KIRWOOGIK 15
15
Koterteeri `Samson Philistiik
1Ago kingo pata peetuusyek alak, eng' peetuusyegap kesisyetap nganuuk, korutoochi Samson osotyonnyi, kogetyin aarwetap ng'oroor. Ki le ineendet, “Awendi ko ole mi osotyondennyu.” Ago ma chamji ineendet kwo ko kwandap osotyondonooto. 2Ki le kwandap osotyondonooto, “Ki aleen ki iwech ineendet iman; nooto anyun, ki agoite ineendet kotun chorweng'ung'. Tos ma karaaran chepkamet ne ming'in kosiir ineendet? Asoomin ale imut nooto ne kata imuti ineendet.” 3Ki leenji `Samson icheek, “Masiche leluut rani eng' Philistiik ye ayachi yaityet.” 4Ara ki wo Samson ak konam lelwek pogol somok, ki nam kegenganik ak ki chop lelwek kotuktoochi patai, koratyi anyun kegenget katutaichooto aeng' eng' alak tugul. 5Kingo kagonde maat kegenganichooto kounda koba ole mi peegap Philistiik che tomo koges, ak kobeel peek che ki kiyum kotononso ak che tomo keges, kobooto mbareenigap mseituni ak icheek. 6Koteep anyun Philistiik, kole, “Ng'oo ne kayai kii?” Ak ki le icheek, “Samson, sandetap Timnaindet, amu kirebe osotyonnyi ak kogoochi chorwennyi.” Ki togosta anyun Philistiik, ak kobeel osotyondonooto ak kwandanyi eng' maat.
7Koleenji `Samson icheek, “Ngot ko koayai ko uu ni, ayaaktochinigei mugetuut iman eng' okweek, ak ye ibata, asiis.” 8Ki par icheek komugus eng' pareet ne oo. Yeityo kochoortagei kwo komeny ole kibetak eng' rwandetap Etam.
9Ki togosta anyun Philistiik ak koteech Judah, ak koyom komoswegap Lei. 10Ki le piigap Judah, “Amu nee si otogosu obokyech?” Ak ki le, “Kagitogosu kebwa kerat Samson, keyachi ineendet ko uu ye koyaiywech.”
11Ki choortagei anyun piik eliphuusyek somogu che po Judah koba ole kibetak eng' rwandetap Etam, ak koleenji Samson, “Mengen ile poiywech Philistiik? Nee anyun kii koiyaiywech?” Ak ki leenji icheek, “Ko uu ye ki yaiywo ko ki ayachi icheek ko uu nooto.” 12Ak ki leenji `icheek ineendet, “Kagichooruge kebwa keratin, si kobiit kigoiten iwe eutap Philistiik.” Ak ki leenji Samson, “Oyosyeiwo, ole mobara okweeget.” 13Ki mwachi ineendet koleenji, “Achicha, kibwane keratin kityo ak kigoiten iwe eunekwak; ago ma kibarin, iman.” Kirate anyun rogoosyek aeng' che leelach, ak komut kotogos eng' rwandet.
14Kingo it Lei, kowaakyo Philistiik ko katuiyo ak ineendet. Ki nyoonji ineendet `Kabuusetap Kamuktaindet ne Toroor eng' kimnateet ak ki igei rogoosyek che ki mi eunekyik, katanit ne kabeel maat, ak ki ibutyo eng' eunekyik tuguuk che kiga kirate. 15Ki nyoor anyun kowetap tagilgilyetap sigiryet ne tomo koyaam, ki inem ak kobare piik eliphuut. 16Ak ki le Samson,
“Eng' kowetap tagilgilyetap sigiryet,
karurugutik eng' karurugutik,
eng' kowetap tagilgilyetap sigiryet
ko kabar piik eliphuut.”
17Kingo kagogees ng'alaalanooto, kowiirta kowonooto po tagilgilyet ne kami eunnyi; ak ki kiguure yooto Ramat-lei.
18Ak ye ki ame melelda ne oo, kogiguur Kamuktaindet ne Toroor, koleenji, “Kaigoonu saruunoni oo eng' eutap otwogindeng'ung'; ak nguno, amee eng' melelda, si abutyi eutap che ma kimuratan.” 19Ago ki pet Kamuktaindet ne Toroor ole ki mi keriinget eng' Lei ak ki mang'une peek yooto; ak kingo kagoee koweek Kabuusennyi kogeny, ak kisop. Ki kiguure kainetap yooto anyun En-hakore, ne miitei Lei agoi rani.
20Ki irwookyi `Samson Israel kenyiisyek tiptem eng' peetuusyegap Philistiik.
Currently Selected:
KIRWOOGIK 15: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
