MATAYO 22
22
Kalewenet agobo igoortap katunisyet
(Luk 14:15-24)
1Ki ng'alaalji Jeso icheek kogeny eng' kalewenaik, koleenji, 2“Kiyanie pounatetap kipsengwet laitoryat anum ne ki yachi weeriinnyi igoortap katunisyet. 3Ki iyookto otwogikyik koguur icheek che kiga kemwachi agobo igoortap katunisyet; ago ma cham kobwa. 4Ki iyookto kogeny otwogik alak kole, ‘Omwachi icheek che kiga keguur oleenji kachobok amitwogik. Kageeny eiik ak alak che akwaen, ak chobootiin tuguuk tugul; obwa igoortap katunisyet.’ 5Ago ma iit ng'aleekyik ak ki pa ortinwekwak, kwo age mbareennyi, kwo age poisyennyi ne po mung'aaret, 6ko che ki ng'et konam otwogikyik, konyaliil ak kobar. 7Ki nereech anyun laitoryat. Ki iyookto lugosyekyik kobar rumichooto ak kobeel nganasennywa. 8Ki mwachi anyun otwogikyik koleenji, ‘Choboot igoortap katunisyet, ago ma nyoljin kobwa icheek kiga kemwachi. 9Oba anyun ole pesyechin ortinwek, ak oguurchi igoorto tugul che konyooru. 10Ki pa anyun otwogichooto ortinwek ak koyum tugul che kinyoor, che myach ak che yaach, ak ki nyi toek kootap katunisyet.
11“Ago ye kingo mong' laitoryat kogeer toek, kogeer chiito ne ki ma ilaach ngoryeetap katunisyet; 12ak ki leenji, ‘Chorwani, kenyonunde ano ko metinye ngoryeetap katunisyet?’ Ak ki nam kuut, ma twek. 13#Mat 8.12; 25.30; Luk 13.28 Ki leenji anyun laitoryat kiboitiinik, ‘Orat ineendet eunek ak keelyek, ak owiirchi saang' ole mi mesundeito; olooto ole mi riirek ak nyeetap kelek.’ 14Amu kiguurei che chaang', ago ki leweni che ng'ering'.”
Teebut agobo kodi
(Mar 12:13-17; Luk 20:20-26)
15Ki pa anyun Pharisaik ak korwooch ole namdoi ineendet eng' ng'aleekyik. 16Ki iyookto kasubikwak kobooto che po Herodik koba ole mi ineendet, koleenji, “Kaneetindoni, kingen keele ii po iman, ak ineeti ooreetap Kamuktaindet eng' iman, ameiti chii tugul; amu megeere togoochigap piik. 17Mwaiwech anyun, Ibwaati nee inyee? Tos chamdaat eng' ng'atuutik kigoochi kodi Caesarea anan achicha?” 18Ago ki nai Jeso yaityennywa, ak kole, “Okweek chombilichu, amu nee si otyema? 19Oboorwo fedha ne po kodi.” Ak ki ipchi dinarit. 20Ak kiteebe icheek koleenji, “Itoondap ng'oo ni, ak po ng'oo siruutyet?” 21Kowol kole, “Po Caesarea.” Koleenji ineendet anyun icheek, “Ogoochi Caesarea tuguuk che po Caesarea; ak ogoochi Kamuktaindet tuguuk che po Kamuktaindet.” 22Ye kingo kas icheek niito, kokwong'yo; ki pagaach ineendet ak koba ooreenywa.
Teebut agobo ng'eetyeet
(Mar 12:18-27; Luk 20:27-40)
23 # Poi 23.8 Ki pwanji ineendet peetuunooto Sadukaik, che mwaei kole ma mi ng'eetyeetap che ki kobek; ak koteebe ineendet kole 24#NKNg'a 25.5 “Kaneetindoni, ki mwa Musa kole, ‘Ngo me chii ama tinyei lagok, kondi ng'eetap kam osotyondonooto ak kolalji maat ineendet.’ 25Ki mi kwenunnyo murenik tisabu che kitupcho; kiitunis ne po tai ak kime ama sich lakwa. Kondi osotyonnyi ng'eetap kamet. 26Ki yai ko uu nooto ne po aeng' agine ak ne po somok, agoi ne po tisap. 27Kingo keskei tugul, kome agine kobogoryondonooto. 28Eng' ng'eetyeet anyun, ko tuun punjin ng'oo osotyondonooto eng' chooto tisap? Amu kiga kotun tugul ineendet.”
29Ki wolji Jeso koleenji, “Oleele, amu mongen siruutik anan kimnateetap Kamuktaindet. 30Eng' ng'eetyeet ko tuun ma mi piik che itunisyei anan che igoitoi kitun, ago tuun kergeitu icheek ak malaikaisyek eng' kipsengwet. 31Ak agobo ng'eetyeetap piik che ki kobek koma osoman ne kimwaiwok Kamuktaindet kole, 32#Kom 3.6 ‘Aa Kamuktaindet ne po Abraham, ne po Kamuktaindet Isak ak Kamuktaindet ne po Jakobo?’ Ineendet ko Kamuktaindet ma ne po che ki kobek, ago che saptos.” 33Ak ye kingo kas tuiyosyek, kokwong'yo agobo kaneetisyennyi.
Ng'atuutyet ne oo eng' tugul
(Mar 12:28-34; Luk 10:25-28)
34Ye kingo kas Pharisaik kole kagoyai `ng'aleegap Jeso Sadukaik konamak kuut, koyumgei 35#Luk 10.25-28 ak koteebe age eng' icheek ne ki ng'amotyotap ng'atuutik, kole kotyem ineendet. 36Kile, “Kaneetindoni, ngoro ng'atuutyet ne oo eng' Ng'atuutik?” 37#NKNg'a 6.5 Ak ki wolji koleenji, “Cham Kiptaiyat Kamuktaindet ne Toroor neng'ung' eng' muguleldang'ung' komugul, eng' saboondang'ung' komugul ak eng' ng'omnateng'ung' komugul. 38Niito ng'atuutyet ne oo ak ko ne po tai. 39#A.La 19.18 Ak ne po aeng' ne kergei ak niito ko ni, ‘Cham chiitap kokweng'ung' ko uu ole ichamdoige.’ 40Tononie Ng'atuutik tugul ak maotik, ng'atuutichu aeng'.”
Teebut agobo Kristo
(Mar 12:35-37; Luk 20:41-44)
41Kingo ta koyumigei Pharisaik, koteebe Jeso icheek ng'olyoo, 42kole, “Obwaati nee okweek agobo Kristo? Weeriitap ng'oo ineendet?” Kowol icheek kole, “Weeriitap Daudi.” 43koteebee icheek koleenji, “Lyon anyun Daudi eng' kamugetap Kabuuset ne Tiliil, si koguuree ineendet ‘Kiptaiyat,’ koleen,
44 # T.Kal 110.1 ‘Ki leenji Kiptaiyat Kiptaiyandennyu,
Tebee eunnyu ne po tai,
agoi ande puuniguk
keldebesaigap keelyeguk.’
45Ngot koguure anyun Daudi ineendet Kiptaiyat, ko weeriinnyi eng' nee?” 46Ki ma imuuch age tugul kowolji ineendet ng'olyoo, ak kobooch peetuunooto agoi ko mata kogany chii koteebe ineendet ng'olyoo kogeny.
Currently Selected:
MATAYO 22: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019