Bangec kisiu 13
13
Kenacanbangec hennegeng anggecdeac kenggec
1 Kebungo Mose yoac yofi edeec, 2“Ni Kenacanbangec imoc Isracelngicngac yemmebade. Nga ge ngic kisicfocngina twelf yeneac fingecsaheunacsoc ngicenara mocgu mocgu meisingyunuma sueyununa yeni sufu sufu kemma imoc hennegeng anggecdeac kembisia.”
3Ifi deu Mose ye Kebuacdederecgeyoac modacma Isracelngicngac yeneac kisicfocnginaacsoc enaramemengicfocngina Pacaran bangec kisiunac sueyunuu kenggec. 4Kenggec imoc yeneac kpacngina yofi:
Recuwenggac kisicfunac Dzakur medaha Sammua.
5Simeconggac kisicfunac Hori medaha Safat.
6Yehudaac kisicfunac Yefunne medaha Kalew.
7Yissaskarac kisicfunac Yosef medaha Yicgal.
8Efrayimac kisicfunac Nun medaha Hoseac.
9Benyaminggac kisicfunac Rafuc medaha Paleti.
10Dzewulunggac kisicfunac Sodi medaha Gaddicel.
11Yosefac kisicfunac Manasseac kisicfunac Susi medaha Gaddi.
12Danggac kisicfunac Gemalli medaha Ammicel.
13Aserac kisicfunac Mikacel medaha Setur.
14Naftaliac kisicfunac Wofesi medaha Nahebi.
15Amma Gadac kisicfunac Maki medaha Gecucel.
16Mosengo ngic imoc sueyunuu yeneng sufu sufuu bangec hennegeng anggecdeac kenggec, yeneac kpacngina ifinoc. Nga ye Nun medaha Hoseac#13:16 Hoseac Imocac titiha onggonnunude me ebicfunac mesinunude. kpara Yehosuac#13:16 Yehosuac Imocac titiha Kebungo onggonnunude me Kebungo ebicfunac mesinunude. kparec.
Sueyunuec
17Anu Mose ye ngic imoc yeni Kenacanbangec sufu sufu hennegeng anggecdeac yoac yofi edeyunuma sueyunuec, “Ngeni Negewbangecfu kemma imoc ferahema sifecbangecfu embisia. 18Emma bangec imoc siriha dafia nga ngicngac imohai kecdae yeni kucnginagoc me kucngina kpac amma yeni kpetengina efeanec me homac, imoc hennegeng ambisia. 19Nga bangec kecdae, imoc dafia, gombunga me mangana, nga imocac manau kecdae imoc kporucamabangecfu kecdae me odaseriaac manau kecdae. 20Amma bangec imoc kerehagoc me gueha kpac, nga imohai ickate fede me kpac imoc momoc hendacbisia. Ngeni kengeha kpac kemma bangec imohacnac semenggac fora goa mehabisia.” Wainggbomea hanahema fora anec imocac naso anecac ifi deec.
Kenggec
21Anu yeni emma bangec sufu sufu hennegeng anggecdeac Tsin bangec kisiunac kengkecma Rehow Hamat amabangec wegenahau fekende bangec imoc sufu sufu hennegeng anggec. 22Nga yeni emma Negewbangecfu sing kemma Heweron imohai sikegec. Imohai Anak fingecsaheunac ahimangngic, sesaingic nga talmaingic kecgec. Anu Heweron taong megec, yeni imoc waraima megec kifa sewen kemmanu aigitangic Aigitabangecfu Tsocan megec. 23Nga yeni Eskol tumiau kemma imohacnac waing fawa mong wiragoc herecgema ngic yohockangngo tofohooc#13:23 ngic yohockangngo tofohooc Ngic yohockang yeri waing fawa wiragoc mocgu ifi tofohooc imoc hemma yofi negenggec bangec imoc kerehagoc yombong. amma pommegranat#13:23 pommegranat Icgbomea imocac onga hafac 185 imohai henna. icgbomea imohacnac goa nga fig#13:23 fig imoc deduamiti gboriau hafac 709 imohai henna. icgbomea imohacnac goa mema dzigenema hagec. 24Nga waing fawa wiragoc herecgegec imocac amma isracelngic yeneng bangec imocac kpara Eskolac#13:24 Eskolac imocac titiha waing fawa wiragoc. tumiatoa emu fede, ifi kpacgec. 25Nga yeni bangec sufu sufu hennegeng amma kecma wenac fotiac wisic wisickeau dzigenema kenggec.
Dzigenegec
26Kemma Mose nga Aharon amma Isracelac ngichabu hafoangoc Pacaran bangeckisiu Kades amau kecgec yenearu dzigenema hagec. Hama yeri nga ngichabu hafoangoc yoacsiduc ayemmema bangec imocac icgbomea megec imoc edzacyunugec. 27Edzacyunuma Mose yofi edegec, “Ge suenununec neni bangec imohai kensikeing. Fora yombong, bangec imohai namu nga hanifosoc doku isoc hakecde#13:27 namu nga hanifosoc doku isoc hakecde imoc kereheagoc nga dokuyagoc. amma imocac icgbomeaac foraya yomoc. 28Anu ngicngacareng bangec imohai kecdae yeni kucnginagoc nga taontoangina imoc yeni sasawa kuneng yombong amma odangina seria. Amma imohai Anakac fingecsahe#13:28 Anakac fingecsahe yeni ngic sasawa feracyunuma Goliat isoc ngic herea yombong anggec. imoc yeni momoc yenening. 29Amalekareng yeni Negewbangecfu kecdae nga hitingic, yewusingic nga amoringic yeni sifecbangecfu kecdae. Amma kenacangngic yeni ine kondung tegiau nga Yardendokuac tegiau kecdae.” 30Anu Kalew yeng ngicngacareng yeni kengec wama wosongina makiudeac Moseac kicfu yofi edeyunuec, “Nenang bic yombong emma bangec imoc mebisina. Fora yombong, nenang naric serima imoc menide.”
31Ifi deu ngic yegoc enggec, yeneng ine yofi degec, “Nenang ngicngac imoc naric mi feracyunuma yununide. Nga yeneac kucngo nenang kuc feraheyombonggede.” 32Yeni ifi dema bangec sufu sufu hennegeng anggec imocac ebicac yoacsiduc hania hania Isracelngicngac yofi ayemmegec, “Bangec sufu sufuu hennegeng annideac ferecgema kening, imocngo ngicngacfora neyunuude. Nga ngicngac sasawa yenening yeni herea nga kucnginagoc. 33#Fing 6:4Nga imohai nefilingic#13:33 nefilingic imoc Anakac fingecsaheunac ngic herea yombong. yenenning amma nenang engemma negenni ipua isoc aning. Anu yeneac kicfu neni gisic bisicbisic mong isocnoc aning.”
Currently Selected:
Bangec kisiu 13: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
