ROMANIK 16
16
Kosamei `Paulo Poibe
1Kande eunekwok Poibe ne kitupche ne cheboityotap kaniset ne mi Kenkrea: 2ale otaach ineendet eng' Kiptaiyat, ko uu ye nyoljin che tiliileen, ak otoret ineendet eng' kiit age tugul ne magenok; amu ineendet agine ko kitoretindet ne po che chaang', ak kitoreta agane.
3 # Poi 18.2 Ogat Priska ak Aquila che ki kiboitiinik tugul eng' Kristo Jeso, 4che ki chobootiin kogoito saboonwekwak agobo saboondanyu; che ma mwachini kongoi aneege, ago kobooto kanisosyek tugul che po Pororyosyek ak icheek: 5ak ogat kaniset ne mi koonnywa. Ogat Epeneto ne achame miising', ne tongoaniat ne po Kristo eng' emetap Asia. 6Ogat Maria, ne kiboisyewok eng' poisyet ne oo. 7Ogat Androniko ak Junia, che po ornyo, ak che kimonjororinik kobooto, che taagunotiin eng' che kiyooktoi, che ki mi eng' Kristo kotom ayan.
8Ogat Ampliato ne achame miising' eng' Kiptaiyat. 9Ogat Urbano kiboityondennyu ne kiboisyei tugul eng' Kristo, ak Stako ne achame. 10Ogat Apele ne chamat eng' Kristo. Ogat icheek che po kootap Aristobulo. 11Ogat Herodion ne po ornyo. Ogat icheek che po kootap Narkiso, che mi eng' Kiptaiyat.
12Ogat Truphena ak Truphosa, che poisyei eng' Kiptaiyat. Ogat Persis chamaneet, ne kibois miising' eng' Kiptaiyat. 13#Mar 15.21 Ogat Rupo ne lewenot eng' Kiptaiyat, ak kamet ne kamennyu agane. 14Ogat Asunkrito, ak Plegon, ak Herme ak Patroba, ak Herma, ak tupchosyek che mi kobooto icheek. 15Ogat Pilologo ak Julia, ak Nereo ak chepkamet, ak Olumpa, ak che tiliileen tugul che mi kobooto icheek.
16Ogatkei eng' ng'ututet ne tiliil. Igatok kanisosyek tugul che po Kristo.
Soomeetap Paulo
17Kasoomok anyun che kitupche, ale ogeer icheek che ing'eeti kabesyosyek ak kanagutik, che ma namegei ak kaneetisyet ne ki oneetkei: ak koistoegei icheek. 18Amu icheeget che uu chooto, ko maotei Kiptaiyandennyo Kristo, ago otei mootinwekwak; ak kong'alei mugulelwegap che libwoben eng' ng'aleekwak che tangusen ak che po chemwaigutnateet. 19Amu ki kogasak eng' piik tugul kaseng'wong' po iit. Nooto anyun abaibai eng' okweek: ago amache oeguche utaatiin eng' nooto myee, ak oegu che perber eng' nooto po yaityet. 20Ak tuun tuei Kamuktaindet ne po kaalyeet Setani eng' keelyekwok ko neegit.
Ingotep kobootok myeeindap Kiptaiyandennyo Jeso Kristo.
21 # Poi 16.1 Igatok Timoteo ne kiboityot kobooto; ak Lukio ak Jason ak Sosipatros, che po ornyo.
22Anee Tertio ne kasirei parwaani, agatok eng' Kiptaiyat.
23 # Poi 19.29; 1Kor 1.14; 2Tim 4.20 Igatok Gaio ne ami koonnyi, ak kaniset komugul. Igatook Erasto riibindetap tuguugap nganaseet, ak Kuarto ne tupcho. 24Ingotep kobootok tugul myeeindap Kiptaiyandennyo Jeso Kristo. Amen.
Ne igimiti piik
25Nguno eng' ineendet ne imuuchi kogimitok ko uu logoiywekyuk che myach ak amdaetap Jeso Kristo, ko uu ng'ang'utyet ne po ung'oot ne ki kagiuny kosiis kobooch peetuusyek che po koigeny, 26ago kagong'ang'ak nguno, ak eng' siruutik che po maotik, ko uu ng'atuutyetap Kamuktaindet ne po koigeny, ko kagiboorchi pororyosyek tugul agoi kasetap iit ne po kayaneet; 27po Kamuktaindet ne utaat ineegei toroornatet koigeny, eng' Jeso Kristo. Amen.
Currently Selected:
ROMANIK 16: KAPR
Highlight
Share
Copy

Want to have your highlights saved across all your devices? Sign up or sign in
©Bible Society of Kenya, 2019