ISAIAH 8

Kaboorunet agobo Maer-salal-hasbas

1Ki leenjo Kamuktaindet ne Toroor, “Ipchigei kiit ne oo ne kisirei, ak isire kalamitap chiito, ‘Agobo Maer-salal-hasbas’; ”#8:1 Maer-salal-hasbas: Kaguiyennyi ko luulei-kochokyin-chaaktae-parunenik. 2si kobiit acheeng'jige paorinik che kiyani, kosiir tuguuk che piitu, Uriah tisiindet, ak Zekariah weeriitap Jeberekia. 3Ki awe anyun ye mi chebyoset ne maotyo; ak ki manach, ak kosich weeriit. Ki leenjo Kamuktaindet ne Toroor anyun, “Tochi kainennyi Maer-salal-hasbas. 4Amu kotom komuuch lakwanooto kotwek kole, ‘Abba’ anan ‘Eiyo,’ koluulei laitoryatap Assyria mogornatosyegap Damasko ak parunenigap Samaria.”

Kamuktaindet ne Toroor ak puunigap Judah

5Ki ng'alaalwo Kamuktaindet ne Toroor kogeny, kole, 6“Amu ki eesyo pichu peegap Siloa che rootei mutyo, ak koboiboitune Rezin ak weeriitap Remaliah; 7ara anyun, ipchin Kiptaiyat icheek peegap aineet, che chaang' che kiimeen, nooto ko laitoryatap Assyria kobooto toroornatennyi tugul; ak kotogosyi ineendet ainoosyekyik tugul, ak kosiir ngeguusyekyik tugul; 8ak kobokto kwo Judah, ak koyom kosiir olooto, nyiei kot koit kaatit; ak konyiiei kaiitoetap kebebaikyik tebeesindap emeng'ung', ee Immanuel.”

9Owaach, ee pororyosyechu, si kobiit ketonatonak;

ak oep iit, ee okweek tugul che oo po emotinwek che looen;

ogermenge, si ketonatonak;

ogermenge anyun, si ketonatonak.

10Orwooch tugul, ago egu puch;

omwa ng'olyoot, ama tononi,

amu mi Kamuktaindet kobootech.

Kateunet ne po maotyot

11Amu ki ng'alaalwo Kamuktaindet ne Toroor ko uu nooto eng' euut ne kiim, ak kotigoono si ma wendate ortinwegap pichu, kole: 12#1Pet 3.14-15 “Amomwa ole, Chaamset, agobo tugul che mwaei pichu kole, chaamset; amoiywei kiit ne iywei icheeget, anan oaragen. 13Amu Kamuktaindet ne Toroor ne po lugoosyek ineegei ne ogonyiti; ak ingoek ineendet ne oiywei, ak koek ineendet ne koonok oiyweisye. 14#1Pet 2.8 Ak koek ineendet ole-tiliil; ago egu koita ne inachi piich ak rwandet ne riichei piich eng' kooriik tuwai che po Israel, koek mesteet ak mesteet age ne teer eng' piik che menyei Jerusalem. 15Kinachi che chaang' eng' olooto, ibutos ak koilyo, kiname mesteet ak kimut.”

16Rat anyun paornateet, ng'ooch ng'atuutik eng' kwenutap kasubikyuk. 17#Heb 2.13 Si agen Kamuktaindet ne Toroor, ne unyei togeennyi si ma keer kootap Jakobo, ak amang'u ineendet. 18#Heb 2.13 Ogeero, anee ak lagok che ki koono Kamuktaindet ne Toroor ko ki kaboorunoik ak kwang'utik eng' tugul, che punu Kamuktaindet ne Toroor ne po lugoosyek, ne menyei tulweetap Zion. 19Ak ye mwaiwok kole, “Ocheeng'ate icheek che poisyee oik ak pooniik che twegu ko uu toriitik ak che nyeanyei ng'aleek.” Tos nyoljin kocheeng'at che ki kobek agobo che saptos? Tos ma nyooljin piik kocheeng' Kamuktaindennywa? 20Onamge ak ng'atuutik ak paornateet! Ngot koma ng'alaal icheek koosup ng'olyoondoniito, ko amu ma mi lapkeiyet eng' icheek.

21Tuun siirtoe yooto, konyalildos ak koamei rubeet, ak ye tuun kaam rubeet, konereekso ak kosas laitoryannywa ak Kamuktaindennywa, ak konyal parak; 22ak kogeer ng'wony, ago ogeero, mi pichiindo ak mesundeito, mesundeito ne po ndara; ak keonji icheek mesundeito ne oo.

Currently Selected:

ISAIAH 8: KAPR

Highlight

Copy

Compare