Roma 11

Israel Ŋei Korop Wet Togon Okanbi Kaisaleŋo Ŋei Magu Nigatne Ewekineka Ebuke

1Eya wane Na qesonmaile, Kaisaleŋo eŋine Yuda ŋei ŋerep eŋe oŋom magukoune qeliŋ onge me? Eya Midakaka! Na iwa na Israel ŋeika, Abraham wane ŋaboine, Benyamin magu eŋane tego ŋine. 2Kaisaleŋo eŋine ŋei ŋerep magukoune mo qei kino ma wesak onge, eŋe mi qeliŋonge, ŋine Kaisale wane ekapko don sisine mane ramaike, eya mo detmami, Elaiyaŋo Israel eŋane don ra more Kaisale iwa yale olatke, 3“Waom, eŋe geŋane propet kopŋone engu waremami, paki arata ŋone kitopokeu ketke. Na wekumde iwa gemaile, pakimo eŋe nane more nekukei wane ma zezeŋ nanmami.” 4Raki Kaisaleŋo don turuŋine daleo mange? “Na ŋei sewen tausen (7,000) mawaluk one wareonbe, eŋe Waom isisine, Baal, wawetene qe more mi meŋenkakoi.” 5Ukude naso iwa yemo numa weku eyaka okanmaike, Kaisale eŋe ŋei ŋerep magu ewekine ma wesakonge, onoka wane eŋine wet pesekinane okange. 6Eŋine wet peseinane yale okanonge, urata mamaenane mi okanonge. Kaisaleŋo ŋei gege mageenane okanonge ra, yemo wet peseine eyaŋo wet pese wele mi okangi rap.

7Pakimo daleo? Israel ŋei eŋe kine kine wele maratkaikei wane zuwaŋkakoi, eya mi maratkakoi. Ŋei magu nigatne Kaisaleŋo ma wesakonge, edoka wele maratkakoi. Ŋo ŋei magu korop, yemo Kaisale wane bokawoka desikei wane, ket wetene wonge wareke. 8Eyamo Kaisale wane ekapko don iwa yale ramaike, eya wane kop, “Kaisaleŋo wetene ma siukke, dereretene ma wongeke, eya wane eŋe naso iwao deeneŋo pore mi kaikei, me keteneŋo maine mi desikei.” 9So Dawitŋo rake,

“Eŋe maine ŋara ne metpi, leŋone ebukei, eŋe maine kepo ket rasukei, eŋe maine turuŋine eboniyake! 10Eŋane deene maine pilikeyake, paki eŋe maine mi pore kaikei, so romonene ma gulokenom, eŋe ŋibak ŋibak naso baŋem ge arikei.”

11Na koso qesonmaile, Yuda ŋei popkukoi, yewa eŋe yaup ket enguki midakoi me? Eya Midakaka! Onoka wane eŋe borikine makoi, eya wane mena menaŋŋo qelaŋ ŋei, Yuda ŋadino gemami, eŋano sarike, eyaŋo Yuda ŋei ebuki eŋane dere worik okangei wane. 12Yuda ŋei eŋane borikineŋo kepe baŋem ŋei eŋano kisi maep don wane riwe moriyan ma wakonge, paki set pelekeneŋo yemo qelaŋ ŋei eŋano kisi maep don wane moriyan manerop ma wakonge. Yai, ŋo gemage, Yuda ŋei koropka wetene main gekei, yemo riwe moriyan wele maine baŋ wakoniyake!

Kaisaleŋo Qelaŋ Ŋei Ebuke

13Iwa yemo na qelaŋ ŋei ŋine don ŋidan maile, na qelaŋ ŋei eŋane aposolo gemaile, eya wane na baŋ uratanane batne okangale. 14Na maine nae weŋem sotakkopne ma ewek onbe, eŋe ŋine urata mayakatne makoi, eya wane bailalaŋine okangei, paki eŋano ŋine natne maine eweke more, menaŋgei. 15Kaisaleŋo Yuda ŋei qeliŋ ongi, yewaŋo kepe baŋem ŋei korop ebuki sari Kaisalerop wet weku okane kima okannagukoi. Kaisaleŋo gemage, koso Yuda ŋei ebuyakeo, yemo baŋ daleo wakoniyake? Eya yemo baŋ seuseuwoŋine wisikae gege eya wakoniyake?

16Kasap sisine mane lewine Kaisale manikeneo, yemo wele korop yewa eyamo eŋaneka okanmaike. So eki mane wane ŋodine eya korop Kaisale manikeneo, yemo qogine eyamo korop eŋaneka okanmaike. 17Oliwa eki sereo mot mole eya wane qogine natne dumene ketke, pakimo oliwa eki mane zikotno ŋine eya wane qogineŋo yewao takotkeki, qelaŋ ŋei eŋe oliwa ekiwa zikotno ŋine yale, wane iwa yemo ŋine zonom so gege kelokine manerop iwa Yuda ŋei eŋerop mamami. 18Eya wane ŋine eki qogine yale dumene ketkoi, eŋane detpi ketki wawaine misuk okangei. Ŋine daleo maine wawaine okangei? Ŋine yemo eki qogine mane yale, ŋido eki ŋodine mi qesiŋ kamami, eki ŋodineŋo ŋine qesiŋ ŋunmaike.

19Ŋo ŋine siluŋ baŋ rakei, “Welekatne, ŋo siluŋ eki qogine dumene ketkoi, yemo ŋenane numa maikei wane.” 20Iwa yemo welekatne, eŋe rutupke biraongi ketkoi, yemo onoka wane mida, eŋe Kaisale mi detlukkakoi, eya wane. Ŋo ŋine yemo Kaisale detlukkakoi, eya wane eŋane gegeo gemami, eya wane wetŋineŋo wawaine misuk okangei, eya wane turuŋine yemo ŋine kaet ŋuniyake. 21Kaisaleŋo Yuda ŋei mi seseonge, eŋe eki qogine wele yale, eŋe baŋ seseŋuniyake, ŋine yale wetkemami me? 22Iwao ŋene Kaisale wane wet maepine so wet gerepine eya kamaine. Wet gerepinane wele yemo ket qekoi eŋano wakonge, ŋo ŋine yemo sese ŋunge. Ŋine takotke more eŋane wet maepkoka gekeiwo, yale okan ŋuniyake, ŋo ŋine eya mi okangei, yemo ŋine yaleka baŋ rutupke, biraŋungi ket warekei. 23So Yuda ŋei eŋane yemo, eŋe mali malip midaine gege, yewa qeliŋka warekeiwo, yemo eŋe baŋ koso ebu more alakan met metene yewao takot oniyake, onoka wane Kaisale eŋe mo eweke more, koso met meteno maine biraoniyake. 24Qelaŋ ŋei ŋine yemo oliwa eki zubaine zikotno ŋine qogine dumene ketke, yale. Pakimo ŋibu more, oliwa eki sereo mot mole, yewao takot ŋunge. Yuda ŋei eŋe yemo oliwa ekiwa sereo mot mole, yale. Wane eya yemo maine ewekine, Kaisale eŋe eki qogine dumene ketke, yewa ma more koso eŋine eki biŋekino takotkewe ra, maine takot keyake.

Kaisaleŋo Ŋei Korop Eŋane Wetine Pake

25Kimakopne, yewa eyamo don sane wele, ŋine ŋaŋae more ŋinŋine dereretko kito more, dere siukkei wane rawe detpi. Eya yemo iwa yale, Yuda ŋei eŋane Kaisaleŋo wet togonine yemo maine mida, ŋo eya eŋe yale pawamaŋki, baŋ qelaŋ ŋei zaleene darap eya mo Magakŋo detmaike eya weneŋ Kaisale wano sari warekei, naso yewao Yuda wane wet togonine eya qoeyake. 26Yale waoken okane more, Israel ŋei korop eŋe baŋ zinge warekei, eya wane Kaisale wane ekapŋo iwa yale ramaike,

“Ŋebu ŋebu ŋei baŋ Zion matko ŋine sariyake, paki eŋe ŋei borikine korop Yakop wane ŋabokoune eŋano ŋine ma biraki ari warekei. 27Na eŋerop siwa siwap baŋ okanikale, paki borikineene ma birawe ari wareyake.”

28Yuda ŋei eŋe qelaŋ ŋei ŋinane rau paki, Kaisale wane ŋabakoune okangoi, onoka wane eŋe don maine kisi maep eya qeliŋgoi, eya wane. Ŋo siluŋ onoka wane Kaisale eŋine wet bonepinane eŋe eŋine kimakoune okangoi, yemo aso ŋabo kopene eŋane raki paki, yale okanonge. 29Kaisale eŋe ŋei mane ma wakonka more, mosop kayakane raki paki, wetine main qein mi okan okanmaike. Yuda magu eŋe yalewa okan-ongi baŋ qoe-wareyake mo yale detmaike. 30Ŋo qelaŋ ŋei ŋine yemo alakanka Kaisale aŋaine birakoi, wane ukude yemo ŋine Kaisale wano ŋine riwe moriyan makoi, yemo onoka wane Yuda ŋei eŋe Kaisale aŋaine birau paki, wet togon okangoi, eya wane. 31Numa weku eyaka, onoka wane ŋine qom pesek maratkakoi, ŋo Yuda ŋei eŋe yemo iwa Kaisale aŋaine biramami, yemo eŋe yaleka Kaisale wane qom pesek maine maikei wane, yale okangoi. 32Kaisale eŋe ŋei korop aŋa bira wira okangoi wane, ma togole ongi, paki mo waluk-onge yemo eŋe qom pesek so wet maep korop gemaike, eŋe eya yeina ŋei korop sikan oniyakane, yale okange.

Kaisale Masiinane So Kisi Maepinane Mawakaikene

33Yai, Kaisale wane moriyan i zok manerop kakapa! Eŋe dereretine so wetinane kine yemo kepe ŋei, ŋo mi kakaine so mi dereretne eŋane wet so dereretinane namuŋine yemo zok manerop kiwet so doku namuŋ kaine mi kakakine qeirop qeika qei yale, maŋo eŋane wetinane kine maine ra qelaŋaniyake? Me maŋo eŋane numa kine kineine kine eya mo kito mange? Me ra mangi maine desiyake? 34Eya wane Kaisale eŋine ekapŋo iwa yale ramaike.

“Maŋo Waom wet dereretinane kine detmaike? Maŋo ewekki paki don numa maniyake so sikan-kayake? 35Maŋo yeye mane mo eŋe mange, wane eŋe koso turuŋine mainge qolekayake? Mida, yemo eŋe oŋomka.”

36Waom Kaisale eŋe yeye kine kine korop mo oŋom ma wakon wareke, so yeye kine kine korop eya eŋe eŋano ŋineka sari waremaike, so eŋe eŋaneka okan waremaike. Eya wane ŋene Kaisale wano yemo bakom detŋem waki mawa mawa so meŋe meŋen mali malip korop okan-kaikene so ora pa ora wiye so okane eŋet biŋek mane more bakom okan-kaŋem eŋane eŋet biŋekŋo ukude so naso baŋem naso baŋem ŋenzo so doko ŋosaze eŋano papa togon pawa pa ariyake. I, Weleka.

Currently Selected:

Roma 11: onsNT

Highlight

Copy