Hibru 3

Yesuŋo Suwaine Ŋo Mose Eŋe Nigatne

1Doku tautaune magu kimakopne, ŋine Kaisale eŋe qeli gege mat wane biŋek weneŋ yalewaka ŋidora newan ŋunge, eya wane ŋine Yesu kisi maep wane qelit ŋei so pris wawainano deŋine ka mogare kalilipka arikei, eŋe Kaisaleŋo ŋene mali malipze didiwo ra wakongone magemaine, eya wane Pris Wawaine okaniyakane taleka more birakaki ketke. 2Eŋe Kaisale aŋaine teweke urataine mauluke make, oŋo urata eya mayakane mawakonkake, Moseŋo urataine bororom mauluk qeuluk, Kaisale wane ŋei ŋerepŋo mat urum okanmaike, yewa wane kotino Mose eŋe mamaŋke, eya wane rokop, Yesu eŋe make. 3Ŋei mat mamaike eŋe mawaka okanmami, mat eŋine mi mawaka okanmami, rokop weku yewaka Yesu wane qeli ewe zonomineŋo Mose wane zonomine yuwankamaike. 4Mat korop eya yemo welekatne kepe ŋeiŋo ma okanmaike, eso Kaisale eŋe wekuŋo yemo qeli so kepe korop mawareke. 5Mose eŋe Kaisale wane mat urum eya wane koto ge more raki, korop tewe tewek urata pake so eŋe wareki paki, qelit mama yale magukoune eŋano urataine mauluke make, paki Kaisaleŋo don baŋ ŋado ra wakoniyake, eya wane don Moseŋo rake, so qelitne qeke. 6Ŋo Kristo yemo eŋe aŋa tewe tewekinerop, wane Gipoleŋo Kaisale wane mat urum eya wane welaine, oŋom wareka okanmaike. Ŋene eŋine mat so urum koune, ŋene sorin borin okane mali malipze warekaŋem oŋo kaki, mali malip wane biŋek qe ŋebonge, eya waneka seleleine payakeo, yemo naso qoeyake, naso yewao eŋe ŋene baŋ eŋane magu so mat urumine wele okanikene.

Kaisale Wane Ŋei Ŋerep Magu Eŋe Sola Pesek Maratkaikei

7Eya wane don mane Kaisale wane ekapko qeqine Asu Koboboineŋo iwa yale ramaike, eyaŋo ŋenane biŋek okanmaike, “Ŋine Kaisale wane don ukude detmamiwo, 8yemo ŋine wet togon alakan okane more ŋabokopŋine Kaisale ŋabakakoi, yale misuk okanikei, ŋine kaiwe yewao kepe yaup papaino gekoi, paki eŋe liwe liweko birakau det worik wakonge. 9Eya wane Kaisaleŋo ramaike, eŋe baŋ naŋane urata na korop togoleka koma 40 masi mawe kakoi, ŋo koso eŋe siluŋ wawaine okan nane more liwek nangoi. 10Kine eya wane na ŋei ŋerep yewa eŋane sotne osiki rakole, ‘Eŋe naso baŋem weteneŋo na mi mogat nanmami paki, naso baŋem naŋane numa mo eŋane biŋek qekole, eya qeliŋmami.’ 11Yewa wane na sotne osiki don iwa yale ra togole edangole, ‘Welekakatne weneŋ weti qeliwo, eŋe naŋane matko saket more narop sola pesek mane mi mesikei!’ ” Kaisale eŋe don yalewa rake.

12Kimakopne, na eya wane rawe ŋine kaulukkei, ŋinane keuwo ŋine maneŋo kotine qotkoine so mali malip midaine geki paki Kaisale Gege Togon Welaine eŋano ŋine, mi kakakka ariyake. 13Kaiwe baŋem ŋene ra okanmaine, “Ukude” kamde, yale wane mo ŋine kaiwe baŋem bonep bonep Kaisale wane ŋei ŋerep don bile so mayakakatneka kito edanikei, so qomene ma ewekkei. Gege ŋinano ŋine mane eŋe borikeneŋo isikaki paki maki wet dereretine siuke, togoleyakane ŋinŋine girem ŋine au more, naŋ qe nagu gekei. 14Ŋene korop Kristorop weneŋ eŋane soukoune eŋine rokop tego weku okanmaineo, yemo ŋene alakan kiyeke more detlukka malipkakone, eya togogole malilipka ge more mageŋem naso qoeyake, ŋene yale okangeneo, yemo ŋene Kristo wane soukoune eŋinerop tego weku okangene.

15Eya wane Kaisale wane ekapŋo iwa yale ramaike, “Ŋine Kaisale wane don ukude detmamiwo, ŋine ŋinane ŋabokopŋine sogino wet togon okane Kaisale ŋabaka gekoi, yale koso mi gekei.”

16Maŋo Kaisale wane don dere more wet togon okane sotine osiki eŋe ŋabakake? Ŋei ŋerep korop Moseŋo ebu iwen ongi, Izip kepeo ŋine arikoi, ŋei ŋerep koropŋo okangoi, 17eya wane Kaisale eŋe manerop sot osi osi okane geki, koma 40 okange! Yemo ŋei ŋerep borikine mau paki, kepe keuno yaup papaine mat mane mi pamaikeo, seuk warekoi, pareŋene eya pa arike. 18So Kaisale eŋe done togogole ratogole more rake, “Eŋe mane naŋane mat koto mi saket more narop sola pesek mesikei.” Eŋe don eya maŋane rake? Ŋeiwa wet togon okane ŋabakakoi, eŋane rake. 19Eya wane ŋene iwa yale detmaine, eŋe Kaisale wane don detluke more mi malipkakoi, kine eya wane eŋe umareu paki sola pesek matino mi waketkoi.

Currently Selected:

Hibru 3: onsNT

Highlight

Copy