Mataio 14
14
Yohane dokunadzic kpegec
Mrk 6:14-29; Ruk 3:19-20; 9:7-9
1Naso imohai Yesuac siducngo gawanatoa Herode yeac kedzacfu kemeu 2yeng negemma uamedacfora edeyunuec, “Imoc Yohane dokunadzic. Ye homecfunac gborima yarecac amma faka kuhagoc meudeac kuc femide.”
3-4 #
Sese 18:16; 20:21; Ruk 3:19-20 Imoc yofiac, Herodengo warac munea Firipoac enema Herodia hamangec meec. Meu Yohanengo yofi edeec, “Ge ngac imoc mema yegoc kecnade, imoc singngo mi dede.” Ifi deecac Herodengo Yohane mema hanimaria kpema witicamau faima 5#Mat 21:26kpehomebeso negensiec. Nga ngicngac yeneng ye profete, ifi negenggecac amma kengec anec.
6Anu Herodeac fingec fingecnaso hau yeni adzoroma tacmagec Herodiaac naroangngo yeneac botucfu yegec fedeu Herodengo hensongo ammima 7naroangngo wiac monggac ammiu imoc naric miudeac nemuya monggac kpacfu deseriec. 8Deseriu naroang ye nonggeango negen negeng miu Herode edeec, “Ge Yohane dokunadzicac oruha terau faima mehama nenna.” 9Ifi deu negemma ngictau ye ubaebic meec. Amma ye ine ngicngac tacgec yeneac kicfu yoac bic deseriecac amma imoc negensima naroangngo deec, imoc migecdeac deserima 10wasaingic sueu Yohane witicamau tarec, ye ubea herecgebesonga kenec. 11Kemma Yohaneac ubea kperecgema hatea terau faima mehama naroang miu nonggeaaru mekenec. 12Anu Yohane medacfora yeni kemma farenga mehama tonggoma kemma Yesu siduc imoc ammigec.
Yaka gumecyunuec
Mrk 6:31-44; Ruk 9:10-17; Yoh 6:1-13
13Ammagec Yesungo siduc imoc negemma amabangec imoc wama gombau emma medacfora yenigoc amabangec mong ngiha kpacfu, ihai ye tembuha tarudeac kenggec. Ammanu ngicngac habutoa yeneng imoc bic negemma taongngina wama hanising ye modacma kenggec. 14Kenggec Yesungo gombaunac mama ngicngac habutoa ifi yenemma ubea manganeu ngicngac hafeinginagoc mengereyunuec. 15Mengereyunuma kecmanu ama marai anu medacfora yeneng yearu hama degec, “Bangec yomoc ngiha kpac anu naso bic kendacdeac ngicngac habutoa sueyununa amabangec goau kenggec. Yeni kemma yenaoc yaka bummenec anggec.” 16Ifi degec yeng yofi edeyunuec, “Yeni kenggecdeacsoc mi andae, ngeni ngenaoc yaka gumecyunugec.” 17Ifi deu degec, “Neni ic sogong marimong nga kondungyang yohockang yoc mekecdimbe.” 18Ifi degec yeng yofi deec, “Ngeni yaka imoc nearu mehagec.” 19#Mat 15:35-39; Mrk 8:6-10Yesungo ifi dema ngicngac habutoa kpindzinnu matacgecdeac edeyunuec. Edeyunuma ic sogong marimong nga kondungyang yohockang, imoc mema kiwa fiu kurumennu enu yaka keneheec. Kenehema ic sogong imoc tuema medacfora yemmeu yeneng imoc mema ngicngac habutoa yemmegec negec. 20Nga yeni sasawango negebec amma yaka tosea neti anggec tarec, imoc kpedzucnegec kemema sakac 12 wakeec. 21Ngicngac yaka negec, ngic yeneac kpete imoc 5 tauseng isoc. Nga ngacnambarac yeneac kpetengina imoc mong mi megec.
Dzohong witiau kenec
Mrk 6:45-52; Yoh 6:16-21
22Yesungo medacfora sueyunuu yeni gombau emma dzohong nobocgeng waraigecdeac kenggec. Kemmagec ye yengenaoc kecma ngicngac habutoa faiyunuu 23#Ruk 6:12; 9:28kendacgec. Kendacgec ye numuudeac tikiu enu ama toforeu tembuha tarec. 24Taru gombango dzohong dzongiau kensikemanu firangngo kenggecfusing hama siri kpema gomba mekemmeha anec. 25Ifi anu ama wereckembesonga ammanu Yesungo dzohong witiau titi medacfora yenearu kenec. 26#Ruk 24:37Ye dzohong witiau titikenu medacfora yeneng hemma yofi degec, “Wosongango hade.” Ifi dema kengec amma arohogec. 27Arohogec Yesungo negemma imohaingoc yofi edeyunuec, “Ngeni wosongina makiu, imoc ni, ngeni mi kengecngunuu.”#14:27 Grik yoacfu ye “Ego eimi.” deec. Imocac titiha yohockang, “Imoc ni.” me “Ni kecduaengoc.” Imoc Anutuac kpara mong Anutuac angerongo Mose edeec.
Petorongo doku witiau kenec
28Ifi deu Petorongo meremma deec, “Kebu, ge geanggaoc hanec isoc, ni doku witiau tima tima gearu habadeac edenuna.” 29Ifi deu Yesungo deec, “Ge hana.” Ifi deu Petoro ye gombaunac mama doku witiau tima Yesuaru kenec. 30Kemmanu firangtoa kpeu hemma kengec amma ine dokuu kemema kpacma deec, “Kebu, ge meficnuna.” 31#Mat 8:26; Mrk 4:39Ifi deu Yesungo maria bic sinema Petoroac mari mema miacma yofi edeec, “Ngic ge negen negensingga kapia, ge nocac negengyohoc andang?” 32Ifi deu gombau emmaec imohaingoc firang kpac anec. 33Anu gombau tacgec, yeneng Yesu dengerema yofi degec, “Foracngoc, ge Anutuac Medac.”
Ngicngac hafeinginagoc
Mrk 6:53-56
34Anu yeni dzohong ferecgema Genesarete bangecfu kensikegec. 35Kensikemagec bangec imocac ngic yeneng Yesu bic hensima yoac imoc faigec bangec imohai yerecgeu yeni ngicngac hafeinginagoc yearu meyunudacma hagec. 36#Mat 9:20-21Hama hafeinginagoc yeni ngakpia susiaac witihasac kpeseregecdeac derecgegec. Amma kpeseregec, yeni sasawango ngereedacgec.
© (Active), Wycliffe Bible Translators, Inc. All rights reserved.