ROMANIK 14

Metilji kirwook chii age

1 # Kol 2.16 Ago otaach ineendet ne nyalulat eng' kayaneet, ago ma si orwookyi kabwaatutikyik. 2Tinyei chiito age kayaneet koam tuguuk tugul: ago ineendet ne nyalulat koamei ingweek. 3Amat kosas ne amei ne ma amei; ak amat korwookyi ineendet ne ma amei, ineendet ne amei: amu kagotaach `Kamuktaindet ineendet. 4Ii ng'oo inyee ne irwookyini otwogindetap chiito age? Tononi anan kobuti eng' kiptaiyandennyi. Ee, kinamei kotonon; amu imuuchi Kiptaiyat konam ineendet kotonon.

5Iiti chiito age peetuut age kosiir peetuut age: iiti chiito age peetuut age tugul kogergeit. Ingonai komyee chii age tugul eng' ng'omnatennyi. 6Ineendet ne riibei peetuut, koriipchin Kiptaiyat: ak ineendet ne amisyei, koamisyei eng' Kiptaiyat, amu mwachin Kamuktaindet kongoi; ak ineendet ne ma amisyei, koma amisyei eng' Kiptaiyat, ak mwachin Kamuktaindet kongoi. 7Amu ma mi age eng' acheek ne sabei agobo kei, ama mi ne meei agobo kei. 8Amu ngesaptosi, kesaptosi eng' Kiptaiyat, ak ngebegu, kebegu eng' Kiptaiyat: nooto anyun, ngesaptosi anan ngebegu, kebo Kiptaiyat. 9Amu kime Kristo agobo niito, ak kisop, si koek Kiptaiyat ne po che ki kobek ak che saptos. 10#2Kor 5.10 Ago inyee, ko amu nee si kirwookyi ne otupche? Anan kogeny, ko amu nee si iit ne otupche koek puch? Amu tuun kitonondosi acheek tugul eng' taitap ng'echereetap kirwooget ne po Kamuktaindet. 11#Isa 45.23 Amu ki kisir keele,

“Ko uu ye asabe, Mwaei Kiptaiyat,

ko tuun kutung'jino kutundo age tugul,

ak kolas ng'elyepta age tugul Kamuktaindet.”

12Nooto anyun, tuun tetyin chii age tugul Kamuktaindet atebeennyi.

Amat konach chii tupchennyi

13Nooto anyun, amat kota kirwookyigei kogeny: ago kaigai orwooch ko uu ni keele amat konde chii kanagut ooreetap ne tupcho, anan kiy ne igoochin kobut. 14Angen, ak koanai komyee eng' Kiptaiyat Jeso, ale ma miitei kiy ne ng'wanitu ineegei: kobatee eng' ineendet ne iiti kiy kole ng'waan, kong'wanitu eng' ineendet. 15Amu ngo aragen ne otupche amu amitwogik, koma iwendoti eng' chamyet. Amebar ineendet eng' amitwogiguk ne ki mechi Kristo. 16Amat kemwaitae myeeindong'wong' yaityo: 17amu laitornatetap Kamuktaindet koma amisyet ak eeiset, ago imanda ak kaalyeet ak poiboiyet eng' Kabuuset ne Tiliil. 18Amu ineendet ne otei Kristo eng' tuguuchuuto koboiboi Kamuktaindet, ak koyanjin piik.

19Nooto anyun, ongisup tuguuk che yaei kaalyeet, ak tuguuk che kiteegegei acheegei eng' acheegei. 20Amowechawech poisyetap Kamuktaindet eng' amitwogik. Tiliileen tuguuk tugul iman; ago ya eng' chiichooto amei eng' kanagut. 21Myee ngot koma ki am panyeek, anan kee maiyek, anan keyai kiy age tugul ne inachi ne otupche. 22Kayaneet ne itinye, itepte inyegei eng' taitap Kamuktaindet. Paibai ineendet ne ma tinyei ne irwookyinegei eng' kioto kagoyanjigei ineegei. 23Ago ineendet ne tinyei saget, ki kikyin ngot koam, amu ma amei eng' kayaneet; ak kiit age tugul ne ma po kayaneet ko tengek.

Currently Selected:

ROMANIK 14: KAPR

Highlight

Copy