KALEWANAIK 16
16
1Poisyetap chii kochop muguleldanyi,
ago punu `Kamuktaindet ne Toroor waluunetap ng'elyepta.
2Tiliileen ortinwek tugul che po chii ye keerei,
ago keerei `Kamuktaindet ne Toroor mugulelwek eng' karagendoet.
3Igoochi Kamuktaindet ne Toroor `poisyoniguk kondochi,
si kogimegitu kabwaatutiguk.
4Ki yai Kamuktaindet ne Toroor tuguuk tugul ko uu ye kimakyin,
ee agot che yaach ko ki yai agobo peetuut ne ya.
5Kiit ne wechei Kamuktaindet ne Toroor ko muguleldo age tugul ne meenei,
ne uu niito koma kimetoi ama kibir.
6Ki undoi yaityet eng' rireenet ak iman,
ak istoegei piik yaityet ye iywei Kamuktaindet ne Toroor.
7Ye iboiboi `ortinwegap chii Kamuktaindet ne Toroor,
kogoochin kochamyo ak puunikyik.
8Kaigai tuguuk che matya kobooto imanda
kosiir kelunaik che chaang' kobooto kertaetap kong'.
9Chobei muguleldap chii ooreennyi,
ago indochin `Kamuktaindet ne Toroor kakwautikyik.
10Punu kutitap laitoryat tiletap kirwooget ne po Kamuktaindet,
malelei kutinnyi eng' kirwooget.
11Po Kamuktaindet ne Toroor kerutyet ne po iman ak tuguuk che kigerisye;
koik tugul che mi lolet che kigerisye ko poisyennyi.
12Kiit ne kiwechei, ko laitorinik koyai tengekto.
Amu ki kimiti laitornatet eng' imanda.
13Poiboiyetap laitorinik kutusweek che po iman,
ak kochamei icheek chii ne mwaei iman.
14Uu nereegegap laitoryat piik che kiyooktoi che po meet,
ago tisei chiito ne utaat.
15Mi saboondo lapkeiyetap togeetap laitoryat;
ak uu chamennyi poldetap ropta ne po let.
16Karaaran anyun ne tya kenyoor utaatyet kosiir thahabu!
Kaigai kelewen kaguiyet kosiir fedha.
17Ooreet ne oo ne po piik che po iman ko koistoegei yaityet;
riibei saboondanyi ne riibei ooreennyi.
18Indoe `menoteet ng'emisyet,
ak indoe `kachaunetapkei kabutet.
19Kaigai ngetepto kaming'inetapkei kobooto kibananook,
kosiir kepchei parunenik ak menotik.
20Nyooru myeeindo ne epchin iit ng'olyoot,
ak paibai age tugul ne imang'u Kamuktaindet ne Toroor.
21Ineendet ne ng'oom eng' muguleldanyi keguure ne utaat,
ak tesei kaneetetapkei anyinyindap kutit.
22Utaatyet ko kondametutap peegap saboon eng' ineendet ne tinyei,
ago perberyo katigonet ne kitigoni che perber.
23Ineeti muguleldap ne utaat kutinnyi,
ak kotesyin kaneetetapkei kutinnyi.
24Uu kumyat ng'aleek che iboiboi piich,
anyinyen eng' saboondo ak chametapkei ne po kawek.
25 # Kale 14.12 Mi ooreet ne leen chiito litit,
ago kagesunennyi ko ortinwegap meet.
26Poisyechin chii mageetap poisyet;
amu ichirchiri kutinnyi ineendet.
27Chobei yaityet chiito ne ma tilei kiy,
ak miitei kutinnyi kiit ne uu maat ne peelsei.
28Iseeri pooryeet `chiito ne imaasat,
ak ibestos chaamindet choronok che eecheen.
29Iboiboi `chiito ne koroom chiitap kokwennyi,
ak komut eng' ooreet ne ma myee.
30Chobei tuguuk che imaasotin `chiito ne kerei konyekyik;
ibu yaityet `ineendet ne susei kutinnyi.
31Chepkuletap toroornatet kalwalek;
pitune ooreetap imanda.
32Kaigai ineendet ne ma sartae nereek kosiir ne kiim,
ak kaigai ineendet ne pou muguleldanyi kosiir ne luulei nganaseet.
33Ki wiirchin parbaryat ngoryeet,
ago punu `Kamuktaindet ne Toroor kirwooget tugul.
Currently Selected:
KALEWANAIK 16: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
