Mataio 10
10
Yesuac medacfora
Mrk 3:13-19; Ruk 6:12-16
1 #
Mrk 6:7; Ruk 9:1 Yesungo medacfora 12 kpacyunuu hagec ngicngac yenearunac asu seuhagoc kporacyemmegecdeac uayoac yemmeec nga hafei hania hania amma ngicngac kucmamanginagoc sasawa mengereyunugecdeac uayoac kuhagoc yemmeec. 2Aposoro 12, yeneac kpacngina yofi, Simong kpara mong Petoro nga munea Anderea amma Sebedaioac medachora Yakobo nga munea Yohane. 3Firipo nga Batoromaio nga Toma amma takesimemengic Mataio, Yakobo Arifaioac medac nga Tadaio 4Amma Simong Kananaio amma Yuda Kariotonac. Ngic yeng kecma Yesu kerereu megec.#10:4 Simonggac kpara mong Dzerote. Ruka 6:15.
Uayoac deyemmeec
Mrk 6:7-13; Ruk 9:1-5
5Yesungo medacfora 12 imocnoc sueyunuma yoac yofi dema edeyunuec, “Ngeni bangec monnunac ngicngac Anutu mi negemmidae, yeneac bangecfu nga samariangic yeneac taonnu mi kembisia, kpac. 6#Yer 50:6Israehabuu ngicngac rama sufu sufuya, ifi isoc kecdae, ngeni yenearu kembisia. 7#Mat 3:2; 4:17; Ruk 10:9, 11Ngeni kemma yofi dekperagiyemmebisia, kurumenggac eucerereng imoc bic mewegenengunude. 8Ifi dekperagiyemmemma ngicngac hafeigoc mengereyunuma homemea megboriyunubisia nga kukuserigoc sebingina ngereeudeac mengereyunuma hadehade nga yafing kporacyunubisia. Ni kuc imoc ubangerecac nga buma kpac ngemmedua, imocac amma ngeni ubangerecac nga buma kpac memefic imoc yemmebisia.
9 #
Ruk 10:4
Ngeni dzo gol nga silwa nga kopango#10:9 Kopa imoc aieng siriha mong karaya sacsac 1 nga 2 toea isoc. memea, imoc mi meficgebisia nga wiac ifia fadeng nabehau mi faima mekecbisia. 10#Ruk 10:7; 1Kor 9:14Ngicngac yeneng ua mekecmagec ua imocngo yakangina meficgebeso, faka imoc ngereeude. Imocac ngeni singgac hie me ngakpi yohockang me hanitabe me yasu mong mi mekembisia. 11Amma taong me amabangec monnu kenggecde, ngeni imohai ngic mong yegoc tacgecdeac siric ande, ye meficgebisia. Meficgema yegoc tacyac anggec wisickeu faima kembisia. 12#Ruk 10:5-6Ngeni ama imohai emma wenacngerec ruaeyoacgoc debisia. 13Ifi degec ama imoc ruae naric meudeac siriha anudeu, ruaengo ama imohai hama feude. Nga ama imoc ye ruaea naric mi meudeac siriha anudeu ruae imocngo ngenanggaru monggoc dzigenengemmeude. 14#Ruk 10:10-12; Aps 13:51Nga mongngo mi hoangngunuma yoacngina mi negenudeu ngeneng ama me taong imoc wama haninginaunac yube kpegec mau kembisia. 15#Mat 11:24; Yud 7Foracngoc, kecma ising ising nasotoau taong imocac ngicngac yeneac ebicngo Sodong nga Gomora taong, yereac ebic ferahebesande, imoc edengunuduae.
Ebic haude
Mrk 13:9-13; Ruk 21:12-17; 12:2-9
16 #
Ruk 10:3; Rom 16:19 Negendae, rama yeneng katekasi yeneac botucfu kecdae, ni siriha imocacsoc suengunuduae. Imocac ngeni boidzoc isoc negen negentegecnginagoc kecbisia nga kebesac neng, yeni isoc manganangina kpac kecbisia. 17#Mrk 13:9-11; Ruk 12:11-12; 21:12-15Ngeni ngic yeneac negentegecma kecbisia. Yeni yoacfu faingunugecde nga kpekpeturang amanginau dzikacngo ebiria ngunugecde. 18Nga ngicngac yeni neac amma mengunuma kemma gawana nga ngictau yeneac kicfu faingunugecde. Ifi anggec ngeneng yeni nga bangec monnunac ngicngac Anutu mi negemmidae, ngic imoc momoc siduc gombung dekperagiyemmebisia. 19Nga ngicngac yeneac kicfu faingunugec yoacfu nanggecde, imohai ngeni noc yoac degecde me dafi degecde, imocac negengyohoc mong mi ambisia. Kebungo naso imohainoc yoac ngemmeu ngeni imoc debisia. 20#Yoh 14:26Ngeni naso imohai ngenaoc yoac mi degecde, kpac. Mangnginaac Asungo yoac enacnginau faiu imoc degecde.
21 #
Mika 7:6; Mat 10:35; Mrk 13:12; Ruk 21:16 Imohai dara mongngo munea enara yeneac mariu faiu yeneng ye homecfu faigecde nga manggac mongngo faka imocngoc medahaac anude. Nga nambarac yeneng nonggomangfocngina deengdema ayemmema homecfu faiyunugecde. 22Nga neac kpacac amma ngicngac sasawa yeneng ubango ukungunugecde. Nga ngic mong ye seserigoc kecmanu nasotoa haude, yeng komoc kpebesande. 23Ngeni taong monnu kecgec ngicngac yeneng ngunukporac angemmegec ngeni taong imoc wama worama monnu kembisia. Foracngoc, ngeni Isracel bangecfu taong sasawa fekende, ihai uana mi mesimagec Ngicac Medacngo haude.
Negengising ambesonga
24 #
Ruk 6:40; Yoh 13:16; 15:20 Negen negeng medac mongngo kpoukpouya yeac engena mi anude nga wanacngic mong ye mingina yeac engena mi anude, kpac. 25#Mat 9:34; 12:24; Mrk 3:22; Ruk 11:15Negen negeng medac ye kpoukpouyaac siric isoc ambeso nga wanacngic ye minginaac siric isoc ambeso, imocngo naric anude. Nga amaac enara yeac Bedzeburu demigec isoc amafora ngenearu kpac ifia mangana monggoc kpacngunugecde.
26 #
Mrk 4:22; Ruk 8:17 Wiac mong sangoyagoc fede, imoc kecma nonongkac fingectegerude nga wiac sufu sufuya fede, imoc negendacgecde. Imocac ngeni yeneac mi kengecngunubeso. 27Ni tofocnac nasou yoac edengunuduae, ngeni imoc kperagiau debisia. Nga sangicfu kedzacnginau dedea, ngeni ama witiau namma imoc deyadigec negendacbisia. 28#Rom 8:31; Yak 4:12Ngicngac yeni sebingina kpehomema ubaongangina naric mi kpehomegecde, ngeni yeneac mi kengecngunubeso. Anutungo sebi nga ubaonga yerahafoc hofeu memanganeude, ngeni yeac ine damungunubeso. 29Ngicngac yeni nengbisic yohockang faigec toea mocgu sacsacngo bummeandae. Nga neng yenearunac mongngo bangecfu makpeu Mangnginango imoc bic negenude. 30Nga ngeneac orucdzonginaac kpete, imoc ifingoc osoosodara. 31#Mat 6:26Ngeneng nengbisic homac feracyunudae, imocac amma ngeni mi damungunubeso. 32Mong ye ngic yeneac kicfu neac deande, ‘Ni yeac areng.’ Neng yeac ifingoc Manna kurumennu kecde, yeac kicfu yofi debade, ‘Ye neac ngic.’ 33#Mrk 8:38; Ruk 9:26; 2Tim 2:12Nga mong ye ngic yeneac kicfu neac kpacna busickpeu neng Manna kurumennu kecde, yeac kicfu yeac kpac ifingoc busic kpebade.
Ruae meficgeudeac mi maec
Ruk 12:51-53; 14:26-27; Mrk 9:41
34‘Ye bangecfu ruae meficgeudeac maec.’ ngeni neac ifi mi negembisia, kpac. Ni ruae meficgebadeac mi mayai, ni ine yare meficgebadeac mayai.
35‘Medac ye mamagoc tohoemeecde nga naroang ye nonggeagoc tohoemeecde. Nga ngac ye erangiagoc tohoemeecde, ifi fingerudeac mayai. 36Ngicngac ngic monggac ameau yombong arengfora kecdae, yenennoc ngabafora anggecde.’ (Mika 7:6)
37Ngic mong ye nonggomanghora heresongogoc hoangyuruma neac songo mamea negengande, ye neac areng anudeac siric mi anude. Nga mong ye medaha me naroanga heresongogoc hoanggema neac songo mamea negenude, yeng neac areng kefudeac siric mi anude. 38#Mat 16:24-25; Mrk 8:34-35; Ruk 9:23-24; 17:33; Yoh 12:25Ngic mong ye mariponga tofohoma ni mi modacnuude, yeng neac areng kefudeac siric mi anude. 39Mong ye yengena kekeha meficgema segerede, ye kekeha sufumiude. Nga mong ye neac amma kekeha wade, ye kekeha meficgeude.
40 #
Mrk 9:37; Ruk 10:16; Yoh 13:20 Ngic mongngo ngeni heitaingunuude, yeng ni heitainuude. Amma ni heitainuude, yeng Anutu suenuec, ye heitaiude. 41Nga ngic mong ye profete mong hemma ngic imoc ye profete kecde, ifi negemma ye heitaiude, yeng profeteac bung meude. Amma mongngo ngic ye dindingac kecdeac amma ngic imoc heitaiude, ye ngicngac dindingac yeneac bung meude. 42Mongngo medac kapia mong hemma neac medac andeac negemma doku nomang kpakenecfu kpemiu neudeu yeng kecma bumaac mi obohoude nga obohobesande, imoc fora yombong.”
© (Active), Wycliffe Bible Translators, Inc. All rights reserved.