ROMANIK 3

1Tinyei porot nee anyun Yahudyot? Anan nee toreteet ne po kamuratanet? 2Oo eng' ooreet age tugul: ne po tai, ko amu ki kigoochi Yahudik kotononji ng'aleegap Kamuktaindet. 3Amu egu nee ngot koma tinyei alage kayaneet? Kayanennywa ne ma mi, ko tos walei imandap Kamuktaindet koek puch? 4#T.Kal 51.4 Achicha: ma uu nooto: ingoek ne po iman Kamuktaindet, ago kiplembechwa chii age tugul; ko uu ye siraat kole,

Si kobiit kindein imanda eng' ng'aleeguk,

Ak imuuch ibelisye ye kirwoogun.

5Ago ngot kogonyiti atebeennyo ne ma po imanda, imandap Kamuktaindet, kota kemwae nee anyun? Tos ma po imanda Kamuktaindet ne nyoonei eng' nereegek? (Ang'alaali ko uu piik.) 6Achicha! Ma uu nooto; amu nda uu nooto korwookyindoi ano `Kamuktaindet ng'wony?

7Ago ngo tesak imanitap Kamuktaindet eng' lembeitanyu agoi toroornatennyi, ko amu nee si kota kirwookwo ko uu kiptengekyo? 8Ak amu nee si ma ki mwa (ko uu ye kimwaitaenech ne ya, ak ko uu ye iyani alage kole kimwae acheek) keele, Ongeyai che yaach si kobiit kobwa che myach? Po iman kirwoogennywa.

Ma mi ne po imanda

9Nee anyun? Tos ki myachen kesiir icheek? Achicha, agot kitigin: amu kiga kisip kiityi Yahudik ak Yunanik keele mi icheek tugul eng' pounatetap tengekto; 10#T.Kal 14.1-3; 53.1-3 ko uu ye siraat kole,

Ma mi ne po imanda, achicha, ma mi agot agenge:

11Ma mi ne iguitos,

Ma mi ne cheeng'ei Kamuktaindet;

12Ki komasta tugul, ki koek tugul che ma tilei kiy;

Ma mi ne yaei ne myee, achicha, ma mi agot agenge:

13 # T.Kal 5.9; 140.3 Mookwekwak ko kererit ne yaataat;

Kiboisyee keniisyet eng' ng'elyebwekwak:

Mi ng'wonetap erenook kutusweekwak oriit:

14 # T.Kal 10.7 Che nyiitaat kutusweekwak chubisyet ak ng'wanindo:

15 # Isa 59.7-8 Chepchep keelyekwak kotumda korotiik;

16Mi ortinwekwak ng'emisyet ak nyalilda;

17Ama nai ooreetap kaalyeet:

18 # T.Kal 36.1 Ma mi kaiyweisyet ne iywei Kamuktaindet taitap konyekwak.

19Ak kingen keele tuguuk alak tugul che mwaei Ng'atuutyet, komwachin icheek che miitei eng' pounatetap Ng'atuutyet; si kobiit keger kutit age tugul, ak si ki mutyi ng'wony komugul kirwoogetap Kamuktaindet: 20#T.Kal 143.2; Gal 2.16 amu ma mi chii ne kiityin imanda eng' tainnyi eng' poisyonigap Ng'atuutyet: amu punu naetap tengekto Ng'atuutyet.

Kinyooru imanda eng' kayaneet

21Ago nguno ko kagong'ang'ak imandap Kamuktaindet ama eng' ng'atuutik, ne paoryani Ng'atuutyet ak maotik; 22#Gal 2.16 agot imandap Kamuktaindet ne mi eng' kayaneet eng' Jeso Kristo eng' icheeget tugul che iyani; amu ma mi kabesyet; 23amu ki koyai tugul tengek, ama ityin toroornatetap Kamuktaindet; 24che kiityin imanda puch eng' myeeindonyi eng' katyaget ne mi eng' Kristo Jeso: 25ne ki inde Kamuktaindet koek kaptisiisyo eng' kayaneet, eng' korotiikyik, si kobarta imandanyi, amu kachundaetap tengekwogik che ki kisip keyai, eng' muitaetap Kamuktaindet; 26amu kabartaetap imandanyi eng' peetuusyechuuto, si kobiit koek ineendet ne po imanda, ak koek ne iityin imanda ineendet ne tinyei kayaneet eng' Jeso.

27Mi ano anyun kachaunetapkei? Kigegerchi saang'. Eng' ng'atuutyet ne uu nee? Ne po poisyonik? Achicha: ago eng' ng'atuutyetap kayaneet. 28Ki iti anyun keele kiityin chii imanda eng' kayaneet ama poisyonigap ng'atuutik. 29Anan Kamuktaindet ko Kamuktaindet ne po Yahudik kityo? Ama Kamuktaindet ne po Pororyosyek ak icheek? Ee, po Pororyosyek ak icheek: 30#NKNg'a 6.4; Gal 3.20 ko uu ye agenge Kamuktaindet, ak koiityin imanda eng' kayaneet che ki kimuratan, ak koiityin imanda eng' kayaneet che ma kimuratan. 31Tos ki yai anyun Ng'atuutyet koek ne ma tilei kiy amu kayaneet? Achicha, ma uu nooto: ki kimiti Ng'atuutyet.

Currently Selected:

ROMANIK 3: KAPR

Highlight

Copy