JEREMIAH 8
8
1Mwaei anyun Kamuktaindet ne Toroor kole, ki ibu eng' peetuunooto kawegap laitorinigap Judah, kawegap pounikyik, che po tisiik, che po maotik ak che po che menyei Jerusalem, komang'une kereeriisyekwak. 2Kimaae eng' asiista ak eng' arawet ak eng' taitap tuguuk tugul che po kipsengwet, che kiga kocham, che kiga koot, che kiga kosubot, che kiga kocheeng'at ak che kiga kolas. Ma kiyumi anan ketup, ago egu keturek eng' emet. 3Igaigai kolewen meet kosiir sabeet piik tugul che ng'etu, che ng'etune koiito ya, che ng'etu eng' komoswek tugul che ki aoonji, mwaei Kamuktaindet ne Toroor ne po lugoosyek. 4Imwachini kogeny ileenjini, “Mwaei Kamuktaindet ne Toroor kole,
Tos ibutos piik ama ng'eetos kogeny?
Tos wo chii ama weeksei?
5Amu nee anyun si kochuchuigei pichu po Jerusalem eng' kachuchuget ne po agoi?
Namei miising' ng'aalseet, eesyoi koweek.
6Ki aep iit agas, ago ma ng'alaal icheek che po iman.
Ma mi chii ne sigu eng' yaityennyi,
kole, ‘Koyai nee?
Isubi chii tugul ooreennyi,
ko uu paraisiit ye labati kochutei lugeet.
7Ee, ingen kong'wonyot eng' soet peetuusyekyik;
ak riibei cheptuget ak kibiswet ak cheptalamyat peetuusyekwak che pwonune,
ago ma ingen piikyuk ng'atuutyetap Kamuktaindet ne Toroor.’ ”
8Omuktoi ano anyun omwa ole,
“Ki utaatiin,
ak oleen, ki tinyei ng'atuutyetap Kamuktaindet ne Toroor?
Ago, ogeere iman ole ki koyai ng'aalseet kalamitap kaberberisyet ne po Siriik.
9Ki teweeri piik che utaatiin,
Aragendos ak kenamei icheek.
Kigoesyo ng'olyootap Kamuktaindet ne Toroor,
Ara anyun tinyei ng'omnateet ne uu nee?
10 # Jer 6.12-15 Agoochini anyun piik alak osotikwak,
ak agoochi mbareenikwak piik che namei kobunji,
amu kobooch ne ming'in agoi ne oo,
kotinyei age tugul kasetap myat,
ak yaei age tugul kaberberisyet kobooch maotyot agoi tisiindet.
11 # Ezk 13.10 Ak kigonya moogap piikyuk kobir parak,
koleenjin, ‘Kaalyeet, kaalyeet,’
ye ma mi kaalyeet.
12Tos ki ililanso ye kingo yai tuguuk che kiwechei?
Achicha, ma ililanso agot kitigin,
ama walogis togoochikwak.
Tuun ibutos anyun icheeget kobooto chooto ki ibutyo.
Tuun ki wiirtoi icheek eng' peetuut ne kibirei,
mwaei Kamuktaindet ne Toroor.”
13Ageesu icheek,
mwaei Kamuktaindet ne Toroor.
Ma ng'etu sabibuk eng' keetiik,
ama ng'etu logoek eng' mogoonik ak koresyo sogeek,
ak kobetyo eng' icheek tuguuk che kiga koochi.
14Amu nee si ketebi ak kesistosi?
Oyumgei ak ongebe nganasook che riibootin,
ak kesisye eng' olooto.
Amu kagoonech Kamuktaindet ne Toroor, Kamuktaindennyo kesisye,
ak kogoonech peegap kipsegetetyet kee,
amu kigeyachi Kamuktaindet ne Toroor tengekto.
15Ki kigen kaalyeet, ago ma nyo kiy ne myee,
ki kigen peetuutap kasoobet,
ak ki piit arageneet!
16Kigasei eng' Dan waagaatap seruunegap paraisisyekyik.
Potani emet komugul amu cheetap kateetap chechiik che kiimeen,
amu kagobwa ak kagoam emet kobooto tuguuk tugul che kami,
nganaseet kobooto che menyei oriit.
17Ogeer anyuno, ayoogu ndarok,
erenook che ma kigoigoi kobwa kwenung'wong',
si kosusak,
mwaei Kamuktaindet ne Toroor.
Aragenetap Jeremiah
18Kata myee agaigaige si ma kase arageneet,
tanui muguleldanyu.
19Ogas kutitap riiregap piikyuk eng' emet ne loo miising',
tos ma mi Kamuktaindet ne Toroor Zion?
Tos ma mi Laitoryatap nganasanooto olooto?
Amu nee anyun si kotacha kot anereech eng' kanamonikwak che kiwaei,
ak tuguuk che teer che po puch?
20Kagosiirto kesisyet, kagogeskei kemeut,
ago tomo kesarwech.
21Ki kiguotena amu kaguotenetap piikyuk.
Aa tuui, ak kaakwong' miising'.
22Tos ma mi mwanik che ki inyaise Gilead?
Tos ma mi chepkerichoon olooto?
Amu nee anyun si ma sap cheptap piikyuk?
Currently Selected:
JEREMIAH 8: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
