MATAYO 4
4
Yoomseetap Jeso eng' Surkwen
(Mar 1:12-13; Luk 4:1-13)
1 # Heb 2.18; 4.15 Ki imut anyun Kabuuset ne Tiliil Jeso kotogosta kwo surkwen si koyoom chesawilyet. 2Ak ye kingo kagorugutkei peetuusyek artam ak kemousyek artam eng' let koam ruhebeet. 3Ak ki nyo yoomindet ak koleenji, “Ngo ii Weeriitap Kamuktaindet, ing'at koichu koek magatiinik.” 4#NKNg'a 8.3 Ago ki wolji kole, “Siraat,
‘Ma sabei chii eng' magatyat ineegei,
ago eng' ng'olyoot age tugul ne mang'une kutitap Kamuktaindet ne Toroor.’ ”
5Yeityo komut chesawilyet ineendet kwo nganaseet ne tiliil; ki imut kwo kimonjogut ne po Hekaluut, 6#T.Kal 91.11-12 ak koleenji, “Ngo ii Weeriitap Kamuktaindet, iwiirchigei ng'wony; amu siraat kole, ‘Iyogu malaikaisyekyik agobo inyee: Ak kotaachin eng' eunekwak, si ma rus koita keeldong'ung'.’ ”
7 # NKNg'a 6.16 Ki leenji Jeso, “Siraat kogeny kole, ‘Meyoom Kiptaiyat Kamuktaindet ne Toroor neng'ung'.’ ”
8Ki imut kogeny `chesawilyet ineendet kwo tulweet ne kooi miising', ak koboorchi laitornatosyek tugul che po ng'wony, ak telunateet ne po chooto, 9ak koleenji, “Agoonin tuguuchu tugul, ngibutya iloswa.” 10#NKNg'a 6.13 Ki leenji Jeso anyun, “Istegei, Setani; amu siraat kole,
‘Ilasu Kiptaiyat Kamuktaindeng'ung',
ak iboisyechi ineendet ineegei.’ ”
11Ki pagaach chesawilyet anyun ineendet; ak ogeero, ki pwa malaikaisyek si koboisyechi.
Kowendi Jeso Galilaya
(Mar 1:14-15; Luk 4:14-15)
12 # Mat 14.3; Mar 6.17; Luk 3.19-20 Ye kingo kas Jeso kole kigerat Johana, kwo ineendet Galilaya. 13#Jhn 2.12 Ki wo eng' Nazareth ak kwo kotebee Kapernaum, ne mi ye neegitee araraita, eng' tabanwek che po Zebulun ak Naphtali; 14si kosulda ne ki kamwa maotyot Isaiah kole,
15 # Isa 8.23-9.1 “Emetap Zebulun ak emetap Naphtali,
ooreet ne neegit araraita, Jordan pitoniin,
Galilaya ne po Pororyosyek,
16Piik che ki tebee mesundeito
ko ki kogeer lapkeiyet ne oo,
ak icheek che ki tebee koreet ne po urwetap meet,
ko ki kochoorchigei lapkeiyet.”
17 # Mat 3.2 Kobooch yooto kotoi Jeso koamda, kole, “Osigu, amu kagoriik pounatetap kipsengwet.”
Koguure `Jeso kasubikyik che tai
(Mar 1:16-20; Luk 5:1-11)
18Ak ye kiwendotee ngeguutap araraita ne po Galilaya, kogeer piik aeng' che tupcho, Simion ne kiguure Petero, ak Andrea ng'eetap kamet, kowiirchin regereiywot ne kiname njireenik araraita; amu ki ramiigap njireenik. 19Ak koleenji, “Obwa osubwo, si ayaak oegu ramiigap piik.” 20Ak eng' yooto, kobagaach regereiywekwak ak koosup ineendet.
21Ki ye kingo ta kowendi eng' olooto, kogeer piik aeng' alak che tupcho, Jakobo weeriitap Zebedayo, ak Johana ng'eetap kamet, komiitei moingetap peek kobooto Zebedayo kwandanywa, konabei regereiywekwak; ak koguur icheek. 22Ak ki pagaach moinget ak kwandanywa, ak koosup ineendet.
Koneetisye ak kosoobi piik Jeso
(Luk 6:17-19)
23 # Mat 9.35; Mar 1.39 Ak kiwendoti Jeso eng' Galilaya komugul, koneetisyoti eng' sinagogisyekwak ak koamdaati logoiywek che myach che po laitornatet, ak kosabooti che tinyei korotwek alak tugul ak myanwogik alak tugul eng' piik. 24Ara kiyesta ng'aleek agobo ineendet eng' Syria komugul, ak ki kimutyi `ineendet piik tugul che myandos, che ki nam korotwek ak ng'waninwek che teerchiin, che ki tinyei oik, che kitanuitos ak che ki meiyotiin poorwek; ak ki isoop icheek. 25Ak ki isup ineendet tuiyosyek che eecheen che ki punu Galilaya ak Decapolis ak Jerusalem ak Judea ak Jordan pitoniin.
Currently Selected:
MATAYO 4: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019