MATAYO 23
23
Kogerei kong' `Jeso siriik ak Pharisaik
(Mar 12:38-39; Luk 11:43, 46; 20:45-46)
1Ki mwachi Jeso anyun tuiyosyek ak kasubikyik koleenji, 2“Tebee siriik ak Pharisaik ng'echereetap Musa; 3ko uu nooto anyun, oyai kiy age tugul ne ineetook ak osup nooto; ago moyai ko uu poisyonikwak, amu ma yaei icheek tuguuk che ineeti. 4Ratei icheek lautik che nyigiisen ak ko pichiien eng' laiset ak konde tigigoigap piik; ama istoi icheeget eng' mornet agenge. 5#Mat 6.1; Kai 15.38; NKNg'a 6.8 Ago yaei poisyonikwak tugul si kogeer piik; amu yaei kotebesiitu lolotinwegap siruutik ak kobaroi tabanwegap ngoroikwak. 6Chamei icheek ole tagunoot eng' igoorwek ak ng'echerok che eecheen eng' sinagogisyek, 7chamei kagatosyek eng' ole kiyae mung'aaret, ak kogasigei ye kasei koguure piik icheek ‘Rabbi.’ 8Ago amongeguurenok ‘Rabbi,’ amu agenge Kanetindeng'wong', ak okweek tugul ko otupchosyek. 9Amoguure chii eng' ng'wony ‘abba,’ amu agenge Kwandang'wong', ineendet ne mi kipsengwet. 10Amocham keguurenok ‘kaneetik,’ amu agenge kaneetindeng'wong', Kristo nooto. 11#Mat 20.26-27; Mar 9.35; 10.43-44; Luk 22.26 Ne oo eng' kwenung'wong' koegu kiboityondeng'wong'. 12#Luk 14.11; 18.14 Age tugul ne ieetegei ko tuun kiming'ini; ak age tugul ne iming'inigei ko tuun kieeti.
Konereekyin `Jeso siriik ak Pharisaik
(Mar 12:40; Luk 11:39-42, 44, 52; 20:47)
13“Ago pwo eng' okweek, siriik ak Pharisaik, chombilik! Amu ogere piik pounatetap kipsengwet. Amu mochutei okweeget olooto, ak che machei kochut olooto ko mochamjini koba. 14Pwo eng' okweek, siriik ak Pharisaik, chombilik! Amu oame kooriigap mosoogik ak osaae saautik che kooen eng' ng'aalseenng'wong'; nooto anyun onyooru kirwooget ne siirtoot.
15“Pwo eng' okweek, siriik ak Pharisaik, chombilik! Amu olandoe araraita ak obun emet ocheeng'e owal chii kobunjook, ak ye kagobunjok, oyai ineendet koek lakweetap Gehenna konyil aeng' kosiirok.
16“Pwo eng' okweek, kandoik che oo koryotiin, che omwae ole, ‘Age tugul ne iyasyee Hekaluut koma kiy; ago age tugul ne iyasyee thahabu che po Hekaluut ko pesenindet.’ 17Okweek che oo perber ak oo koryotiin! Ngoro ne oo, thahabu anan Hekaluut ne ki itiliili thahabu? 18Ak omwae ole, ‘Age tugul ne iyasyee kaptisisyet koma kiy; ago age tugul ne iyasyee kagoochinet ne mi kaptisisyet ko pesinindet ineendet.’ 19Okweek kipkoratinik! Ngoro ne oo, kagoochinet anan kaptisisyet ne itiliili kagoochinet? 20Ara ineendet ne iyasyee kaptisisyet, koyasyee kaptisisyonooto ak tuguuk tugul che miitei yooto. 21Ara ineendet ne iyasyee Hekaluut, koyasyee olooto tiliil ak ineendet ne menyei olooto. 22#Isa 66.1; Mat 5.34 Ak ineendet ne iyasyee kipsengwet, koyasyee ng'echereetap Kamuktaindet ak ineendet ne tebee yooto. 23#A.La 27.30 Pwo eng' okweek, siriik ak Pharisaik, chombilik! Amu ogoitoi kebebertap taman ne po heduosmon, pisalik ak kamon, ak ki obagaach chooto po kamanuut che po ng'atuutik: kirwooget ak rireenetapkei ak kayaneet. Chuuto che kanyool oyai amobagaach chuun alak. 24Okweek kandoik che oo koryotiin! Ogeneni ting'wichet ak olugui tambeesyet!
25“Pwo eng' okweek, siriik ak Pharisaik, chombilik! Amu otiliili kigombet ak sanit parak, ago oriit ko nyiitaat rebisyet ak keiyandit. 26Inyee Pharisaindet ne koraat! Itiliil korook kigombet oriit, si kobiit kotiliiliit parak agine.
27 # Poi 23.3 “Pwo eng' okweek, siriik ak Pharisaik, chombilik! Amu oo kerge ak kereeriisyek che kigesal koleelagitu, che korooron iman parak eng' keeret, ago nyiitootiin oriit kawegap piik che ki kobek ak murwoonindo tugul. 28Ara ou nooto okweek ye otaagu ko uu piigap iman eng' taitap piik, ago oriing'wong' ko nyiitaat chombilisyet ak tengekto.
Nyoonei kergong'yet
(Luk 11:47-51)
29“Pwo eng' okweek, siriik ak Pharisaik, chombilik! Amu oteeche kereeriisyegap maotik ak olelesanjini kereeriisyegap che po imanda. 30Ak omwae ole, ‘Nda ki kimi eng' peetuusyegap kwanisyekyok, ta ki ma keyamdoi ak icheeget tumdaetap korotiigap maotik.’ 31Nooto obaoryanjinigei oleen oo weeriigap icheek che ki par maotik. 32Onyiit anyun kerutyetap kwanisyekwok. 33#Mat 3.7; 12.34; Luk 3.7 Erenochu, oo lagogap erenook che ng'woneen, ochilildoi ano eng' kirwoogetap Gehenna! 34Nooto anyun ayookwok maotik, piik che ng'oomen ak siriik, che alak eng' icheek ko tuun obare ak ogartoti, ak obire kipchoritiit alak eng' icheek eng' sinagogisyekwok, ak ousoti kong'etee nganaseet age agoi nganaseet age. 35#Tau 4.8; 2A.Pet 24.20-21 Ak tebee paragung'wong' korotiigap che po imanda tugul che kigetumda eng' ng'wony, kobooch korotiigap Abel ne ki po iman agoi korotiigap Zekariah weeriitap Barachiah, ne ki obar eng' kwenutap Hekaluut ak kaptisisyet. 36Amwaiwok iman ale, pwaanjin ibini tuguuchu tugul.
Koriirchin `Jeso Jerusalem
(Luk 13:34-35)
37“Ee Jerusalem, Jerusalem, ne parei maotik ak kolage koik icheek che ki kiyookyi! Ki amach konyil ata ayum lagoguk ko uu ye iyumi ngokyet aarekyik eng' kebebaikyik, ago ma ocham! 38#Jer 22.5 Ogeero, kagebagakwok koonng'wong' koek kipkuubere. 39#T.Kal 118.26 Amu amwaiwok ale, ma ogeera kogeny agoi omwa ole, ‘Iberuurot ineendet ne nyoonei eng' kainetap Kiptaiyat.’ ”
Currently Selected:
MATAYO 23: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019