TYENDO NE SIIREI TUGUL 3
3
1Ki acheeng' kemoi arue,
ineendet ne chamei saboondanyu;
ki acheeng' ineendet, ago ma anyooru.
2Ki ale, “Ang'eete nguno ak awendotee nganaseet,
eng' ortinwek ak eng' ortinwek che paraen;
acheeng'e ineendet ne chamei saboondanyu.
Ki acheeng', ago ma anyooru.”
3Ki nyoorwo riibiik che pendoti eng' nganaseet,
Ki ateebee aleenji,
“Tos ki ogeer ineendet ne chamei saboondanyu?”
4Kinga we ne matya ko kaasiirtoe icheek,
anyooru ineendet ne chamei saboondanyu.
Ki anam, ak ma achamji kwo,
agoi amutu ineendet konyo kootap kamennyu,
agoi koot ne po oriit ne po ineendet ne kisicha.
5Ayosyewok, ee tiibiigap Jerusalem,
eng' cheptirgichik ak kenyelok che kotoy,
ale, amat otwaa, anan oong'et chamyet,
agoi koit kasartanyi.
Tyendap somok
Murereet
6Nee ni togosu eng' surkwen
ko uu tolochigap iyeto,
ne ng'uu nyamdutyet ne po tuguuk che uu igomoik ak tuguuk che nyamdut,
ak pusaruk tugul che po chemung'araindet?
7Ogeero, kiit ne lyeldoe Solomon;
yiemei kioto murenik tamanwogik lo che kiimeen,
murenik che kiimeen che po Israel.
8Tinyei tugul rotoogap chok,
ak ko ng'oomen tugul eng' lugeet.
Tinyei age tugul rotwennyi po chok eng' suennyi,
amu kaiyweisyet ne po kemoi.
9Kiyachigei Laitoryat Solomon ng'echereet ne kilyeldoe
ne po keetiigap Lebanon.
10Kiyae tolochikyik fedha,
koyae patennyi thahabu,
koyae ole kitebee tuguuk che arusen ne piriir,
ki kitetee kwenunnyi chamyet,
ne ki punu tiibiigap Jerusalem.
11Omong'u, ee tiibiigap Zion,
ak ogeer Laitoryat Solomon,
kolaachi naaryeetap laitornatet ne ki ilaakyin kamennyi
eng' peetuut ne ki itunisye,
ee, eng' peetuutap poiboiyetap muguleldanyi.
Currently Selected:
TYENDO NE SIIREI TUGUL 3: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
