2 Korinti 7
7
1Eya wane kima maep kopne, kine kine yalinane Kaisaleŋo biŋek qe ŋebo ŋebonane ŋene maine kinekine qotkoineŋo koto so solazo maki sigile okanmaike, eya saukwalalakkene, so Kaisale ewine kito more kotoze qelaŋangorop gekene.
Paulo Eŋe Korinti Ŋei Ŋerep Eŋane Kisi Dere Wetine Menaŋge
2Ŋine koto ŋine misuk mawaluke ŋebongei. Ŋene masi kine kine borikine ŋinano mane mi okangone, ŋene ŋine matali qetali mi okan ŋungone, me kine kine mane yaup mi makone. 3Na don iwa ŋinane detpe boriki mi ramaile, na mo alakan ŋidanile, ŋene wetzeŋo luk-ŋunmaine, eyamo ŋinerop weneŋ gekenane me seukkenane. 4Na wetneŋo ŋinaneka zok motpe paki, ra eweke ma ewek-ŋunmaile, na wetne zok pese pesesinerop, wane wikile kine kine kotino na wet pesek zok suwaine detmaile.
5Ŋene Makedoniya kepeo sari lotke more yaleka daleo kito peseluke geŋem rap. Iwa solaoken kawali so koto oken kaet, kine kine yewaŋo wakone qepok mapok okan ŋongi gekone. 6Wanap magunut onmaike, Kaisale, oŋo yemo siluŋ ŋenane kito pese qe pesezane Titus birakaki zingeke. 7So eŋe zingeke eya wane ka mida, ŋine wet menaŋ don olatkoi, eya masari ki dere more wetze peseke. So na detnane gemami, so qom borik korop ge okanmami, so naŋane ra more urata ŋine qesiŋkau paki sorin borin okan okanmami, eya nolatki wet pesek suwaine detkole.
8Na alakan kibi mane qe ŋibone more, qom wikile ma wakone ŋibongole, eya wane wetne mi borimaike. Qe ŋibongole, naso nigatne yewao eyamo welekatne wetne borike. 9Pakimo iwa, yemo wet pesek detmaile, eyamo ŋine zok wikile detkoi, eya wane midaka, qom wikileŋo ŋinano wet mai main ma wakonge, eya wane qomne menaŋmaike. Kaisale dereretinane rokopko qom wikile mayakatne detkoi, wane ŋenane donzeŋo mi matali ŋunge. 10Qom wikile mayakatne yewaŋo wet mai main ma wakongi ŋei menaŋgene, paki qom wikile yaline marat-kayakeŋo ŋado eya wane mi detki boriyake. Ŋo qom wikile sigitne me diinerop, ŋei dereret wane rokopko wakon okanmaike, eyaŋo yemo wet qelaŋ mawakongi seuseu marat-kaikene. 11Kau! Kaisaleŋo ŋinane qom wikile ŋine mayakakatne eya wane ŋinano wele zok manerop ma wakonge, yemo ewe ewek, kine ma wakon ma wakon, borikine mapapka mapapka, kaet qeli qeliŋ, dere worik, sorin borin, makoboe makoboe! Kine kine yale ma wakonge, pakimo ŋinano borikine motke motke, so qesi qesiŋmi pamaike, eya wane kine tingo wakonge.
12Eso Na kibi yewa qe ŋibongole, yemo ŋei borikine make, eya wane midaka, me borikine okan onge eŋane midaka, don ŋidanŋem Kaisale wane kaitko ŋenano aŋa tewe tewek ŋinane kine wakoniyake, eya wane qe ŋibongole. 13Eso ŋine yale okanbi paki wetze ma pesekoi.
So wetze ma pesekoi eyaka midaka, ŋine koropŋo Titusi qesiŋka more wet pesek okankau zingeki ŋene zok manerop detŋem menaŋge. 14Na alakan sola ŋine mawa more Titusi olatkole, don yewa isi mi okange. Ŋine don ŋidanbe welerop okanwareke, yalewaka ŋine mawaŋune more Titus don olatkole, eya yaleka weleropka okange. 15Titusi eŋe ŋinano uki ŋine ewine kitou paki aŋaine tewekkoi, eŋe eya wane wetkeki paki wetineŋo ŋinane zok okan kamaike. 16Na wetne menaŋmaike, yemo ŋinane rawe paki dere qeka midaine maine gekale.
Currently Selected:
2 Korinti 7: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
