Epeso 4

Asuŋo Qeturaŋŋongi Magu Weku Okangone

1Paulo na Waom wane ra more mulap ŋei gemaile, na eŋane urata ŋeiŋo ma togole ŋune more ŋidanbe, ŋine kine kine wawaine pamaike, eya wane raki paki Waomŋo ŋidora newan-ŋungi sarikoi, eya wane ŋine numa koboineka gesoke gekei. 2Pakiso, doku tau tau magu natne eŋane deo ketkele bororom gekei, so naso baŋem wetŋine pesekakatne ge more, wet maep okan nagu more eya wane weleine kimakop ŋine eŋerop kito qesiŋ okan nagukei. 3So Asu eŋe peyam wane mulapŋo qeturaŋ-ŋune more wokom-ŋungi, ŋine magu weku okangoi, mulap yewa kitasikei wane, diyamine manerop togoleka mauluke magekei. 4Ŋene Kristo wane sola bikum weku, so eŋane Asu weku, yale waka ŋene wetze weku waki, qeturage more, qeli wane kine kine weku wawaine Waomŋo okan-ŋoniyakane, ŋene eŋe tomaka gekenane. Kaisaleŋo ŋene ŋedorake, 5Waom weku gemaike, mali malip tanikine weku, doku tau tau weku. 6Kaisale weku gemaike, eŋe wekuŋo ŋei ŋerep korop Magaze, eŋe wekuŋo weti, ŋene korop yuwan-ŋon waremaike, eŋe wekuŋo ŋei ŋerep keuzo urata ma more, koto baŋem zonom more ŋebon okanmaike, so ŋei ŋerep keuzo so koto baŋem mere kito okan okanmaike.

Waomŋo Wet Maep Urata Wane Ŋei Kine Kine Biraŋonge

7Kristo eŋe mokaka sogino dereret maki paki, oŋa oŋazane bakom suwaine manerop ŋebongane, ŋene ukude mage waremaine, so Kaisale eŋe weneŋ yale waka, wet maepine kakapa ŋei ŋerep bonep bonep oŋa oŋazane bakom ŋebon-wareke. 8Eya wane Kaisale wane ekapŋo iwa yale ramaike,

“Waomze eŋe wetika weti wa arike, Naso yewao eŋe mulap ŋei loutne weneŋ ebuki arikoi, eŋe kine kine korop ŋei ŋerep bakom wet pesek ebon wareke.” 9“Eŋe weti wake”, eya wane kine daleo? Kine yemo iwa yale, eŋe alakan ketke, yewa mo ket mage qei kepe kaino lotkeke. 10Ketke ŋei weku yewaŋoka koso weti wake. Eŋe qeli kotino so kepe kutno korop oŋom rokopke ge wareyakane wake. 11So Kristo oŋomka ŋei korop “Kisi Maep wane bakom ebonge.” Ŋei natne Aposolo urata maikei wane biraonge. Eŋe Kisi Maep wane urata kiyeke ma togoleu okorake. Ŋei natne propet biraonge, eŋe Kaisale wane don ra qelaŋangei wane, ŋo ŋei natne eŋe qelaŋ ŋei ŋerep Kisi Maep don edanikei wane. Ŋei natne pasto biraonge, eŋe lama magu ware-onikei wane. Ŋo ŋei natne eŋe Kisi Maep don rara wane kito ebo ebon urata maikeiwane biraonge. 12Kristo eŋe urata yale ŋebonge yemo urata ŋei ŋerep ma wakon onŋem, Kaisale wane ŋei ŋerep magu ŋene kito qesiŋokan-ŋonbi urataine maine ma ariŋem, Kristo wane kiye metine, so sola bikumine suwa togole okan-ŋonikei wane ŋei yale biraŋonge. 13Eya wane ŋene urataze yale mamage, mali malipze maine korop qeturaŋ-ŋem paki, Kaisale medepine detluk-ka more weku okane okora, gege eyaŋo weku okaniyake. Paki ŋene korop Kaisale suwainane Gipole, eŋano kine det-luke more, takotki takot okane, Kristo wanoŋine zonom warage wet weku ge wakene. Yale okane gemage ŋene boaŋ Kristo eŋine yale ŋei wele lelekene so okanikene. 14Ŋei wele okanŋem paki, ŋene medep nigatne eŋane rokop misuk okangene. Ŋene togole more geŋem isi ŋei eŋane isi don, me liwe liwek donŋo dibom yale kaukŋone more eya wane momoineŋo main qein misuk ŋebuki, ŋene mat me kepe diyao arikenane ra ŋeboŋebone, eya misuk qeliŋgene. 15I, Midakaka, ŋene kine kine yalinane ket mi mosikene, ŋene don wele magekene, paki, ŋei ŋerep kopze wet maep okanone more, don welekatneka kito edanikene, yale okanŋem paki lewetze Kristo wano kito, qedugu nagu takotke more, ŋei wele lele togogole okane gekene. 16Ŋo Weleze yemo Kristo eŋe oŋom ŋebuki ŋene eŋane kiye metine, so kai sotne, eŋe deine, ŋene korop weleoka qeturaŋ waremaine paki, ginogom-ineŋo tutuino tutuino korop takotŋone more makatakŋongi, welazerop weku okan okanmaine. Wane sisine weku weku ŋene urata amanagu-ŋem paki, kima natne eŋerop ŋedomka simile det-nagu more, kait masi so tanik manik yewaŋo wet maepko suwa togole okanikene. So ŋene mo solaze suwayake so togole lukeyake.

Kristo Wane Seuseuinane Ra More Ŋene Gege Musele Gekene

17Na Waom wane eŋetko girem don togogole mane iwa yale rawe paki ŋidanbe detpi, ŋine qelaŋ wet maep midaine, eŋane gege yale koso manerop misuk gekei. Eŋe wet dereretene mo qelaŋ okangimo, kine kine sinoine wele midaine yewa waneka motpi pa okanmaike. 18Eŋe weteene panaman okan okane, eya wane eŋe qelaŋ so wet togon okane more, Kaisale wane gege me gege togon eya mo ŋadek kakoi. Pakimo, Kaisale wane gege togon yewa wane ŋadino ge okanmami. 19Eŋe kine kine borikine okan okanmami, eya wane gamu gamu mane mi pa ebonmaike, mo qeligeu siukke, eya wane eŋe weteene siukki, ŋara berek ne gidiŋ gidiŋ okorau, qomene manerop wiyeki, bailalaŋ okane, borikine kine kine diine teine zok loutne ma okanmami.

20Ŋine yemo gege yaline okane gekei wane ra more, Kristo wane kine mi kito ŋibongoi. 21Eya welekatne, ŋine kineine kito ŋibonbi, Yesu wane don wele detkoiwo, yemo iwa yale detkoi: 22Ŋine qelaŋ gege sogine, yewa ŋadekka more wet dereretŋine musele, eya sogineŋo isi okangi paki, bailalago matalika okanmaike, yewa kito qokwarekei. 23Paki koto ŋine asu detkau kito wirikki, koso wet dereretŋine, eyamo korop mau musele okaniyake. 24Ŋine wet musele kitou kesiyake, yewaŋo mo Kaisaleŋo eŋine kait toqaine yale. Gege wele eya mo oŋom koboboine so kuneŋine ma wakonkayake.

Ŋene Borikine Kine Kine Qeliŋgene

25Eya wane ŋine koso isi tanik manik kinekine, eya manerop misuk okanikei, ŋine don welekatneka doku tautau magu ŋei kimakopŋine natne eŋererop aukei so edanikei. Onoka wane ŋene kima kima koropŋo okanmaine so ŋene qeturageŋem, Kristo wano sola weku okanmaike, yalewa wane. 26So ŋine kotoŋine gereweki, sot osi osi okanbi paki mageu, yewaŋo teba-ŋungi borikine misuk maikei, eya wane ŋine ŋidom ware nagukei. Ŋine koso sot osi osi okane geu, naso me kaiwe misuk qoeyake, me kepe kesiyake. 27Ŋine sot osi osi naso kiroine okane gekeiwo, Ŋei Borikineŋo ŋine liwek-ŋuniyake, eya wane ŋine Ŋei Borikine misuk newanka more waraŋkakei. 28Kobu mamaŋo kobu qeliŋgi paki, metineŋo urata togole maki, eyaŋo ŋara aboŋ suwaine maratka mangi, gege mageine maineka geyake, paki so eŋe maine ŋei natne aboŋene midaine kine kine wane ziya ziyaŋ gemami, eŋe kito qesiŋ okan-oniyake. 29Don borikine kine kine mane aŋaŋino ŋine misuk detkau sa kesiyake, Midakaka, don maineka yemo kito qesiŋ oka okan wane numaine wakongi rau, ŋei natne pelekine gemami, kima ebuyake. So Waom wano ŋine wet maep warage, newankau saket wet maep wane namuŋ suwaine ma wakoniyake, so ŋine 30Kaisale wane Asu Koboboine misuk qaisik-kau wet borik okaniyake, eŋe Kaisale wane Asu Koboboine yewa, yemo eŋe ŋebu ŋebu nasoo kibi maepine oŋo okangi kaki paki, Kaisale eŋe baŋ siwot-ŋune bira ŋungi, qeka maka midaine gekei wane ra more ŋibonge. 31Ŋine turuŋ kiroroine mage mage, sot osi osi, koto gerep, don suwaine au au, mabaik qebaik, so don mai main, yewa so sigit borikine natne yewa keuŋino misuk wakoniyake, eya korop ŋadek-kawarekei. 32Paki ŋine eya wane turuŋine, eya mo kait masi so tanik manik kine kine maneŋo doku tau tau magu natne eŋerop kima kima okan nagulukkei, so turuŋ bira wira okanikei, kine wekuka Kaisale eŋe yale waka Kristo wane seuseuinane raki paki, turuŋŋine mo qeliŋge.

Currently Selected:

Epeso 4: onsNT

Highlight

Copy