyal ne piriir,
taagunet ineendet eng' eliphuusyek taman.
11Uu metinnyi thahabu ne karaaran miising',
kooen suumeekyik che iletotin,
ak ko tuuen ko uu koroorigap chepkugit.
12Uu konyekyik che po cheptugenik eng' ngeguusyegap kereruusyek;
cheptugenik che leelach ko uu cheego,
che tetotin komyee eng' kereruusyek.
13Uu matong'oikyik mbareetap nyamdutik,
uu mbareenigap ingweek che anyiny.
Uu kutinnyi taaptook che piriireen,
ne saitoe tuguuk che uu igomoik che uu peek.
14Uu eunekyik peteinigap thahabu che ki kitetyi berulo.
Uu poortanyi kelegap peeleek che ki kiliigee sapphire.
15Uu keelyekyik tolochigap koik che leelach,
che ki kitetyi kelongonigap thahabu ne karaaran.
Uu itoondanyi Lebanon,
karaaran ko uu taragonik.
16Onyiny ng'aleekyik miising',
ee, karaaran kot ineendet eng' kiy age tugul.
Niito ko chamanennyu, niito ko chorwennyu,
ee, tiibiigap Jerusalem.
Currently Selected:
TYENDO NE SIIREI TUGUL 5: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
