1 KORINTOEK 6

Komutyingei kapkirwook kayanik

1Tos kanyei age tugul eng' okweek ne ting'ee ng'olyoo chiitap kokwennyi kwo kapkirwook eng' taitap che ma po iman, ama eng' taitap che tiliileen? 2Anan mongen ole tuun irwookyin piik che tiliileen ng'wony? Ak ngot kotun orwookyini ng'wony, ko tos ma nyoljinok orwooch agobo tuguuk che mengeechen? 3Tos mongen ole tuun kirwookyin malaikaisyek? Siirei anyun ne tya, tuguuk che po sabooni! 4Ngot otinye ole kirwookyine tuguuk che po sabooni, ko tos ondoi koek kirwoogik icheek che ma kiiti keele kiy eng' kaniset? 5Amwae ni si agoonok olilanse. Tos iman, ma mi chii ne utaat eng' kwenung'wong' ne imuuchi kotil ng'aleek eng' kwenutap tupchosyekyik, 6ago imuti tupchet age tupchennyi kwo kapkirwook, ak ne siirei ko, eng' taitap che ma iyanotin?

7Achicha, kagoek nguno leluut eng' okweek, amu orwookyinige okweegei. Amu nee si mochamdegei kinyalilaak? Kalya si mochamdegei kerebenak tuguuk? 8Achicha, ago, okweeget che oyae ne ya, ak orebisyei, agot eng' tupchosyek. 9Anan mongen ole ma tuun nyooru icheeget che ma po iman laitornatetap Kamuktaindet? Amat kiberberak: ma mi eng' che soksei, anan che saaei kanamonik, anan che ibegei, anan chemuulkwonyiik, anan chemogorgoinik, 10anan chooriik, anan kipkeinik, anan kibogitinik, anan che chubisyei, anan rebiik, che nyooru laitornatetap Kamuktaindet. 11Ak ki uu chooto alak eng' okweek; ago ki kiuunok, ago ki kitabaanak, ago ki kiityok imanda eng' kainetap Kiptaiyat Jeso Kristo, ak eng' Kabuusetap Kamuktaindet nenyo.

Sabeetap kayanindet

12 # 1Kor 10.23 Chamdaat tuguuk tugul eng' anee; ago ma tuguuk tugul che nyolu. Chamdaat tuguuk tugul eng' anee; ago ma mache koboiywa age tugul eng' chooto. 13Po amitwogik moet, ak po moet amitwogik; ago tuun yaei Kamuktaindet tuwai koek puch, moet ak amitwogik. Ago poorto, koma po sokseet, ago po Kiptaiyat; ak Kiptaiyat, ko po poorto; 14ak ki ing'eet `Kamuktaindet Kiptaiyat, ak tuun ing'eetech ak acheek eng' kamuktaennyi.

15Tos mongen ole poorwekwok ko kebeberwegap Kristo? Ara anyun aiste kebeberwegap Kristo, ak ayai koek kebeberwegap chepkugoniot? Achicha, ma uu nooto. 16#Tau 2.24 Anan, tos mongen ole ineendet ne ituitoskei ak chepkugoniot ko poorto agenge? Amu, mwaei ineendet kole, “Egu tuwai poorto agenge.” 17Ago ineendet ne ituitoskei ak Kiptaiyat ko kabuuset agenge. 18Omwee ibeetapkei. Tengek age tugul ne yaei chii komiitei saang'utap poorto; ago ineendet ne yaei ibeetapkei koyachin poortanyi tengekto. 19#1Kor 3.16; 2Kor 6.16 Anan, tos mongen ole poorwekwok ko Hekaluut ne po Kabuuset ne Tiliil ne miitei eng' okweek, ne otinye eng' Kamuktaindet? Ama oo pogei okweegei; 20amu ki kialenak kamanuutyet: otoroor Kamuktaindet anyun eng' poorwekwok.

Currently Selected:

1 KORINTOEK 6: KAPR

Highlight

Copy