KOMONG'U 1
1
Otwoknateet eng' Misiri
1 # Tau 46.8-27 Chu anyun kainaigap weeriigap Israel che ki it Misiri kobooto Jakobo; ki wo chii tugul ak koonnyi: 2Reuben, Simion, Lawi ak Judah, 3Issakar, Zebulun ak Benjamin, 4Dan, Naphtali, Gad ak Asher. 5Ki tamanwogik tisap piik tugul che po iyoteetap Jakobo. Eng' peetuusyechooto ko ki mi Joseph Misiri. 6Ki it anyun kolil Joseph, ak kobek tupchosyekyik tugul ak piik tugul che po ibinooto. 7#Poi 7.17 Ak ki sigiis piigap Israel, kotesagis kochang'a kot konyi emet ak kogimegitu kot.
8 # Poi 7.18 Ki piit anyun laitoryat age ne ki poi Misiri ne ki ma kongen Joseph. 9Ki leenji `ineendet piikyik, “Ogeero, chaang' ak ko kiimeen piigap weeriigap Israel kosiirech. 10#Poi 7.19 Kanyool anyun keng'ulatiitu si ma tesagis, amu nda piitu pooryeet, konamegei icheek ak puunikyok ak koboryenech, yeityo komweiso eng' emoni.”
11Ki inde anyun kipnyeberainik si kobiit konyaliil icheek eng' otisyet ne ki nyigiis. Ki teech koteekyi Pharaoh ole kigonoree tuguuk; nganasoogap Pitom ak Raamses. 12Ago ye kingo tesak kanyaliilet ne ki kinyalil piigap Israel, ko kitesagis ak icheek kosiir, ak konyi emet. Ki iimgei kot Misiriik agobo icheek. 13Ki pirto `Misiriik piigap Israel eng' koroomnateet ne oo. 14Ki igoochi saboonwekwak kong'woneegitu eng' otwoknateet ne koroom eng' poisyetap meneet ak matubaruuk, ak eng' poisyonik alak tugul che po emet. Eng' otwoknateennywa tugul ne ki ootis, ko ki ootis eng' kanyaliilet.
15Ki ng'at anyun `laitoryatap Misiri chebyosogap sigisyo che po Yahudik che ki kiguure Sipra ak Pua, 16koleenji; “Ye osigisyechi kwonyiik che po Yahudik ak ngo keer eng' ng'echereetap sigisyo lakweet ne kagisich ole weeriit, obar, ago ngo chepto, omete kosap.” 17Ki iywei chebyosochooto po sigisyo Kamuktaindet, ak ma yai ko uu ye ki kang'at `laitoryat, ak kimeto weeriik kosapcho. 18Ki kuur laitoryat chebyosochooto ak koteepse koleenji, “Amu nee si oyai ko uu ni, omete weeriik kosapcho?” 19Kowolji `chebyosochooto Pharaoh koleenji; “Ma kergei kwonyiigap Yahudik ak che po Misiriik. Kiimeen icheek ak isip kosigisyei kotom koitita chebyosetap sigisyo.” 20Ki yachi Kamuktaindet ne myee chebyosochooto po sigisyo, ak kitesagis anyun piik ak kogimegitu miising'. 21Amu kayweet ne ki iywei chebyosochooto po sigisyo Kamuktaindet, ko ki iberuur Kamuktaindet kooriikwak. 22#Poi 7.19 Ki ng'at `Pharaoh piikyik kogeny koleenji; “Owiirchi weeriit age tugul ne kisichei aino ak omete chepto age tugul kosap.”
Currently Selected:
KOMONG'U 1: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
