Bangec kisiu 29
29
Hombannu sesegerec faifai
1Nga afo kpete sewenggac wenac kpete mocgu imohai kpekpedzuc kpetiac tacbisia. Anu wenac imohai ua mong mi mebisia. Ngeni wenac imohai trampet fifigec udumeng meficgebeso. 2Anu sesegerec hafoangoc ohogec homuna gombunga fiu Kebungo homunaac negenu ngereebeso. Imoc yofi, ngeni imohai burumakangiwa mocgu kifaya mocgu angana nga ramangiwa mocgu amma ramangiwa medaha sewen kifangina mocgu angana nga sebingina soronga yombong nga puringa kpac, imoc faikecbisia. 3Nga sese imocac yaka imoc wit uha gombunga yombong kerecdokugoc yerecgema yofi faibisia, ngeni burumakangiwagoc efakpete 3/10 faibisia nga ramangiwagoc efakpete 2/10 faibisia. 4Nga ramamedaha sewen tembuc tembucacsoc efakpete 1/10, ifi faikecbisia. 5Amma noningngiwa mong kopocsic meic meickeac sese dema momoc ohogecde imocngo ngaba meic meicke ua mengemmeude. 6Anu afo mong monggoc gboria erede imocac sesegerec hafoangoc ohogecde naso imohai imoc seseac yakagoc faikecbisia. Amma uamemesocac sesegerec imoc ifingoc naso imohai imocac yaka nga dokugoc faikecbisia. Ngeni imoc sasawa dederecgeyoacngina fede, imoc modacma Kebuac sesegerec hafoangoc ohogec homuna gombunga fiu yeng imoc hemma negenu ngereeude, ifi fingerudeac angkecbisia.
Kpetiackekecac kpekpedzucnaso
7 #
Sese 16:29-34
Anu afo kpete sewen imocac wenac ten, imohai yakasege kecma kpekpedzuc kpetiac tacbisia. Anu wenac imohai ua mong mi mebisia. 8Amma sesegerec hafoangoc oho ohoya imoc yofi ohogec homuna gombunga fiu Kebungo homunaac negenu ngereebeso. Ngeni burumakangiwa mocgu kifaya mocgu angana nga ramangiwa mong amma ramamedaha sewen kifangina mocgu angana amma sebingina soronga yombong nga puringa kpac, sese imoc faikecbisia. 9Faiyunuma sese imocac yaka dema wit uha gombunga yombong kerecdokugoc yerecgema faikecbisia. Ngeni burumakangiwaac efakpete 3/10 faibisia nga ramangiwa imocac efakpete 2/10 faibisia. 10Nga ramamedaha sewen mocgu mocgu sasawaacsoc efakpete 1/10, ifi faidacbisia. 11Faima noningngiwa mong imoc kopocsic meic meickeac sese dema faibisia. Nga ngeni ifingoc kopocsic nga ngaba meickegecdeac sesegerec nga wenacsocac sese hafoangoc dzekefude amma sese sasawaac yaka nga doku momoc faikecbisia.
Afo kpete sewenggac kpekpedzuc kpetiac
12Anu afo kpete sewen imocac wenac kpete fiftin ngeni imohai wenac sewenggacsoc Kebuac negensima nasotoa tacma kpekpedzuc kpetiac tacbisia. Anu wenac imohai ua mong mi mebisia. 13Amma ngeni sesegerec hafoangoc oho ohoac dema gerecac sese yofi mehama ohogec homuna gombunga fiu Kebungo homunaac negenu ngereebeso. Imoc burumakangiwa kifangina mocgu angana tetin#29:13 tetin 13. nga ramangiwa yohockang amma ramangiwa kifangina mocgu angana fotin, imoc sasawa yeneac sebingina soronga yombong nga puringa kpac, ifi faiyunukecbisia. 14Amma sese imoc yeneac yaka dema wit uha gombunga yombong kerecdokugoc yerecgema yofi faikecbisia, burumakangiwa kifaya mocgu angana tetin nga mocgu mocgu yeneac efakpete 3/10 faibisia nga ramangiwa yohockang mocgu mocgu yereac efakpete 2/10, ifi faikecbisia. 15Nga ramamedaha fotin mocgu mocgu sasawa yeneac efakpete 1/10, ifi faikecbisia. 16Amma ngeni ifingoc noningngiwa mong kopocsic meic meickeac sese dema faibisia. Amma ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.
Nasotoaac wenac kpete yohockang
17Nga wenac kpete yohockang imohai ine burumakangiwa twelf kifangina mocgu angana nga ramangiwa yohockang amma ramangiwa fotin kifangina mocgu angana amma sebingina soronga yombong nga puringa kpac faibisia. 18Ngeni sese imocgoc kpetenginaacsoc seseac yaka nga doku dedea fede imocacsoc torokpema faibisia. 19Amma ngeni ifingoc noningngiwa mong kopocsic meic meickeac sese dema faibisia. Amma ngeni ifingoc wenacsoc sese hafoangoc dzeande, imoc faima imocac yaka nga doku momoc faikecbisia.
Nasotoaac wenac kpete harebec
20Nga wenac kpete harebec imohai ine burumakangiwa ilewen nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac faidacbisia. 21Ngeni burumakangiwa nga ramangiwa amma ramamedaha kpetenginaacsoc seseac yakangina nga dokungina dedea imocacsoc momoc faikecbisia. 22Amma ngeni ifingoc noningngiwa mong kopocsic meic meickeac sese dema faibisia. Amma ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.
Nasotoaac wenac kpete neackpac
23Nga wenac kpete neackpac imohai burumakangiwa ten nga ramangiwa yohockang amma ramamedaha fotin#29:23 fotin 14. kifangina mocgu angana nga sebingina soronga yombong nga puringa kpac faiyunubisia. 24Amma burumakangiwa nga ramangiwa amma ramamedaha kpetenginaacsoc seseac yakangina nga dokungina dedea imocacsoc sesegoc torokpema faibisia. 25Anu ngeni ifingoc noningngiwa mong kopocsic meic meickeac sese dema faibisia. Nga ngeni ifingoc wenacsoc sese hafoangoc dzeande, imoc faima imocac yaka nga doku momoc faikecbisia.
Nasotoaac wenac kpete marimong
26Nga wenac kpete marimong imohai burumakangiwa nain nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac faidacbisia. 27Amma burumakangiwa nga ramangiwa amma ramamedaha kpetenginaacsoc seseac yaka nga dokugoc dedea imocacsoc torokpema faikecbisia. 28Nga ngeni ifingoc noningngiwa mong kopocsic meic meickeac sese dema faibisia. Anu ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.
Nasotoaac wenac kpete siks
29Nga wenac kpete siks imohai burumakangiwa eit nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac, imoc faidacbisia. 30Anu burumakangiwa nga ramangiwa amma ramamedaha kpetenginaacsoc seseac yaka nga doku dedea imocacsoc torokpema faikecbisia. 31Nga ngeni ifingoc noningngiwa mong kopocsic meic meickeac sese dema faibisia. Anu ngeni ifingoc wenacsoc sese hafoangoc dzeande, imoc faima imocac yaka nga doku momoc faikecbisia.
Nasotoaac wenac kpete sewen
32Nga wenac kpete sewen imohai burumakangiwa sewen nga ramangiwa yohockang amma ramamedaha fotin kifangina mocgu angana nga sebingina soronga yombong nga puringa kpac, ifi faiyunubisia. 33Amma burumakangiwa nga ramangiwa amma ramamedaha kpetenginaacsoc seseac yaka nga doku dedea, imocacsoc torokpema faikecbisia. 34Nga ngeni ifingoc noningngiwa mong kopocsic meic meickeac sese dema faibisia. Anu ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.
Nasotoaac wenac kpete eit
35Nga wenac kpete eit imohai kpekpedzucnaso kpetiac tacbisia amma uamemesoc ua mong mi mebisia. 36Tacma sesegerec hafoangoc ohogecdeac, gerecsese yofi mehama ohogec homuna gombunga fiu Kebungo homunaac negenu ngereebeso. Imoc burumakangiwa mocgu nga ramangiwa mocgu amma ramangiwa medaha sewen kifangina mocgu angana nga sebingina soronga yombong nga puringa kpac, ifi faiyunubisia. 37Anu burumakangiwa nga ramangiwa amma ramamedaha kpetenginaacsoc seseac yaka nga doku dedea, imocacsoc torokpema faiyunukecbisia. 38Nga ngeni ifingoc noningngiwa mong kopocsic meic meickeac sese dema faibisia. Anu ngeni ifingoc wenacsoc sese hafoangoc dzeande imoc faima imocac yaka nga doku momoc faikecbisia.
39Sese imoc ifinoc nasotoangina deserigec, imohai yombong Kebuohomikecbisia. Ngeni ifingoc yoac deserigecac sese nga ubangerecac sese faibisia. Imoc sesegerecngina andeac hafoangoc ohogecde me seseac yaka me doku me ruaeac sesengina faikecbisia.”
40Anu Mose ye Kebungo yoac dederecge ammiec, imoc sasawa Isracelngicngac edeyunudarec.
Currently Selected:
Bangec kisiu 29: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
