MATAYO 13
13
Kalewenet agobo kolindet
(Mar 4:1-9; Luk 8:4-8)
1Ki wo Jeso peetuunooto komanda eng' koot ak kwo kotebee ngeguutap araraita. 2#Luk 5.1-3 Ki iyumjigei ineendet tuiyosyek che eecheen kot koit kolaany moingetap peek ak kotep ng'wony, ak ki ng'et tuiyet komugul eng' ngeguut. 3Ki mwachi icheek tuguuk che chaang' eng' kalewenaik koleenji, “Ogas o! Ki wo kolindet koleeta 4ak kingo ta koletoi, kobutyi kesweek alak tabandap ooreet, ak ki pwa toriitik ak koam. 5Ki ibutyi alak ole mi koik, ole ki ma kotinyei ng'ung'unyek che chaang' ak ne matyaniit kobiityo amu ki ma kotya ng'ung'unyek. 6Kingo chor asiista, kolalyo ak koresyo amu ki ma kotinyei tigitik. 7Ki ibutyi kesweek alak ole ki mi katook, ak ki piityo katook ak kogiich. 8Ki ibutyi alak ng'ung'unyek che myach, ak koiyo logoek, alak pogol, alak tamanwogik lo, ak alak sosom. 9Ineendet ne tinyei itiik che kastoi, kogas.”
Kalewenaik
(Mar 4:10-12; Luk 8:9-10)
10Ki pwa kasubik ak koleenji, “Kalya si ing'alaalji icheek eng' kalewenaik?” 11Kowolji koleenji, “Kagegoonok onai ung'ootik che po pounatetap kipsengwet, ago ma kigoochi icheek. 12#Mat 25.29; Mar 4.25; Luk 8.18; 19.26 Amu age tugul ne tinyei, ko tuun kigoochin si konyoor che chaang' kosiir; ago age tugul ne ma tinyei, kereben agot che katinyei. 13Ang'alaaljini eng' kalewenaik amu nganda keertoi koma keerei kiy, ak nganda kastoi, koma kasei kiy anan koguiyo. 14#Isa 6.9-10 Isuldaat eng' icheek maonateetap Isaiah ne leen,
‘Eng' kaseet ko tuun ogase, ago moguitosi,
ak eng' keeret ko tuun ogeere, ago mobestosi agot kitigin.
15Amu kwalilenotin mugulelwegap pichu,
ak ma kastoi komyee iitiikwak,
ak ki kogeer konyekwak,
si ma keer eng' konyekwak,
anan kogas eng' iitiikwak,
anan koguiyo eng' mugulelwekwak,
si koweek kogeny
ak asoop icheek.’
16 # Luk 10.23-24 “Ago iberuurotin konyekwok, amu keertoi, ak iitiikwok, amu kastoi. 17Amwaiwok iman ale, ki machei maotik che chaang' ak piigap imanda kogeer tuguuk che ogeere, ago ki ma keer; ak kimachei kogas ng'aleek che ogase, ago ki ma kas.
Kalewenetap Kolindet
(Mar 4:13-20; Luk 8:11-15)
18“Ogas anyun okweek kalewenet ne po kolindet. 19Ye kasei chii age tugul ng'olyootap laitornatet ama iguiyo, ko nyoonei anyun ineendet ne ya ak korebee ne kagagelechi muguleldanyi. Niito ne ki kilechi tabandap ooreet. 20Nooto ne ki kilechi ole mi koik, ko ineendet ne kasei ng'olyoot ak kotaach eng' poiboiyet, 21ago amu ma tinyei tigitik ineendet, ko tebyei ne matya, ak ye kanyo nyalilda anan usiisyet agobo ng'olyoot, kinach anyun ineendet. 22Nooto ne ki kilechi ole mi katook, ko ineendet ne kasei ng'olyoot ak kogiich kererwegap met che po ng'wony, ak kaberberisyet ne po mogornateet, si mai. 23Ne ki kilechi ng'ung'unyek che myach, ko ineendet ne kasei ng'olyoot ak koguiyo, ne yiei logoek iman, alak pogol, alak tamanwogik lo, ak alak sosom.”
Kaneetisyet agobo Chemulbai
24Ki mwachi kalewenet age koleenji, “Kergei pounatetap kipsengwet ak chiito ne ki koolji kesweek che myach mbareennyi, 25ago ye kita koruitos piik, konyo punyondennyi ak kogoolji chemulbainik ole mi peek, ak kwo. 26Ago ye kingo piityo minutik, ak koi peek, kotook ak icheek chemulbainik. 27Ki pwa otwogik che po chiitap koot ak koleenji, ‘Kiptaiyat, ki ma igoolji kesweek che myach mbareeng'ung'? Ki pun ano chemulbainik?’ 28Kowolji koleenji, ‘Kiyaei nooto puunyoot.’ Koleenji otwogik, ‘Tos imache keebe kitutote?’ 29Ago ki leenji, ‘Achicha, si ma ye otuti chemulbainik, otutunde peek. 30Ingobiityo tugul agoi kesisyet, ak eng' peetuutap kesisyet, ang'at kesik si koyum korook chemulbainik ak korat ratuutik si kebeel, yeityo koyumji chogennyu peek.’ ”
Kalewenet agobo keswoot ne ming'in
31Ki mwachi kalewenet age koleenji, “Kergei pounatetap kipsengwet ak keswootap karadali, ne ki ip chiito ak komiinji mbareennyi. 32Ming'in iman eng' kesweek tugul, ago ye kagoeet, ko oo kosiir minutik tugul che po mbar, ak egu keetit ne tebee toriitik mooriikyik.”
Kalewenet ne po laitornatetap kipsengwet
(Luk 13:20-21)
33Ki mwachi kogeny kalewenet age koleenji, “Kergei pounatetap kipsengwet ak mermereek che ki nam kobogoryot, ak koburukto peek che ng'ootiin che po kitongok somok, agoi kogut tugul.”
Kaneetisyet eng' kalewenaik
(Mar 4:33-34)
34Ki mwachi Jeso tuiyosyek tuguuchuuto tugul eng' kalewenaik; ki ma ng'alaalji icheek ama eng' kalewenet 35#T.Kal 78.2 si kosulda ne ki kamwa maotyot kole:
“Ayaate kutinnyu eng' kalewenaik;
amwae tuguuk che ki kiuny kobooch koga kelumda ng'wony.”
Kiaroru agobo chemulbainik
36Ki pagaakta anyun tuiyosyek, ak kwo ko. Ki pwanji kasubikyik ak koleenji, “Iarorwech agobo kalewenetap chemulbainigap mbar.”
37Ki wolji kole, “Ineendet ne kileta kesweek che myach ko Weeriitap chii, 38ak mbareet ko ng'wony. Kesweek che myach ko weeriik che po laitornatet, ak chemulbainik ko weeriitap ineendet ne ya. 39Puunyoot ne ki koolei chemulbainik ko chesawilyet. Kesisyet ko kagesunetap ng'wony ak kesik ko malaikaisyek. 40Ko uu ye kiyumi chemulbainik ak kebeel eng' maat, ko egu ko uu nooto eng' kagesunetap ng'wony. 41Iyooktoi Weeriitap chii malaikaisyekyik, koba koyum komang'une laitornateennyi, tuguuk tugul che inachi piich, ak icheek che yaei tengek, 42ak kowiirchi maat ne oo, ole tuun mi kateeiyet ak nyeetap kelek. 43Iluu anyun che po imanda ko uu asiista eng' laitornatetap Kwandanywa. Ineendet ne tinyei iitiik, kogas.
Pounatetap kipsengwet
44“Kergei pounatetap kipsengwet ak kiy ne po kamanuut ne ung'aat eng' mbar ne kinyoor chii ak kouny. Ki wo kogasategei ak koalda tugul che ki tinyei si koale mbaranooto.
Kiaroru agobo chemung'araiya
45“Kogeny, kergei pounatetap kipsengwet ak chemung'araiya ne cheeng'ei sonoek che korooron, 46ak ye kingo kagonyoor sonoiyat agenge ne po alyet ne oo, kwo koalda tugul che ki tinyei ak koale sonoiyandanooto.
Kiaroru agobo regereiywot
47“Kora, kergei pounatetap kipsengwet ak regereiywot ne kiname njireenik, ne ki kiwiirchi araraita ak koyum injiren tugul che teerchiin. 48Ye kingo kagonyi, kochuut konyo ngeguut ak kotep ng'wony. Ki iyumji che myach kitongok ak kolakta che yaach. 49Egu ko uu nooto eng' kagesunetap ng'wony. Tuun pwoonei malaikaisyek koobeesyo che yaacheen eng' kwenutap che po imanda, 50ak kowiirchi maat ne lalei, ole tuun mi kateeiyet ak nyeetap kelek.”
Konorwetap tuguuk che leelach ak che po keny
51“Kaoguiye tuguuchuuto tugul?” Kowol kole, “Ee.” 52Koleenji anyun, “Ko uu nooto anyun, siriindet age tugul ne ki kineet komyee ng'aleegap pounatetap kipsengwet, ko kergei ak chiito ne po koot, ne inemu tuguuk che leelach ak che po keny eng' ole konoree tuguukyik che po kamanuut.”
Keesyoi Jeso eng' Nazaret
(Mar 6:1-6; Luk 4:16-30)
53Ye kingo kagogees Jeso kalewenaichu, kwo eng' olooto. 54Ki it nganaseennyi ne po kaa, ak konaam koneet icheek eng' sinagoginnywa kot ko kwong'yo ak kole, “Kanyoorunee ano chiichi utaatyoni ak poisyonichu kiimeen? 55Tos ma weeriitap musogindet ni? Ma kiguure kamet Maria ak weeriik che tupcho ko Jakobo, Joseph, Simion, ak Judas? 56Tos ma mi chepkametwagik tugul kobootech? Ki nyoorunee ano anyun chiichi tuguuchuuto tugul?” 57#Jhn 4.44 Ki inach icheek ng'aleekyik. Ago ki leenji `Jeso icheek, “Nyooru maotyo teegis, kobatee eng' emennyi, ak eng' koonnyi.” 58Ma yai kwang'utik che chaang' eng' olooto amu pistoennywa.
Currently Selected:
MATAYO 13: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019