Bangec kisiu 30
30
Dedeseriyoacac dederecge
1Anu Mose ye Isracelngicngac yeneac kisicfunac ngicenarafocngina yoac yofi edeyunuec, “Kebungo yoac yofi dederecge angemmeec, ngeni imoc modacdacbisia. 2#Dser 23:21-23; Mat 5:33Ngic mong ye Kebuac kicfu yoac mong deserima deude me wiac monggac segekefudeac deseriude me wiac mong meudeac deserima deudeu ye yoac seria imoc mong mi wabeso ye yoac enaraunac maec imoc sasawa modacdacbeso.
Ngac ewemangnginagocac dedeseriyoac
3Anu ngac mong ye sebigboringoc mamaac amau kecmangoc Kebuac kicfu dedeseriyoac mong deseriude me wiac monggac segekefudeac deseriude me wiac mong meudeac deseriu 4mamango dedeseriyoara deseriecmoc negemma yoac mong mi deudeu ye dedeseriyoara sasawa dedarec imoc seria feude. 5Anu mamango wenac imohaingoc dedeseriyoara sasawa negemma kpetarimiudeu ine dedeseriyoarango me wiac meudeac deseriec dedeseriyoara imoc mi seriude. Ye mamango kpetarimiec imocac amma Kebungo kopocsiha waude.
6Me dedeseriyoarango wiac monggac segekefudeac mi negentegecma enacbibicngosac dedeseriyoac deserima deec, imoc femanungoc ngic meudeu 7eweango dedeseriyoac deec imoc negemma wenac imohaingoc mi kpetarimiudeu ngacac dedeseriyoacngo seribeso. 8Me eweango wenac imohaingoc dedeseriyoara sasawa imoc negemma kpetarimiudeu ine ye mi negentegecma enacbibihangosac dedeseriyoac imoc deu yoac deseriecac yoara imoc mi seriude anu Kebungo ngac imocac kopocsiha waude.
Eweango enemaac dedeseriyoac naric herecgeude
9Anu ngachotsec me ngac ngic mewa angana imoc yeneac dedeseriyoac sasawa deserigecde imocngo ine seriude.
10Nga ngac nenggac mongngo eweaac amau kecma yoac mong deserima deude me wiac monggac segekefude me wiac mong meudeac deserimanu 11eweango negemma imocac yoac mong mi dema kpetarimiudeu ye dedeseriyoara deseriec, imoc sasawa seriude. 12Nga eweango wenac imohaingoc dedeseriyoac enacbibihango deseriec imoc negemma herecgeude me kpae heimiudeu ine enaraunac dedeseriyoac sasawa mau deseriecmoc imoc eweango waecac Kebungo ifingoc kopocsiha waude. 13Anu ngic mong ye enemaac dedeseriyoac me wiac monggac segekefudeac meseribeso dema naric meseriude nga kpetarimibeso dema naric kpetarimiude. 14Nga ewea ye wenaha wenaha imocac yoac mong mi dema enemaac dedeseriyoac nga segekekecac yoac sasawa dema deseriec imoc meseriude. Ye dedeseriyoac imoc negemma wenac imohaingoc yoac mong mi deecac meseriudenoc. 15Nga ye dedeseriyoac negemma yaguc me wereckenu kecma mi kpetarimiudeu ye yoac dedarec nga ua sasawa meudeac dema deseriec imoc meseriude. Imoc yofiac, ye enemaac dedeseri negenec wenac imohai kpekpetariyoac mong mi deec. Ye ifi amma dedeseria meserima enemango faka mangana anecac ebic imoc tofohobeso.”
16Eweeneng botucnginau amma manggac nga naroanga sebigbori mong yegoc yeac amau kecandae yeneac botucnginau yoacseria ifinoc modacgecdeac Kebungo Mose dederecge ammiec.
Currently Selected:
Bangec kisiu 30: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
