KIRWOOGIK 1
1
Piigap Israel kingo pata meetap Joshua
1Kingo pata meetap Joshua, koteepse `piigap Israel Kamuktaindet ne Toroor kole, “Ng'oo ne tai ne togostoi si kobargei ak Kanaanik agobo acheek?” 2Kole Kamuktaindet ne Toroor, “Judah ne togostoi. Ogeero, kande emonooto eunnyi.” 3Ki leenji `Judah tupchennyi Simion, “Ngetogoste tuwai si kobiit kebargei ak Kanaanik che menye emet ne ki kigoono; si tuun keebe tuwai agane emeng'ung'.” Koba anyun Simion ak ineendet. 4Ki togosta anyun Judah ak ki inde Kamuktaindet ne Toroor eunekwak Kanaanik ak Perisik. Ki par piik eliphuusyek taman eng' Besek. 5Ki nyoor `icheek Adoni-besek eng' Besek, ak ki ibookyi ineendet ak koterteer Kanaanik ak Perisik. 6Ki mwei Adoni-besek; ago ki oon ineendet ak ki nam ak kotil moriikyik che eecheen che po eunek ak che po keelyek. 7Ki mwa Adoni-besek kole, “Ki iyum amitwogik eng' kurereetap mesennyu laitorinik tamanwogik tisabu che kiga kitil morikwak che eecheen che po eunek ak che po keelyek; ko uu ye ki ayai, ko kayaiywo Kamuktaindet ko uu nooto.” Ki imut `icheek ineendet kwo Jerusalem, ak ki mechi olooto.
8Ki ibookyi `lagogap Judah Jerusalem ak konam. Kibare rotwetap chok ak kobeel nganaseet eng' maat. 9Kingo pata, kochoortagei lagogap Judah kobargei ak Kanaanik che ki menyei emetap tuloonook, murot tai ak eng' warenget. 10Kibargei Judah kora ak Kanaanik che ki menyei Hebron, ne ki kiguure eng' tai Kiriath-arba, ak ki par Sesai, Ahiman ak Talmai.
11Ki wo eng' yooto kobargei ak piik che ki menyei Debir. Kainetap Debir eng' tai ko ki Kiriath-sepher. 12Ki mwa Kaleb kole, “Ineendet ne parei Kiriath-sepher ak konam, agoochini Achsah cheptonyu kotun.” 13Ki nam nganaseet Othniel weeriitap Kenas, ng'eetap kamet ne ming'in ne po Kaleb. Ki igoochi anyun `Kaleb Othniel cheptonyi Achsah koek kwondonyi. 14Kingo nyo Achsah ole mi Othniel, kogaigai ineendet kosoom kwandanyi kooret. Ye kingo choorugei Achsah eng' sigiryennyi, koteebe `Kaleb ineendet koleenji, “Imache nee?” 15Kole ineendet, “Koono kaberuret; amu ki igoono emet ne po Murot Tai, ko koono kora kong'igap peek ak icheek.” Ki igoochi Kaleb ineendet kong'igap peek che mi ole togostaat ak che mi ole rektoot.
16Ki togosta lagogap Kenindet, kabyugoitap Musa, komanda eng' nganaseetap sosik kobooto lagogap Judah ak koba surkwen ne po Judah eng' Murot Tai ne po Arad, ak koba komeng'iis ak pichooto. 17Ki pa Judah ak Simion ng'eetap kamet, ak koterteer Kanaanik che ki menyei Sepat, ak king'em kogees. Ak ki kiguure kainetap nganasanooto Horma. 18Ki nam Judah nganasoogap Gasar, che po Askelon ak che po Ekron kobooto kiwotosyekwak. 19Ki mi Kamuktaindet ne Toroor kobooto Judah, ak ki nam emetap tuloonook. Ki ma imuuch koon piik che ki menyei atebweet, amu ki tinyei kariisyegap kariik. 20#Jos 15.13-14 Ki kigoochi Kaleb Hebron ko uu ye ki kamwa Musa, ak ki oon eng' olooto weeriik somok che po Anak. 21#Jos 15.63; 2Sam 5.6; 1A.Pet 11.4 Ma oon `lagogap Benjamin Jebusik che ki menyei Jerusalem; ko uu nooto, kogimeng'iis Jebusik kobooto lagogap Benjamin eng' Jerusalem agoi ra.
22Ki pa kotogosta che po kootap Joseph ak icheek kobargei ak Bethel, ak ki mi Kamuktaindet ne Toroor kobooto icheek. 23Ki iyookto che po kootap Joseph piik koba kosegei Bethel. Kainetap nganasanooto eng' tai ko ki Luz. 24Kingo keer segeik chiito ne ki mang'une nganaseet, koleenji, “Kisoomin iboorwech ole kibunei kebendi nganaseet oriit si tuun kerirenen.” 25Ki iboorchi ole kibunei kechutei nganaseet ak ki par nganaseet eng' rotwetap chok. Ki pagaakta chiichooto ak koonnyi tugul kobechigei. 26Ki wo chiichooto emetap Hitik ak koteech nganaseet, yeityo koguure kainetap nganasanooto Luz, ne kainennyi agoi ra.
27 # Jos 17.11-13 Ma oon Manasseh meng'iigap Beth-shean ak nganasookyik, Taanak ak nganasookyik, Dor ak nganasookyik, Ibleam ak nganasookyik anan meng'iigap Megiddo ak nganasookyik, ago ki testai Kanaanik komeny emonooto. 28Kingo kagogimegitu Israel, konde Kanaanik koyai poisyonigap otwoknateet, ama oon icheek kogestagei.
29 # Jos 16.10 Ma oon Ephraim agine Kanaanik che ki menyei Gezer, ak ki testai Kanaanik komeny kwenunnywa.
30Ma oon Zebulun piik che ki menyei Kitron anan che ki menyei Naalal. Ki testai Kanaanik komeny kwenunnywa ak koek che yaei poisyetap otwoknateet.
31Ma oon Asher piik che ki menyei Ako, che po Sidon, che po Alap, che po Aksip, che po Helba, che po Aphik anan ko che po Rehob. 32Ago kimeng'iis Aserik eng' kwenutap Kanaanik che ki menyei emonooto, amu kimaon icheek.
33Ma oon Naphtali meng'iigap Beth-shemesh, anan ko che ki menyei Beth-anat, ago ki meny kwenutap Kanaanik che po emonooto. Ki ek piik che ki menyei Beth-shemesh ak che po Beth-anat che yaei poisyonigap otwoknateet.
34Ki toorta `Amorik lagogap Dan koweekyi emetap tuloonook, ak ma chamji korek kobwa atebweet. 35Kimach Amorik komeny tulweetap Heres eng' Aijalon, ak eng' Saalbim, ago ki iterteeris kootap Joseph, ak ko konam pichooto koyai poisyonigap otwoknateet. 36Ki wo kiwotetap Amorik kong'etee ole togosyin Akrabbim kot koit Shelah ak kotogosta.
Currently Selected:
KIRWOOGIK 1: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
