Roma 10
10
Kaisaleŋo Sot Qoe Qoe Wane Numa Ma Wakonge Eya Yuda Ŋei Eŋe Qaisikkakoi
1Kimakopne, na qomne kotineŋo yemo nae ŋei ŋerep Yuda magukopne eŋe koso Kaisaleŋo ebuki maine menaŋgei! Eya wane na eŋane Kaisale meŋenka okanmaile! 2Eŋe zok manerop Kaisale qelitine qekeiwane sorin ge okanmami wane, na eya kaulukmaile, ŋo Kaisale wane kine wele ra wakonmaile, eŋe siluŋ eya wane kine mi detluke okanmami. 3Eŋe Kaisaleŋo ŋei koboboine biŋek qe eŋino biraon okanmaike, eya wane numaine mi detka lukokanmami, paki eŋe enŋene numa bonepene mane ma wakon okanmami. Eso eya wane eŋe edomka Kaisaleŋo ŋei koboboine geu eŋino biraon okanmaike, eya wane bano mi ge okanmami. 4Kristoŋo ra rokop don eya ma sari maki kutno qoeke, eya wane ŋei mane eŋe Kristo detluk-kayake, eŋe sot midaine koboboine Kaisale wano birakayake.
Kaisaleŋo Ŋei Ŋerep Korop Koso Ebuyake
5Iwa yemo ra rokop don teweke more, Kaisale wano menage koboboine gege, eya wane Moseŋo iwa yale qeke, “Ŋei mane eŋe ra rokop donŋo daleo okaniyakane ramaike, eya koropka okan wareyake, eŋe baŋ gege marat kayake.” 6Ŋo mali malip wane ra more menage, Kaisalerop koboboine gege eya wane don yemo iwa yale, “Ge goŋomka wetŋoneŋo iwa yale misuk raikene. Maŋo qeliwo wayake?” Eya yemo Kristo ma kesiyakane. 7“Me ge iwa yale misuk raikene, maŋo qei kepe bano kesiyake?” Eya yemo Kristo seuseune eŋano ŋine iwenka sayakane. 8Eya yemo Kaisale wane ekapko iwa yale wane ramaike, “Kaisale wane don yemo osoŋono pamaike, piŋono so koto ŋono pamaike.” Eya yemo mali malip wane don ŋene ra okanmaine, yewa. 9Ge piŋoneŋo “Yesu eŋe Waom” raikene, so Kaisaleŋo eŋe seuseuwo ŋine ma wirikkaki wisikae wiyeke, eya wetŋoneŋo detluk kaikeneo, Kaisaleŋo ge baŋ geuyake, 10Ŋene wetzeŋo eŋe detlukkaŋem paki, menaŋgene, Kaisale wano koboine biraŋoniyake, ŋene pizeŋo mali malipzane kine ra qelaŋanŋem paki, menaŋgene. 11Eya wane Kaisale wane ekapko iwa yale ramaike, “Ŋei mane eŋe Kristo detluk kayake, eŋe gamu mi marat kayake.” 12Iwa yemo ŋei ŋerep koropzane ramaike, onoka wane iwamo Yuda ŋei so qelaŋ ŋei, Yuda ŋadino gemami, ŋene mapo mapokine mi gemaine, Kaisale eŋe ŋei ŋerep korop eŋane Waom weku okanmaike, paki ŋei ŋerep diyawa edo eŋane eŋetine ora zazak okanmami, eŋe manerop mosopon okanmaike. 13Eya wane Kaisale wane ekapŋo iwa yale ramaike, eya wane kop, “Ŋei ŋerep maŋo Waom wane eŋetine ora okanmaike, eŋe baŋ menage geyake.”
Israel Eŋe Kisi Maep Eya Dere Mi Mogare Arikoi
14Ŋo ŋei ŋerep eŋe mi detluk kaikeiwo, yemo eŋe daleo eŋetine maine orakei? So eŋe don kisiine eya mi detpi paki, daleo maine detluk kaikei? So don kisiine eya maneŋo mi ra qelaŋangi, eŋe daleo maine desikei? 15So don kisi rara ŋei mane mi biraonbi arikeiwo, yemo daleo don kisi maine suwa ariyake? Kaisale wane ekapko eya wane iwa yale ramaike, “Donkisi maine kepe baŋem ra qelaŋangei wane sarikei, eŋane kiyeeneŋo ma gesok sarkoi, yemo wekumane!” 16Ŋo eŋe siluŋ don maine yewa ŋei ŋerep korop mi dere ma nogankakoi, eya wane don Isaiyaŋo iwa yale rake, “Waom, ŋenane don eya maŋo detlukkeyake?” 17Eso yalinane don maine dereretŋo mali malip waraŋkaki sariyake, eso don detmaine, eyaŋo yemo Kristo wano ŋine sarimaike.
18Ŋo siluŋ na qeson maile, eya eŋe welekatne don maine yewa mi detkoi? O, eŋe mo detkoi, eya wane Kaisale wane ekapŋo don iwa yale ramaike,
“Eŋane aŋa donenane ukatneŋo kepe baŋem korop ari wareke, eŋane donŋo kepe kino ari lotkewareke.”
19Na koso manerop qeson maile, Israel ŋei ŋerep eŋe don iwa mi detkoi me? Yale mida! Eŋe mo detlukkoi, eya wane Moseŋo alakan iwa yale rake,
“Na baŋ ŋei ŋerep yauwine magu wele mida, eŋe ebuwe ŋine eŋe det worik onikei, na baŋ ŋei ŋerep qelaŋ qelaŋine ebuwe, ŋei ŋerep korop ŋine busu lelekei.”
20So Isaiyaŋo yemo didiwo ra wakone ramaike,
“Na mi zuwaŋnane gekoi, edo maratnangoi, naŋane dere qeson mi okangoi, eŋe wakonongole.”
21Ŋo Israel eŋane yemo iwa yale rake, “Naso kiroroine na meteretkene, aŋa bira wira so don qotkoine mai main ŋei ŋerep, eŋano birakole.”
Currently Selected:
Roma 10: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
