MATAYO 14
14
Pareetap Johana kabatisanindet
(Mar 6:14-29; Luk 9:7-9)
1Ki kas eng' peetuusyechooto pounindet Herod logoiywek agobo Jeso, 2ak ki leenji otwogikyik, “Ineni ko Johana kabatisanindet, kagong'eet eng' che ki kobek! Eng' niito anyun ko poisyei kimnatosyechu eng' ineendet.”
3 # Luk 3.19-20 Kiga konam `Herod Johana, korat ak konde korgoreet agobo Herodias, osotyotap Philipu ng'eetap kam. 4#A.La 18.16; 20.21 Amu ki leenji Johana ineendet, “Etaat eng' ng'atuutik obaigei ak kwonyito.” 5Nganda kimachei Herod kobar ineendet, ko ki iywei tuiyet, amu ki kiit keele ineendet ko maotyo.
6Ago ye kingo it peetuut ne po kabwaatetap sigeetap Herod, koureren cheptap Herodias eng' kween, ak ki ibaibai Herod. 7Ak ki iyasyechi Herod kogoochi kiy age tugul ne kasoom. 8Ak ye kingo kagong'ulang'ul kamet, komwa kole, “Koono metitap Johana Kabatisanindet eng' tageito.” 9Ki aragenji laitoryat ng'olyoondoni; ak amu konyit ne kiting'e icheek che kitebyei ak ineendet eng' amisyet, kong'at kigoochi; 10ki iyookto anyun keetil metitap Johana eng' korgoreet. 11Ak ki kiip metinnyi eng' tageito, kigoochi chebooto; ak ki ipchi chebooto kamet. 12Ki pwa anyun kasubikyik, koip muusto ipkotup; ak ki pa komwachi Jeso.
Kobaei `Jeso piik
(Mar 6:45-52; Jhn 6:15-21)
13Ye kingo kas Jeso, kwo kolaany moingetap peek, ak kwo agoi surkwen kotabaangei. Kingo kas tuiyosyek koosup ineendet kobun keelyek kong'eetyee nganasook che eecheen. 14Ak kingo mong' kogeer tuiyet ne oo, ak ki riiree icheek, ak kosaap piikwak che ki myandos.
15Eng' koskoleng'unooto, kobwonji kasubikyik koleenji, “Surkwen koroni, ak kagoimen; mete tuiyet koba nganasook, si koaljigei amitwogik.” 16Ago ki leenji Jeso, “Ma nyooljin koba, ogoochi icheek kiy ne amei.” 17Ak ki leenji, “Ki tinyei eng' yu magatiinik muut ak njireenik aeng' kityo.” 18Koleenji, “Oibwa.” 19Ki ng'at tuiyosyek kotep ng'wony eng' susweek. Ki inam magatinichooto muut ak injirenichooto aeng' ak konyal kipsengwet ak koberuur. Kibuutul ak kogoochi kasubikyik magatiinichooto, yeityo kogoochi kasubik tuiyosyek. 20Ki amis tugul kot kobiyong'so, ak ki iyum katuganik che ki nyi kereboonik taman ak aeng'. 21Icheek che ki amis ko ki neegit murenik eliphuusyek muut ama kiit kobogorisyek ak lagok.
Kobunei Jeso araraita parak
(Mar 6:45-52; Jhn 6:15-21)
22Ak ki ichirchir eng' yooto kasubikyik kolaany moingetap peek, ak koba pitoniin kondoe ineendet, ye kita koyomisi tuiyosyek koba. 23Ak kingo kagoyomis tuiyosyek koba, kotogosta ineendet tulweet kwo kosa: ak koimenji olooto komi ineegei. 24Ago kigaiit moinget peek kween, kolungulgei eng' mildaetapkei ne po peek; amu ki kirindoi icheeget usoonet. 25Ak eng' riipseet ne po ang'wan ne po kemoi kwo ole mi icheeget, kobunei araraita parak. 26Ak ye kingo keer kasubikyik ineendet kobunei araraita parak, koiyweis, ak kole, “Tamirmir ni!” Ak kowaach amu kaiyweisyet. 27Ago ki ng'alaalji Jeso icheek eng' yooto koleenji, “Onyiganitu; anee; amoiyweisye.” 28Ak ki wolji Petero koleenji, “Kiptaiyat, ngo inyee, ing'ata anyoonjin abun peek parak.” 29Ak ki le, “Nyoo.” Ak kichoortagei Petero eng' moingetap peek, kobun peek parak kwo ole mi Jeso. 30Ago ye kingo keer usoonet, koywei; ak ki neegit kolis peek kowaach kole, “Kiptaiyat, sarwo!” 31Ak eng' yooto koito Jeso eunnyi konam ineendet ak koleenji, “Ee inyee ne tinyei kayaneet ne ming'in, kalya si isage?” 32Ak ye kingo kagolaany icheek moinget, kosiis usoonet. 33Ak ki ilas ineendet icheek che ki mi moinget, kole, “Iman ii Weeriitap Kamuktaindet.”
Kosoobi `Jeso che ki myandos eng' Genesaret
(Mar 6:53-56)
34Ak ye kingo kagolanda, koit emetap Genesaret. 35Ak ye kingo nai piigap koronooto ineendet, koyookto emonooto komugul komutyi ineendet tugul che ki myandos; 36ak ki igaigai ineendet kole kotwa agot tabandap ngoryennyi: ak kisopchi tugul che kitwa.
©Bible Society of Kenya, 2019