POISYONIGAP CHE KIYOKTOI 13

Kiyooktoi Barnaba ak Saulo

1Eng' kaniset ne ki mi Antiok ko ki mi maotik ak kaneetik: Barnaba, Simion ne ki kiguure Niger, Lukio ne po Kurene, Manaen ne ki kigui kobooto kirwoogindet Herod, ak Saulo. 2Ye kiboisyechin Kiptaiyat ak korugutegei, kole Kabuuset ne Tiliil, “Otabaannywa Barnaba ak Saulo agobo poisyet ne ki aguurchi.” 3Ak ye kingo kagorugutkei ak kosaaei, kogonoor icheek eunekwak ak koyookto koba.

Koamdoi che Kiyooktoi eng' Cyprus

4Kingo kagoyookto icheek `Kabuuset ne Tiliil, kochoorchigei Seleusia; ak ki pa eng' olooto kobun moinget agoi Cyprus. 5Ye ki miitei Salamis, koamda ng'olyootap Kamuktaindet eng' sinagogisyegap Yahudik. Ak ki mi kobooto Johana ne kiboisyechinoti.

6Ak kingo kagobun emet komugul ne ki ikween peek agoi koit Paphos, konyoorchi olooto poonin, maotyo ne po lembech, ne Yahudyot, ne ki kiguure Bar-Jesu. 7Ki mi `ineendet kobooto pounindet, Sergio Paulas, chiito ne ng'oom. Ki kuur chiichito Barnaba ak Saulo koba ole mi ineendet ak kimachei kogas ng'olyootap Kamuktaindet. 8Ago ki kirinda icheek `Eluma ng'oorindet (amu uu nooto kainennyi ye kiweech), ki kirinda pounindonooto, kocheeng'ei komaas kole si ma nyoor kayaneet. 9Ago ki nyi `Kabuuset ne Tiliil Saulo, ne kiguure Paulo, ak ki ichiilji kong' ineendet 10ak kole, “Ee inyee ne nyiitaat ng'aalseet tugul ak ng'omnateet tugul ne po kabeetet, inyee weeriitap chesawilyet, inyee puunyootap imanda tugul, mebagaaktoi imaas ortinwek che lititen che po Kiptaiyat? 11Ak keer nguno anyuno, mi eutap Kiptaiyat paragung'ung', ak eng' peetuusyo iegu kipkoratya si mata igeer asiista.” Ak ki ibutyi sainooto mirmirindo ak mesundeito, ak kiwendot kocheeng'at piik che namoti ineendet euut. 12Kingo keer anyun pounindet kiit ne kayaak, koyan, kokwong' agobo kaneetisyetap Kiptaiyat.

Paulo ak Barnaba eng' Antiok ne po Pisidia

13Ki pa anyun Paulo ak che ki mi kobooto ineendet kobun moinget eng' Paphos, ak koit Perga eng' Pamphylia. Ak ki wo Johana koweektagei Jerusalem kobagaakta icheek. 14Ak kingo pun icheek Perga, koit Antiok ne po Pisidia. Ki pa sinagogit eng' peetuutap sabato ak kotep ng'wony.

15Kingo pata somaneetap ng'atuutyet ak siruutigap maotik koyookto pounigap sinagogit piik koba ole mi icheek, koleenji, “Che kitupche, ngo tinye ng'olyoo age tugul ne imuuchi kotoret pichu, omwa.” 16Kotonon anyun Paulo ak koboorchine euut, kole, “Ogaso okweek piigap Israel, ak okweek che oiywei Kamuktaindet. 17#Kom 1.7; 12.51 Ki lewen Kamuktaindet ne po pichu Israel kwanisyekyok ak kotoroor pichooto ye ki punootik eng' emetap Misiri, ak ki imut icheek komong' eng' euut ne kiim. 18#Kai 14.34; NKNg'a 1.31 Ak kimuitoochi icheek eng' atebosyekwak eng' olo po kenyiisyek artam eng' surkwen. 19#NKNg'a 7.1; Jos 14.1 Kingo kagong'em pororyosyek tisap eng' emetap Kanaan, kogoochi icheek emennywa koek poroteet, eng' olo po kenyiisyek pogol ang'wan ak konom 20#Kirw 2.16; 1Sam 3.20 ak kingo pata tuguuchu kogoochi icheek kirwoogik agoi Samuel maotyot. 21#1Sam 8.5; 10.21 Ak kingo pata kosoom laitoryat; ak ki igoochi `Kamuktaindet icheek Saulo weeriitap Kish eng' kenyiisyek artam, chiito ne po ooreetap Benjamin. 22#1Sam 13.14; 16.12; T.Kal 89.20 Kingo kagoisto ineendet, kong'eetyi Daudi koek laitoryannywa; ne kibaoryanji agine kole, ‘Kaanyooru Daudi weeriitap Jesse, chiito ne iboiboi muguleldanyu, ne tuun yaei maguutikyuk tugul.’ 23Ki imutyi `Kamuktaindet Israel Yetindet, Jeso, eng' kesweegap chiichito, ko uu ye kiga koaror; 24#Mar 1.4; Luk 3.3 ye kiga sip koamji `Johana piik tugul che po Israel, kabatisanet ne po siguunet, ye ki tomo konyo ineendet. 25#Mat 3.11; Mar 1.7; Luk 3.16; Jhn 1.20,27 Ak ye ki neegit kogees Johana pandanyi, komwa kole, ‘Oleen aa ng'oo? Ma aa ineendet. Ago ogeero, isubwo age, ne ma nyoljino atyakyi kweonigap keelyekyik.’

26“Che kitupche, lagogap kesweek che po Abraham, ak alak che mi kwenung'wong' che iywei Kamuktaindet, kagiyokwech acheek ng'olyoondoni po yetunet. 27Amu ki ma nai ineendet `meng'iigap Jerusalem kobooto pounikwak, anan koguiyo kutusweegap maotik che kisomani eng' sabato age tugul, ki isuldae icheek ng'aleechooto ye ki irwookyi ineendet. 28#Mat 27.22-23; Mar 15.13-14; Luk 23.21-23; Jhn 19.15 Nganda ki ma nyoor eng' ineendet ng'olyoot ne igoochin kome, ko ki soom `icheek Pilato kole kebar ineendet. 29#Mat 27.57-61; Mar 15.42-47; Luk 23.50-56; Jhn 19.38-42 Ye kingo kagogees tuguuk tugul che kiga kisir agobo ineendet, kochoor ineendet eng' keetit ak konde kererit. 30Ago ki ing'eet `Kamuktaindet ineendet komong' eng' che ki pek. 31#Poi 1.3 Ak ki keer ineendet eng' peetuusyek che chaang' icheek che kitogosu kobooto ineendet kobunu Galilaya kobwanei Jerusalem, che nguno ko paorinik eng' piik. 32Ak ki ibwook logoiywek che myach che po arorutyet, ne ki kigoochi kwanisyekyok, 33#T.Kal 2.7 ko uu ye kigosuldochi `Kamuktaindet lagokyok nooto, amu ki ing'eet Jeso; ko uu ye siraat eng' Tyendap Kalasunet ne po aeng', kole,

‘Ii weeriinnyu,

kaasichin rani.’

34 # Isa 55.3 Ak ko uu ye ki ing'eet ineendet komong' eng' che ki pek, ma koweekyingei ineendet kogeny nunet, ki mwa ko uu ni kole,

‘Tuun agoonin kaberuroik che tiliileen, ak ko po iman, che po Daudi.’

35 # T.Kal 16.10 Amu ki mwa agine eng' Tyendo age kole,

‘Matun igoochini neng'ung' Ne Tiliil kogeer nunet.’

36Amu ye kingo kagoboisyechi Daudi kirwoogutigap Kamuktaindet ne Toroor eng' ibindanyi, konuuch, ak ki kitup kobooto kwanisyekyik, ak kogeer nunet. 37Ago ma keer nunet ineendet ne ki ing'eet Kamuktaindet. 38Ingonaak anyun eng' okweek, che kitupche, keele, kimwaiwok eng' chiichi nyoetap kaat ne po tengekwogik; 39ak kiityin imanda eng' ineendet age tugul ne iyani, eng' tuguuk tugul, che koma komuuchi koiityok imanda ng'atuutyetap Musa. 40Oriipkei anyun, si ma nyonjok ne ki kimwa eng' maotik keele,

41 # Hab 1.5 ‘Ogeero, okweek saasiik,

okwong'ye ak olusye;

Amu ayae poisyet eng' peetuusyekwok,

poisyet ne ma koi oyan matiny, agot ngo mwaiwok chii.’ ”

42Ak kingo ta komandoi icheek, kosoom kole tuun kota koamji icheek ng'aleechooto eng' sabato ne nyoonei. 43Kingo kagomanda tuiyet eng' sinagogit, koosup Paulo ak Barnaba `che chaang' che po Yahudik ak `che konyiti Kamuktaindet che kiwalak kobunji Yahudik. Ye kingo ng'alaaljin icheek, kogiil kole koba tai eng' myeeindap Kamuktaindet.

44Ak eng' sabato ne isubi nooto, koyumgei nganaseet che neegit tugul kole kogas ng'olyootap Kamuktaindet. 45Ago ye kingo keer `Yahudik tuiyosyek, koam ng'et kong' ak koeesyo eng' kimnateet ng'aleek che kimwaei Paulo, ak komwa ng'aleek che yaacheen kochubis. 46Kong'alaal anyun Paulo ak Barnaba eng' nyiganateet koleen, “Konyolu kemwaiwok korook ng'olyootap Kamuktaindet. Amu ki ogirinde ak orwookyinige okweegei ole ma nyolu onyooru saboondap koigeny, ogeero, kagibe ye mi Pororyosyek. 47#Isa 42.6; 49.6 Amu king'atech Kiptaiyat ko uu nooto kole,

‘Kaandein iegu lapkeiyet ne po Pororyosyek,

si kobiit iegu yetunet agoi tabandap ng'wony.’ ”

48Kingo kas Pororyosyek ng'olyoondoniito, koboiboitu ak kogonyit ng'olyootap Kamuktaindet; ak koyan tugul che kiga kelewenji saboondap koigeny.

49Ak ki yom ng'olyootap Kiptaiyat koronooto tugul. 50Ago ki inde `Yahudik ng'aleegap chaamset kobogorisyek che konyiti Kamuktaindet ak ko taagunotiin, ak piik che eecheen che po nganaseet, ak ki ing'eet usiisyet kous Paulo ak Barnaba, ak koon komanda eng' kiwotosyekwak. 51#Mat 10.14; Mar 6.11; Luk 9.5; 10.11 Ago kilelekyi icheek temburyek che mi keelyekwak, ak kiit Ikonio. 52Ak ki nyi kasubik poiboiyet ak Kabuuset ne Tiliil.

Currently Selected:

POISYONIGAP CHE KIYOKTOI 13: KAPR

Highlight

Copy