Luka 6:27-49

Donne dere ge okanmami ŋine ŋidanbe, ŋaba kopŋine eŋane siminŋungi wetŋine eŋane payake, qaisikŋune okanmami, eŋe mauluk onikei. Soakŋune okanmami, eŋe mosop-onikei. Ŋine isibela okanŋune okanmami, eŋane meŋen-kaikei. Ŋo, ŋei maneŋo mugumŋone nat gekuki, ge mugumŋone nat yewa weneŋ sunkanom qeyake. Ŋo ŋei maneŋo takotŋone suwaine yewa maki, ge takotŋone nigatne yewa weneŋ sunkanom mayake. Ŋei mane eŋe kine kine mane wane meŋengangi, ge manikene. Ŋo mane eŋe geŋano ŋine kine kine mane maki, ge mainge giniyakane misuk rakakene. Ŋine ŋei edo kine kine okanŋunikei wane ra okanmami, kop yale waka eŋe okanonikei. “Ŋo ŋine kima okanŋune okanmami, ŋei ŋereppa weku eŋeka kima okanongei, yemo ŋine turuŋine mosop mi maikei! Borikine mama eŋe yale waka kima okanonmami, yewaka kima okanonmami! So ŋine masulukŋone okanmami, ŋei ŋereppa eŋeka weku masulukongei, yemo daleo turuŋine mosop mane maikei? Borikine mama eŋe yale waka okan okanmami! So ŋine turuŋine mainge ŋibongei, ŋei yewa eŋeka kine kine ebongei, yemo ŋine daleo mosop mane maikei? Borikine mama eŋe yale waka kine kine turuŋine rokop wekuka mainge ebongei wane, borikine mama kimakopene ebon okanmami! Yale mida! ŋine ŋabakopŋine kima okanongei, so masulukongei. Kine kine ebone more koso turuŋine ŋibongei wane misuk raongei. Ŋine boaŋ lewine suwaine maikei, so ŋine boaŋ Kaisale Wawainane gipon borasokoune okangei. Kaisale eŋe siluŋ ŋei ŋerep eŋe wet maep mi okanka qewoloŋ gemami, so borikine mama maulukone more kine kine mayakakatneka okanon okanmami. Eya wane Kaisale eŋe wetine ŋinane manerop pamaike, yale waka ŋine wetŋine ŋei ŋerep korop eŋane payake. “Ŋine ŋei ŋerep natne eŋane kineene misuk ra wakongei. So Kaisaleŋo ŋinane kine ŋine mi ra wakoniyake. Ŋine ŋei ŋerep natne sot turugo misuk biraongei, paki, Kaisaleŋo ŋine yale waka sot turugo mi biraŋuniyake. Ŋine ŋei ŋerep eŋane sot turuŋene qeligeu, Kaisaleŋo ŋinane sot turuŋŋine yale waka qeligeyake. Ŋine ŋei ŋerep kine kine yaup ebonikei, paki Kaisaleŋo ŋine kine kine yale waka ŋiboniyake, so eya wane rokop yuwane qewa more, manerop magu suwaine qakki meteŋino wayake, paki ŋine yewa korop rokopŋino maine malipkakei. Ŋine kine kine korop mage more, ŋei ŋerep rokopeno okanongei, rokop yewaka Kaisaleŋo mage more, ŋine okanŋuniyake.” Pakiso Yesu don saeŋine mane iwa yale edange, “Ŋei mane deine pili pilikineŋo de pilik kimaine iwenkaki, numao maine arikeik me? I midakaka, eŋe iwenkaki eretnarek waraŋnagu ari qeyau sorao ketkeik. Kibi medepŋo kito man manine mi yuwankayake, ŋo siluŋ kibi medep eya eŋe dereret maulukwareki qoeyake, eya mo eŋe kito ebo eboninane kop okaniyake. “Ge onoka wane kimaŋonane deino gok metmaike, yewa kamaine, ŋo geŋone deŋono eki sisine metmaike, yewa mo mi kamaine? Ge geŋone deŋono eki sisine metmaike, yewa mi kaka daleo kimaŋone olale raikene, ‘Kima ge detnom na deŋono gok metmaike, yewa kitowe saketkep?’ Ge isi ŋei! Ge mikepka geŋone deŋono eki sisine metmaike, yewa kitonom saketki, deŋone pore kaulukem paki, yemo kima-ŋonane deino ŋine gok yewa maine kitonom sakesiyake.” “Eki maine maneŋo wele qotkoine mi qeyake, me eki qotkoine maneŋo wele maine mi qeyake. Eki eŋane kineene yemo weleŋo ma wakongi ka okanmaine, segetko wele qauk mi qeki kitokene. Me zagongo wele danam mi qeki siwekene. Ŋei maine eŋe wet dereret maine zok kotino pamaikane, don maine aŋaino ŋine saket okanmaike. Ŋo ŋei mane borikinane dereret qotkoineŋo kotino zok pamaikane, don qotkoine aŋaino ŋine saket okanmaike, kine kineŋo ŋei kotoo watke pa okanmaike, yewaŋoka koso aŋaoka sa okanmaike.” “Ŋine onoka wane piŋineŋoka nora okanmami, ‘Waomze, Waomze,’ ŋo don ŋidan okanmaile, yewa mo mi tewek okanmami? Ŋei mane eŋe naŋano sari more donne detki paki, aŋane tewekeyake, ŋei yewa eŋane rokop don mane rokop motpe, ŋine kau. Eyamo ŋei maneŋo mat mane make yale wanekop, eŋe lom kiroine mawareki pakiso, simen liwage qakki ket wesi suwaine lom koto metkoi, yewao makatak warekiso, kutno mat make. Pakiso, koya qe more doku qakumŋo sari mat bosiŋine qeki mi okmaŋge, mat mauluke mamainane togole more metke. Ŋo ŋei mane eŋe naŋane don dere more aŋane mi tewekeyake, eŋe yemo ŋei mane dereretine qelaŋine oŋo mat mane make yale. Eŋe kepe kutno lom ma more simen liwage more mat ma togoleyakane mi more more yaup make. Eŋe matine yau yaup maki metki, doku qakumŋo sari mat qeki ikopka okmage ket zaŋ zuŋ make!”