Pilipi 4

Paulo Wane Kima Qesiŋkoune Eŋane Don

1Eya wane nae kimakopne, ŋine Suwaine ŋinano kitouluke okorakei, na ŋinane detpe wetne zok pesemaike, so na u ŋunikalane nanmaike. So na ŋinane dere wa kitip zok okanmaile, ŋine yemo kine kine natne leweene wawaine yale gemami, mo noŋom makalane urataine togogoleka makole, na ŋinane wet pesek so bakom manerop okanmaile.

2Yuodia so Sintike, ŋire detpik, ŋire magu natne eŋerop ŋerep wele, eya wane, ŋire wetŋitne weku Waom wano motpik paki okorakeik wane na ŋitanmaile. 3So urata ŋei kimane, ge yaleka, ŋerep etke eya erane golatmaile, ge qesiŋ osikenane nanmaike, ere narop kisi maep don ra qelaŋanikenane urata togogole makoik. Ere so Klemen so naŋane urata ŋei kima kopne natne, eŋane eŋetene Kaisale wane gege togon ekap suwaino pamaike.

Ra Ewek Don

4Ŋine naso baŋem gege ŋineŋo Waom wane batne okanikei, na koso manerop rawe, ŋine batne okanikei.

5Ŋine ŋei korop bororom okanonbi, eŋe ŋinane kineŋine so urata mama ŋine so tanik manik ŋine maine eya kaulukkei, detmami, Waom eŋe mo sarimaike. 6Ŋine kine kine natne eya wane dere mezet misuk okanikei, ŋo meŋe meŋen-ŋineŋo yemo korop Kaisale kine kine mane wane ŋaŋaeu paki, ra umatŋine eya maine mawakone olasikei, naso baŋem wet ŋino bakom kito kitoŋo watke paki, eŋe meŋenkau qesiŋ-ŋuniyake. 7Peyam so qom menaŋ wane zok manerop Kaisaleŋo kine kine bile ŋebon okanmaike, eya wane kepe ŋei ŋene eya wane kine maine mi dere qelaŋangene, eya wane mo Kaisale oŋom ŋibuki eŋine qom menaŋ koto waket luke geu-lukkei, so Yesu Kristorop weku okorau paki, wet dereretŋine mayakatne pa togoleyake.

8Kimakopne, na don mane koso takotke ŋidanbe, ŋine don wet dereretŋino kine kine maine so ewe kito kitoine-rop eyaŋo qewat-kekei, kine kine wele pamaike, kine kine maine, kine kine koboboine, kine kine libe libe qelaŋanerop, kine kine similerop, so kine kine eweinerop. 9Naŋano ŋine don detkoi so makoi, don mo rawe detkoi, so okanbe kakoi, yewa okane ma gekei, eso Kaisale peyam ŋebon okanmaike, oŋo baŋ ŋinerop geyake.

Pilipi Edo Paulo Kine Kine More Mangoi Eyawane Bakom Kitoke

10Na gegeneŋo Waom wano paki wet pesek kakapa suwaine, yemo ŋido qomne ma wiye more qesiŋnanbi, eyawane detmaile! Ŋine naso kiroine ge sari mage ŋadino naŋane koso manerop wetkemami. Ŋine naŋane niget ŋungi qeliŋ-nangoi, yale mi ramaile, ŋine naŋane mo wetkekoi, i welekatne, ŋo numa wane qekakoi. 11So na ramaile, iwa yemo sola wane qesiŋ eya wane ŋaŋaewe paki mi ramaile, onoka wane na kine kine iwa pa ninmaike, eya mo rokopno so eyamo maine done midaine magekene, eya wane kine mo detkole. 12Na aboŋ midaine gege, so aboŋ gorop gege eya mo mayakatne na tikŋaneŋ gekale, eya mo detmaile. Na eya wane kine sane mo detkole, wane naso natno yewao mo detmaile, newe ŋatne qemaikeo, me ŋara wane seukmaileo, riwe moriyan gorop gege me bodi-rop gege, eya wane zok mi raikene. 13Na yeye kine kine korop maine okan warekalane zonom pa ninmaike yemo Kristoŋo zonom mo korop nin waremaike, na maine ma warekale.

14Ŋo na siluŋ iwa yale rawe, ŋado na kine kine okane bakom kitomaile, na wet boriko wikile dere gewe ŋine naŋane wikile eya weneŋ qesiŋ nane detkoi wane, detpe menaŋmaike. 15So Pilipi matko ŋine ŋeiŋerep ŋine ŋidom kine mo detlukmami. Na alakan kiyeke Kaisale wane kisi maep don maine eya ra qelaŋani-kalane Makedoniya kepe qelige arikole, naso yewao doku tau tau magu natneŋo na wesi kine kine wane qesi qesiŋ mi okan-nangoi, weku ŋidoka qesiŋ nangoi, so narop wet ama nagu qema nagu okan-nagukone. 16Na Tesalonaika matko gekole, naso eyao na zonom zuwagewe, ŋine naso natneo qesiŋ-nangoi, eso koso ŋado qesiŋ-nanbi paki motpi naŋano sarike. 17Na ŋinano ŋine sola qesiŋ kine kine ŋido ninikei wane rawe paki, mi ramaile, mida, na kisi maep ŋinane wele takotke wakone suwa ariyakane, so yale waka pa wayakane nanmaike, ŋine yalewa geu, baŋ Waom oŋom mauluk-ŋuniyake. 18Iwa yemo naŋane kine kine korop more ningoi, eya wane kibiine iwa motmaile, eso eyamo mo rokop kemaike! Epaproditusŋo ŋinano ŋine sola qesiŋ kine kine korop ma sari nin-wareke. Na ŋaŋaekole, eyamo iwa korop ma sari ninwareke. Ŋine kine kine iwa korop na okan-nangoi, yemo bakom me soe soep qoune simile teine Kaisale okankakoi, yale okanmaike, Kaisaleŋo bakom me soe soep yaline kaki, maine okangi mayake. 19So naŋane Kaisale eŋe moriya-nine kakapa suwaine Kristo Yesu wano pamaikeŋo baŋ kine kine zuwaŋgei, eya korop more ŋiboni-yake. 20Ŋenane Kaisale so Magaze, eŋano eya qeli ewe zonom papa togon tako rakot pa ariyake, weleka.

Don Qoi Qoine

21Na Kaisale wane ŋei ŋerep magu korop Kristo Yesu wane biŋek gemami, na ŋinane kaiwe maine ramaile, kima-kopne narop weneŋ iwa gemaine, eŋe ŋinane kaiwe maine ra ŋidanmami. 22Kaisale wane ŋei ŋerep korop iwa eŋe yaleka ŋine kaiwe maine ra ŋidanmami. Natne Emperor, Siza wane matko urata mamami, edo weneŋ kaiwe maine ra ŋidanmami.

23Eso maine Waom Yesu Kristo wane dan gunutŋo ŋinane asuŋine-rop korop bonep bonep pa-wareyake. O, Weleka!

Currently Selected:

Pilipi 4: onsNT

Highlight

Copy