TAUNET 37

Karwotitaosyegap Joseph

1Ki meny anyun Jakobo emetap Kanaan ole kitoo kwan. 2Chu ortinwegap Jakobo. Kiga koit Joseph kenyiisyek taman ak tisap ye ki iyagoti akweetap kerichek kobooto tupchosyekyik. Ki mi weerooto kobooto weeriigap Bila, ak weeriigap Silba, kwonyiigap kwandanyi, ak ki ibu ineendet ng'aleekwak che yaacheen komwachin kwandanywa. 3Ki chamei anyun `Israel Joseph kosiir weeriikyik tugul, amu kisichei ko kagoosit, ak kinapchi ngoryeet ne kooi ne poochin eunek. 4Ago ye kingo keer weeriik che tupcho kole chamei kwandanywa ineendet kosiir icheek tugul, kowech miising' kot ko mata kocham kong'alaalji ineendet eng' kaalyeet.

5Ki irwotyi Joseph karwotitoet, ak ye kingo mwachi weeriik che tupcho, ko kites icheek kowech ineendet kosiir. 6Ki leenji icheek, “Kaigai ogas karwotitaoni koarwotyi: 7Ogeero, ko ki rate peek che mi ak mobeek eng' mbar, ak kong'eetyo peekyuk che koarat kotononso, yeityo koyiem peekwok che koorat peek chechuuk ak kong'uruukyi.” 8Koleenji weeriik che tupcho, “Ileen tos tuun ilaitoranenech? Anan tos tuun iboiywech?” Ki tes anyun kowech ineendet kosiir amu karwotitaosyekyik ak ng'aleekyik. 9Ki irwotyi karwotitoet age kogeny, ak komwachi tupchosyekyik koleenji, “Ogeero, koarwotyi kogeny karwotitoet: koing'uruukyoo asiista ak arawet ak kecheik taman ak agenge.” 10Ago ye ki mwachi kwandanyi ak weeriik che tupcho, ko ki kergong' kwandanyi ineendet ak koteebe koleenji, “Nee karwotitaoni koirwotyi? Tos king'uruukyin agoi ng'wony iman agot anee ak kamenng'ung' ak tupchosyeguk?” 11#Poi 7.9 Ki am ng'et kong' anyun tupchosyekyik agobo ineendet, ago kigonor kwandanyi ng'olyoondonooto eng' muguleldanyi.

12Ki pa tupchosyekyik koyaga akweetap keechiirek che po kwandanywa eng' Shekem. 13Ak ki leenji Israel Joseph, “Tos ma iyagi weeriik che otupche akweet eng' Shekem? Nyoo anyun ayookten iwe ole mi icheeget.” Ak ki leenji ineendet, “Ami yu.” 14Koleenji ineendet, “Ui anyun nguno, igeer ngo chamegei tupchosyeguk kobooto akweet; si inyoo imwaiwo.” Ki iyookto anyun kwo eng' atebweetap Hebron. Ki it Shekem, 15ak konyoor chii ne ki cheeng'soti eng' keeweet, ak kiteebe ineendet koleenji, “Icheeng'e nee?” 16Ak ki le, “Acheeng'oti weeriik che kitupche, kaigai mwaiwo ole iyagisye.” 17Koleenji chiichooto, “Kogoba eng' oli, amu ki agas komwaei koleen, Ongebe Dothan.” Ki isup Joseph tupchosyekyik, ak konyoorchi Dothan. 18Ki keer icheeget ineendet kota komi ole loo, ak kingo tomo koriik ole mi, kotil ng'aleek ole partoi ineendet. 19Ki ng'alaaljigei kole, “Ogeero! Nyoonei chiitap karwotitoet. 20Ongebe anyun kebar, si kewiirchi keriinget, ak kemwa keele, Kaam tyondo ne ya, si kegeer kiit ne egu karwotitaosyekyik.” 21Ago ki kas Reuben, ak kosar ineendet eng' eunekwak, koleenji, “Amongebar.” 22Ki leenji Reuben, “Amotumde korotiik. Owiirchi keriingoni mi surkwen, amoyachi kiy ne ya” si kosar ineendet eng' eunekwak, si koweekyi ineendet kwandanyi. 23Ye kingo it Joseph anyun ole mi tupchosyekyik, koreegune ineendet ngoryennyi, ngoryonooto kooi ne ki ilaachi. 24Ki imut anyun ineendet ak kowiirchi keriinget. Ki ma komi peek keriingonooto.

25Ki tebi ng'wony koamis, ak ye kingo tabendo kogeer piigap Ismaelik kobwanei, kobunu Gilead, kobooto tambeesikwak che kilaei tuguuk che ng'uu ne anyiny, ak mwanik che kinyaise, ak tuguuk che uu igomoik, kochoortagei Misiri. 26Ki leenji anyun Judah weeriichooto tupcho, “Tos mi kelunet nee ngebar tupchennyo ak keuny korotiikyik? 27Ongebe anyun kealdochi Ismaelik, ago amongeyachi kiy ne ya; amu ineendet ko tupchennyo, ak ko po korotiikyok.” Ak ki kas tupchosyekyik ng'aleekyik. 28#Poi 7.9 Ye kingo it yooto chemung'arainik che po Midian, ko ki imoong' icheek Joseph kolong' eng' keriinget, ak koaldochi ineendet Ismaelik eng' chepkondoi tiptem. Ki imut anyun Joseph kwo Misiri.

29Ye kingo weigei Reuben kwo ole mi keriinget, ak kogeer kole ki ma komi Joseph keriinget, kogereer ngoroikyik. 30Ki weektagei anyun kwo ole mi tupchosyekyik, ak kole, “Ma miitei lakweet; ara, si awo ano anyun?” 31Ki nam icheek ngoryeetap Joseph ak koeny kwesta, ak koilee ngoryeet korotiik, 32yeityo koyookto ngoryonooto kooi, keipchi kwandanywa, ak ipkole, “Kaginyooru ngoryoni; inyit anyun ngo ngoryeetap weeriing'ung' anan ma nenyi.” 33Ki inyit ineendet ak kole, “Ngoryeetap weeriinnyu iman! Kagoam ineendet tyondo ne ya. Kagetonaton Joseph iman.” 34Yeityo kogereer Jakobo ngoroikyik, ak kogermenegei kuniet, ak ki riirchi weeriinnyi peetuusyek che chaang'. 35Ki ng'eetyo weeriikyik tugul ak tiibiikyik tugul kole kogaigai ineendet, ago kiesyo ineendet kigaigai, ak ki le, “Eng' nooto anyun, ariirchini weeriinnyu agoi ait ye mi che ki kobek.” Ki riirchi anyun kwandanyi ineendet.

36Ak ki alda `Midianik Joseph kwo Misiri, koal Potipar, kiboityotap Pharaoh, kiptaiyatap riibiik.

Currently Selected:

TAUNET 37: KAPR

Highlight

Compare

Copy