Epeso 3
3
Pauloŋo Qelaŋ Magu Eŋano Kisi Maep Don Ra Qelaŋange
1Kine yewa wane Paulo, na qelaŋ ŋei ŋinane so Kristo Yesu wane mulap ŋei okangole gemaile, na Kaisale meŋenka okanmaile. 2Welekatne, ŋine mo detnanmami, Kaisale wetne peseka-katnane urata iwa ŋinano mawe menaŋgei wane ra more biranange. 3Ŋo san wetinoka pake, yewa Kaisale eŋe ra qelaŋane nolatki detkole, na eya wane don bamgo mo alakan qe ŋibonile. 4Ŋo, ŋine boaŋ kibi qekole, yewa daposikeiwo, yemo ŋine maine iwa yale desikei, naŋane wet dereretneŋo Kristo wane urata mamaike, eya wane don sane yewa na mo detka warekole. 5Mokaka ŋei bano ge sarikoi, naso yewao Kaisale eŋe don sanine yewa ŋei natne mi ra wakone edange, ŋo ukude yemo Kaisale Asuineŋo don sanine yewa ra qelaŋane Aposolokoune, ŋene so qelit ŋeikoune propet biraŋone more ra qelaŋane ŋedange. 6Don sanine iwa yale, kisi maep don wane weleine, qelaŋ ŋei ŋine Yuda ŋei ŋenerop rokop weku, so magu weku okangone, paki, ŋene korop Kristo Yesu wano Kaisaleŋo ra togole more, ŋenane kine kine biŋek qeke, yewa korop ŋedom welaine okane magekene. 7Eya wane Kaisaleŋo Kisi Maep don eya ra qelaŋan-galane qelit ŋeiine ma wakone biranange, eŋe wet pesek okannangi paki, zonomine kakapa suwaine, na urata yewa qesiŋ-nangi maikalane, so zonom yewa ma togole naniyakane so eŋine kine ma wakongalane weneŋ ninge. 8Na Kaisale wane ŋei ŋerep magu eŋane bango umi qe tam gewe, Kaisale eŋe wet pesek so eŋine qom menaŋinane, ŋei ŋerep natne eŋano Kisi Maep don eya ra qelaŋanikalane ra ninge. Kaisale eŋe Kristo wano moriyan suwaine yaup papaine, wat watko motke pamaike, Kisi Maep eyaŋo ramaike, kine kine korop Kristo wano pamaike, eya mo maine mi dapo rapotne, so mi detŋem qoewareyake. 9Kaisaleŋo kine kine korop Yesu Kristo wane kine eya, Kaisale eŋe sanka naso kiroine wetke more motkeki pasake, eya mo noŋo baŋ ra qelaŋane more edanikalane, Kaisale eŋe rabarake ra luluge more na ninge. 10So eŋe mokaka qei sogino yemo motkeki sanka pake, ŋo ukude yemo Kaisale eŋe doku tau tau ŋei ŋerep magu-kouneŋo urum suwaine yale okane more, dereret kine kineine mayakatne yewa ra qelaŋanbi, kibine kine kine wakongi, qeliwo ŋei wawaine, zonom gorop aŋelo magu so asu, eŋe maine Kaisale wane kine desikei wane urata ebonge. 11Kaisale eŋe mokaka yale okaniyakane wetneŋo don eya ra togoleke, eya wane wele Waomze Kristo Yesu birakaki ketki, eŋane raki paki mo mawakone more ma qelaŋange. 12Ŋene Kristorop tako rakotze payake, so mali malipzeŋo eŋano paki, ŋene kaet mi okanikene, paki iwa yale desikene, Kristo eŋe Kaisale wano lotke lotke wane numa so madet, don eyaŋo mali malipze ma togoleki, ŋene kaet midaine Kaisale mo detka ewezerop okane arimaine. 13Na koso ŋidanbe detpi, na ŋinane ra more wikile wakile kutno gewe, wetŋine misuk qorodoge kesiyake, Midakaka, eya mo ŋine korop eŋet biŋekŋinerop okangei wane, na wikile detmaile, kine kine yewaŋo qesiŋ ŋungi, ŋine mayakatne Waom gorop weku mane baŋ gekei.
Yesuŋo Ŋenane Qom Borik Detke
14Kaisaleŋo ŋinane ra more kine kine mane bile so mayakakatne mawakone ŋebonge. Yemo Yesu Kristo eŋe ŋenane madet so numa. Ŋene yewa wane ra more koropŋo qeliwo so kepeo ŋei maguine maguine Waomze kalilip-ka meŋe meŋen so mali malip korop arimaine, na Paulo Kaisale Magak wane kaitko, eya wane ra wawetne qe umi ket, Kaisale meŋenka okanmaŋkale. 15Kaisale wano ŋine qeliwo so kepeo ŋei ŋerep magu gemaine, pakimo, eŋe oŋom ŋei tego yewa ŋene eŋetze wele mawakon ŋebon okanmaike. 16So eya wane na ŋinane ra more Waomze so Magaze Kaisale wele wawet qe meŋenka okanmaile, “Ge eŋet biŋekŋone suwaine qelaŋan gorop, eya wane ge Asuŋone taleka more zonom ebonnom, geŋane zonomgo weteneŋo suwa togole okaniyake, 17so mali malip ŋinane wele Kristo eŋe koto ŋino geyake, so mat urumine mayake.” Na meŋenka maile, yemo wet maepŋo wetŋinane kine so ŋodine okangi, ŋine yewao ma qotke more eki yale togole okorakei. 18Paki, ŋine so Kaisale wane ŋei ŋerep magu korop, ŋine weneŋ maine zonom mau paki, Kristo wane wet maepine so Kisi Maep donine zok kakapa suwaine, kine so kutne, so eri kiroino arimaike, so weti wamaike, so qeirop ketmaike, yewa wane kine detlukkei. 19O maine ŋine sari more Kristo wane wet maep, ŋei kima mane wane simile dereret, eyaŋo dereret korop yuwanka waremaike, eya wane kine detlukkaikei, pakimo, Kaisale wano ŋine kotozane moriyan wat watko pamaike, yewaka koso ŋine qewatke ŋiboniyake.
Mawa Mawa Don
20Kaisale eŋe zonominane kine ŋei kotozo ma wakon okanmaike, so Kaisale eŋe urata mamaine so zonomineŋo ŋenane meŋe meŋenze so wet dereretze zok manerop yuwan-kawaremaike. So ŋene kine kine korop Kaisaleŋo mayakane meŋenka okanmaine, yewaŋo eŋane zonom mi yuwan-kamaike. 21Yewa wane doku tau tau maguŋo naso baŋem naso baŋem Kaisale bakomine kito eŋetine ma wiye more, Kristo Yesu wane eŋetko qem mawa mawa, me oi bakom tako rakot ŋenze me doko ŋosaze eŋano okanŋem, eyaŋo papa togon pa ariyake! O, Weleka!
Currently Selected:
Epeso 3: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
