MATAYO 20
20
Kalewenet agobo meek eng' mbareetap sabibuk
1“Amu kergei pounatetap kipsengwet ak chiitap ko po koot, ne kimusta karon koguur meek kobwa mbareennyi ne po sabibuk. 2Ye kingo kagoyanjin ak meechooto kogoochi dinarit agenge eng' peetuut agenge, koyookto koba mbareennyi. 3Ki manda ko neegit sait somok ak kogeer alak kotonondos eng' ye mi ole keyae mung'aaret ama tinyei poisyet. 4Ak ki leenji icheek, ‘Oba ak okweek oboisye eng' mbareetap sabibuk si agoonok ne nyolu.’ Ak ki pa anyun. 5Ki manda kogeny ko neegit sait lo ak eng' sait sogool, ak ki yai ko uu nooto. 6Ki manda kogeny olo po sait taman ak agenge, ak konyoor alak kotonondos. Ki leenji icheek, ‘Kalya si otonone oli peetuut komugul amotinye poisyo?’ 7Kowolji `pichooto ineendet kole, ‘Amu ma kuurech chii.’ Koleenji, ‘Oba ak okweekoboisye eng' mbareetap sabibuk.’
8 # A.La 19.13; NKNg'a 24.15 “Ye kingo ek koskoleny, komwachi chiitap ko po mbareetap sabibuk kiboityondennyi ne oo koleenji, ‘Guur meek si kobiit igoochi melekwekwak, itaune ne po let agoi ne po tai.’ 9Ye kingo pwa icheek che kiga kiguur ko neegit sait taman ak agenge, konyoor chii tugul dinarit agenge. 10Ara ye kingo pwa che po tai, koleen nyooru che siirei; ago kinyoor ak icheek dinarit agenge chii tugul. 11Ye kingo taach, kong'unyng'ung'ji chiitap ko po koot, 12koleenji, ‘Kabois chu po let sait agenge kityo, ak kairogenech pichooto acheek che kagibirtegei peetuut komugul eng' asiista ne ng'waan.’ 13Ago ki wolji ineendet age eng' icheek koleenji, ‘Chorwani, ma ayaun kiy ne ya; kama kiyanjine tuwai dinarit agenge? 14Nam neng'ung', ak iwe oreng'ung'. Magennyu agoochi chiichito po let ko uu ye kagoonin. 15Tos ma nyoljino ayai ne amache eng' tuguukyuk? Anan amin ng'etkong', amu aa ayiep?’ ”
16 # Mat 19.30; Mar 10.31; Luk 13.30 “Egu anyun che po let che po tai, ak egu che po tai che po let.”
Komwaei Jeso agobo meennyi
(Mar 10:32-34; Luk 18:31-34)
17Ye kitogostoi Jeso kowendi Jerusalem, komut kasubikyik chooto taman ak aeng' koba taban icheegei, ak koleenji icheek eng' ooreet, 18“Ogeero, kitogosyini Jerusalem, ak kinde Weeriitap chii eunegap tisiik che eecheen ak siriik. Kirwookyin ineendet kome, 19ak kigoito kochurachur Pororyosyek, ak kebire kipchoritiit ak kogartaat eng' kimurtoiyot. Eng' peetuutap somok king'eeti ineendet.”
Soomutyetap kametap Johana
(Mar 11:12-14, 20-24)
20Ki nyoonji anyun ineendet kametap weeriigap Zebedayo kobooto weeriikyik, ak kogutung'ji, ak kosoom ineendet kiy. 21Ak kiteebe koleenji, “Imache nee?” Kowol kole, “Ng'at ile kotebee age eng' weeriichuchuk aeng' eung'ung' ne po tai, ak age eung'ung' ne po kaataam eng' laitornateng'ung'.” 22Ago ki wol Jeso kole, “Mongen ne osoome. Omuuchi okweek oee kigombet ne neegit aee?” Kowolji icheek ineendet kole, “Kimuuchi.” 23Koleenji `Jeso icheek, “Oee iman kigombennyu, ago ketebee eunnyu ne po tai ak eunnyu ne po kaataam koma nenyu agoito, ago po icheek chooto Ki kochopchi kotabaanji Abba.”
24Ye kingo kas niito chuun tamanu, konereekyi chooto aeng' tupcho. 25#Luk 22.25-26 Ago kiguur Jeso icheek ak koleenji, “Ongen ole pounee tegeet pounigap Pororyosyek, ak kolaitoranjin `kiptainik icheek. 26#Mat 23.11; Mar 9.35; Luk 22.26 Ma uu nooto eng' okweek. Ago age tugul ne machei koek ne oo eng' kwenung'wong' koek kiboityondeng'wong'; 27ak age tugul ne machei koek ne po tai eng' kwenung'wong' koek otwogindeng'wong'; 28agot ko uu nooto ko ki ma nyo Weeriitap chii keboisyechi, ago si kobois, ak kogoito saboondanyi koek kiit ne kityage che chaang'.”
Keyatyin koonyek kipkoratinik aeng'
(Mar 10:46-52; Luk 18:35-43)
29Kingo mandoi Jeso ak kasubikyik eng' Jeriko, kosubi ineendet tuiyet ne oo. 30Ki mi kipkoratinik aeng' che ki tebyei eng' ooreet taban, ye kingo kas kole siirtoi Jeso, kowaakyo icheek ak kole, “Kiptaiyat, Weeriitap Daudi, rirenech!” 31Ki kergong' tuiyet pichooto kole kosiisyo; ago kites kowaach kole, “Kiptaiyat, ee weeriitap Daudi, rirenech!” 32Ki tonon Jeso ak koguur icheek, ak koteebe koleenji, “Omache ayaiywok nee?” 33Kowol kole, “Kiptaiyat, kimache keyatwech konyekyok.” 34Kirirge Jeso ak kitwa konyekwak. Kigeerto sainooto ak koosup ineendet.
Currently Selected:
MATAYO 20: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019