Roma 5

Kaisaleŋo Ŋei Koboboine Eŋinerop Gekenane Biraŋonge

1Kaisaleŋo ŋene mali malip wane ra more, sot midaine koboboine eŋerop gekenane bira ŋongane, ŋene peyamgo Kaisalerop Waom Yesu Kristo wano makatake gemaine. 2Eŋe mali malipzane raki paki ŋebu more, gege mage wawaine iwa Kaisale wane qom pesek kotino biraŋongane, ŋene ukude Kristorop makatake gemaine, eya wane ŋene oi bakom okanŋem paki, Kaisale wane qeli ewe zonom eya makenane, dereret okane gemaine. 3So ŋene yaleka oi bakom okan maine, wikile kine kinezane kotino gemaine, onoka wane ŋene iwa yale detmaine, wikile kine kine yewaŋo togole togole ma leule okanmaike. 4Togole togoleŋo waraŋkaki, Kaisaleŋo liwe liweko ma togole qe togole ŋebu ŋebu eya sariyake paki, eŋane ma togole qe togole ŋebu ŋebu, yewaŋo yemo qeli wane dereret gege yewa maki wakoniyake. 5Qeli wane dereret gege eyaŋo ŋebuki mi gamu ŋoniyake, onoka wane Kaisale eŋe eŋine wet maepine Asu Koboboine ŋebonge, oŋo qakki kotozo ketwareke, eya yemo Kaisale wane bakom, lewine midaine ŋebonge.

6Ŋene zonomze midaine, ge sari mageŋem, Kaisaleŋo naso motke, yewa bomileki, Kristoŋo borikine zane turuŋine seukke. 7Ŋo ŋene kepe ŋei kine iwa yale ŋei maneŋo ŋei koboboine mane wane raki paki, maine seukŋem rap. Ŋo ŋei qotkoinane ra more, ŋene maine mi seukkene. 8Ŋo Kaisaleŋo yemo siluŋ wet maep zok manerop okanŋon okanmaike, eya wane kine sikan ŋonge, eya yemo ŋene borikine mamaka geŋem, Kristoŋo ŋenane turuŋze maki paki seukke! 9Eŋane seuseuineŋo ŋene ŋebu more, koboboine iwa Kaisalerop biraŋonge paki, ŋene baŋ oŋo manerop Kaisale wane sot osi osiwo ŋine makok ŋoniyake. 10Ŋene Kaisale wane ŋabakoune okane gekone, ŋo eŋe siluŋ eŋine Gipolane seuseuinane raki paki eŋine dokokoune ŋebuke, wane iwa yemo ŋene Kaisale wane dokoine okanmaine paki, ŋene baŋ koso manerop Kristo wane gegeineŋo ŋebuki menaŋgene! 11Ŋo siluŋ yewaka mida, ŋene Waomze Yesu Kristo wane raŋem paki, Kaisale oi bakom okan kaikene, oŋo ŋene ŋebuki, Kaisale wane dokoine okanmaine, eya wane.

Adam Wane Ra More Seukmaine Kristo Wane Ra More Gege Maratkakone

12Borikineŋo kepeo ŋei weku eŋanoka wakonge pakimo, eŋane borikineŋo seuseu ma wakone ma waraŋka sarike, pakiso seuseuŋo ŋei korop eŋano rokopkeke, onoka wane, ŋo yemo ŋei korop mo ŋeiweku eŋano takotke more borikine ma warekoi, eya wane. 13Kepeo borikine mo alakan wakone paki, ra rokop don yewa ŋado ebonge, ŋo ra rokop donŋo yewao mi pakane borikinane turuŋine kibi mane mi more sakoi. 14Ŋo Adam wane naso yewao ŋine sari mage, Mose wane nasoo, yemo seuseuŋo ŋei korop yuwan one more ebu ket wareke, ŋei natne borikine mi makoi, eŋe Adamŋo okange yale, Kaisale wane aŋaine birakoi, ŋei yewa eŋe siluŋ seuseuŋo yuwan one more, ebu ket wareke.

Adam eŋe ŋei mane ŋado sari lotkeyake, eŋane oŋa oŋaine. 15Ŋo siluŋ ŋei etke yewa ere rokopetne wekuka mida, onoka wane Kaisale wane bakom lewine midaine, yewaŋo Adam wane borikine eya wane rokop mi okanmaike. Ŋei loutne seuk warekoi, yewa yemo welekatne, onoka wane ŋei weku eŋane borikinane seuk warekoi. Ŋo siluŋ Kaisale qom borikine i zok manerop kakapa suwaine pamaike, so bakomine lewine midaine yaleka, yewa ŋei weku Yesu Kristo wane qom borikinane makone. 16Eso eya yemo kineetne kine mane kine mane okanmamik, Kaisale wane bakom, so ŋei weku borikine make, eya wane masi. Ŋei wekuŋo borikine maki, eya wane ŋadino, “Sot korop,” eya wane kine ma wakon ma wakon eya sarike. Ŋo borikine loutne makoi, eya wane ŋadino yemo Kaisale wane bakom siu siukine midaine, “Sot Midaine,” eya wane kine sarike! 17Iwa yemo welekatne ŋei weku wane borikine eya wane ra more, seuseuŋo kiyeke more, ŋei waom okange, onoka wane ŋei weku yewa eŋane sot wane. Ŋo siluŋ ŋei weku Yesu Kristoŋo urata make, yemo zok kakapa! ŋei korop Kaisale wane qom borik wat watko pamaike, so bakomine lewine midaine, eŋinerop koboboine gege, yewa mau eyaŋo baŋ Kristo wane raki paki ware ŋungi, gege togon ge arikei.

18Eso eya wane borikine weku, eyaŋo ŋei korop bori wori wane numao biraonge, numa weku eyaka ŋei wekuŋo masi tanik koboboine okange, eyaŋo ŋei korop siwoton wareki paki, gege ebonge. 19Ŋei wekuŋo aŋa biraki, sot eyaŋo ŋei korop ebuki, borikine mama okanwarekoi. Numa weku yewaka ŋei wekuŋo aŋa tewe tewek okangane, eya wane ra more, ŋei loutne eŋe baŋ koboboine Kaisalerop biraongi gekei.

20Ra rokop don wakonge, eyamo borikine mama eyaŋo suwayakane, ŋo siluŋ borikineŋo suwa ariki, yewaoka Kaisale wane qom borikineŋo zok manerop suwa kakapa lele arike. 21Eso yalinane borikineŋo seuseu ŋei waom okankake, eya wane rokopka Kaisale wane qom borik, eyaŋo koboboine gege eya wane ra more ŋei waom okangi paki, iwen ŋongi, gege togon matko Yesu Kristo ŋenze Waom zane ra more arikene.

Currently Selected:

Roma 5: onsNT

Highlight

Copy