Fingec fingec 45

Yosefngo haniaya dekperagiec

1 # Aps 7:13 Anu Yosef ye aigitangic amea manau tacgec yeneac kicfu ubia manganeu kiarudeac amma yofi dema kparec, “Ngicfocna sasawa ngeni bangecfu kemedacgec.” Ifi deu kemedacgec ye mocgusac yenigoc tacma haniaya dacfora dekperagima edeyunuec. 2Edeyunuma seriangoc kiaru aigitangic yeni negenggec nga Parecoac amau tacgec yeni ifingoc negenggec. 3#Fing 43:28Anu ye dacfora yofi dema edeyunuec, “Ni Yosef, manna kecde me?” Ifi deu dacfora yeac kicfu nanggec yeni kengecngo mehomeyunuu yoac turunga mong mi merenggec. 4Anu ye dacfora yofi dema edeyunuec, “Ngeni nearu wegenac hagec.” Deu yeni yearu wegenac kenggec yofi deec, “Ni munangina Yosef. Ngeni Aigita bangecfu suenugec hayai ni yomocnoc.”

Anutungo suenuu waraima hayai

5 # Fing 50:20 “Ngeni ubaebic mi mebisia nga ngeni ni fainugec bummenugec imocac ubahodung mi ambisia. Imoc yofiac, ngicngac kekecngina onggonggebadeac ngeni yei suenugec. Anu Anutungo suenuu waraima hayai. 6Yofinenggac bangecninau bodinasou kecmina kifa yohockang bic wisickede. Nga kifa 5 fede imocac manau bangec mong mi fukegecde nga semengfora mong mi mekpedzuc anggecde. 7Anu ngeni kecgecdeac Anutungo suenuu waraingemmema hayai. Ifi anu ye faka kuneng amma ngickomoha onggongngunuu ngeneac fingecsahengo bangecfu mi kpac anude. 8Imocac ngeneng mi suenugec, Anutungo suenuu hayai. Yeng Pareco mang ammimanu amatoayaac ngic kuneng nga Aigita bangectoa imocac enaratoa amma kecbadeac fainuec.”

Mannina ye habeso

9 # Aps 7:14 Imocac ngeni bicbic yombong kemma manna yofi dema edebisia, “Medacga Yosef ye geac yoac yofi dedac, ‘Anutungo Aigita bangec sasawa imocac enaratoa fainuu kecduae. Imocac ge naso mi ukuma nearu bic yombong hana. 10Hama Gosen bangec neac wegenac fede imohai kecnade. Ge nga esamedacfocga nga ramaburumakafocga habunginasoc amma wiac sasawa fegendemoc ngeni sasawa imohai naric kecgecde. 11Anu bodinaso imoc kifa 5 monggoc fedeac ge ihai kecna henggareng anggembade. Ge nga esamedacfocga amma ngicngacfocga sasawa ngeni homeckpai ambauac ifi ambesena.’ ”

12“Ni yaguc neannaoc ngenigoc yoacyoac anduae imoc ngeni kicnginango nendae nga munayombonna Benyamin ye ifingoc kiwango nende. 13Ngeni nendae anu Aigita bangecfu ngicngac yeni eweheihei kuneng anenggec kecduae imoc nga wiac sasawa hennegeng andae imocac siduc manna ammidacbisia. Amma manna yei bic yombong haudeac edebisia.” 14Ifi dema munia Benyamin tofohoma titikokoc ammiu kiacemeoc. 15Amma dacfora sasawa ifingoc tofohoyunuma kokocyunuma kiarec. Ifi ayemmeu wisickeu dacfora yeni yegoc yoacyoac anggec.

Parecongo Aigita bangecfu heitaiyunuec

16Anu Parecoac amau siduc yofi kenec, “Yosef dacmunafora yeni hadau.” Ifi degec negemma Pareco nga enac tofoc tofohofora yeni imocac negenggec ngereec. 17Anu Parecongo Yosef yofi dema edeec, “Dacmunafocga yofi dema edeyununa, ‘Ngeni yakagedangngina donggifocngina yeneac witinginau faima Kenacan bangecfu dzigenema kenggec. 18Kemma mangngina nga enengmedacfocngina nearu wangecyunuma habisia. Hagec ni Aigita bangecfu wiac gombung gombung fede imoc ngemmebade. Ngemmeba ngeni bangec yomocac semeng kerehagoc nema kecbisia.’

19Anu ge yofi dema edeyunubesena, ‘Ngeni yofi ambisia. Ngeni enengmedacfocngina yeneac amma Aigita bangecfunac keretac mekemma meyunuma mangngina meficgegec keretafu enu habisia. 20Aigita bangecfu wiac gombunga gombunga fede imoc ngemmeba ngeneac anudeac ngeni wiacngina goa imocac negengyohoc mi ambisia.’ ” 21Ifi deu Isracel medacfora yeni ifi anggec. Yosef ye Parecoac enac tofohoma keretac yemmema singgac yaka ifingoc yemmeec. 22#Fing 43:34; 2Ngt 5:5Yemmema dacfora sasawa ngakpi mocgu mocgu yemmedacma munia Benyamin ine ngakpi 5 nga silwadzo 300 miec. 23Anu mamaac donggingiwa ten imocac witinginau Aigita bangecfunac wiac gombunga gombunga faiec amma donggingagera teng meyunuma imohai wit nga yaka amma mamaac amma singgac maung fau kenec. 24Ifi amma dacfora sueyunuma yofi dema edeyunuec, “Ngeni sinnu kemma ngaba mi angemebisia.”

Yosef ye kecde Yacakow ifi edegec

25Anu yeni Aigita bangecfunac kengkecma Kenacan bangecfu mangngina Yacakowaru sikegec. 26Kensikema yoacsiduc yofi ammigec, “Yosef ye kecdengoc nga yeng Aigita bangec sasawa imocac enaratoa amma kecde.” Ifi degec ye yeneac yoacsiduc imoc negenu fora mi anu ye kuha maec. 27#Fing 45:19Anu yeni Yosefngo yoac sasawa edeyunuec imoc ededacgec. Nga ye mama kenudeac keretac fau kenec imoc hemma mangngina Yacakowngo negenu fora anu ongaasuya kuc monggoc meec. 28#Fing 46:30Anu ye yofi deec, “Soha, medacna Yosef ye kecde imocac ni mi homemangoc bic kemma hembade.”

Currently Selected:

Fingec fingec 45: Ded

Highlight

Copy

Compare