Esta 2
2
Estango ngactau anec
1Ifi anggec ngictau Dzeksiac herea kuha mamanu Wasitingo faka ammiu yearunac meickeudeac deec nga ngactau monggoc mi kefudeac deseriec, imoc negensiec. 2Anu ngictauac enacdedefora yegoc wegenac kecandae, yeneng yofi degec. “Nenang ngac siricngina gombunga ngicfu mi kengkena ifia mong ngictauac meficyunubisina. 3Amma ngictaungo ngicenara goa meisingyunuu yeneng prowins sasawau kemma ngac naroang siric kerengkerengnginagoc isingyunuma Susa amaherec seriau ngac yeneac amagerec#2:3 Ngac amagerec Imoc ngac yeni ngacamau kenggec, imoc ngictauac enengfora sasawa nga yenearunac mong meisinggeu ngactau anude. feec, imohai meyunu hagecdeac edeyunuec. Anu yeneng ihai me-mengere ayemmegec siricngina gombunga anudeac ngickuneng Hegaiac kucac bageu faiyunubisia. 4Anu ngictaungo ngac damoc hensongo ammiu yeng ngactau Wasitiac tatac mebeso.” Ifi degec, ngictaungo dederecge imocac negenu naric anu modarec.
5Anu Susa amaherec seriau Yehudaareng Binyamin kisicfunac ngic mong kefec, kpara Modekai. Ye Yaireac medac nga Yaire ye Simeiac medac nga Simeingo Kisiac medac. 6Anu Newukadnetsarngo Babilonggac ngictau kefec imohai yeng Yehuda yeneac ngictau Yehoiaking nga ngicngacfora Yerusalaimnunac witicuau meyunu kenec, naso imohai Modekaiac esangabofora yeni ifingoc meyunuma kenggec. 7Ifi anu Modekaingo waehaac naroang Hadasa kpara mong Esta, ye ngacnaroang kereng edocbedoha. Ye nonggomama homeec beging kefecac amma Modekaingo mema yengena naroang isoc garenggeec.
8Kecma ngictau Dzeksiac dedeseri nga dedea deec imoc negendacgec. Anu ngacnaroang kerengkereng wangecyunuma ngictau enengfora yeneac amagerec seria Susa ihai kemma ngickuneng Hegaiac#2:8 Ngickuneng Hegai Ngic imoc ye yambe gbomea meicmeikea. mariu faiyunugec. Ammanu Esta ifingoc ngictauac amagerecfu hesicke kemma ngac amaac gareng Hegai yeac mariu faigec. 9Anu ngickuneng Hegaingo Esta henu wedzuyau heiu imohaingoc sebiaac kerec homuna gombunga nga nenesemeng mengereec. Amma ngictauac amagerec ihai ngac amaac amamana mong gombungau Esta garenggegecdeac ngac seweng meisingyunuma yegoc imohai faiyunuec.
10Anu Modekaingo Esta ye dahanac nga meracac arenunac imoc mi deficgeudeac derahaec. 11Ifi anu Modekaingo naso imohai Esta ye dafi tacde nga noc faka fingecmide, dema imocac hania negenudeac ngac amaherec feec, ihaigeng faiheng faiheng tatahoc kengha angkefec.
12Ifi anu yeni ngacnaroang imoc kifa mocguac manau sebingina me-mengere ayemmekecmagec ngictau Dzeksiaru hesicyunu kengkenggac nasongo haande. Afo 6 imoc sebiac kerec homuna gombunga nadzicyemmegecde nga afo noboha 6 imohai ine tokic nga hucosu sebinginau hosoma meusuranggeandae. 13Naso imohai ngacnaroang mongngo ngac amaunac ngakpikporuc dafia heima ngictauac amau kenudeac deu, yengena songea modacma miandae. 14Ngac imoc ye maraiac kemma ngictaugoc feu ama wereckenu dzigenema ngac amaherec monnu kemma ngictauac enacdedea ngickuneng Sagasi#2:14 Ngickuneng SagasiNgic imoc ye yambe gbomea heiheia, yeng ngac ngictaungo bic yenenec imoc yeni yeac mariu faiyunuu garengyunukefec. Anu yeni yenang songou ngictauaru mi kengandae, yengenaoc songea ngac monggac anu kparau kparu yearu hesicke kengandae.
15Ifi kecma Modekaingo mama kapia Abihailac naroang Esta garenggekefec, yeng ngictauaru kenudeac nasongo hau Estango wiac mong me monggac dekpesi mi anec. Ammanu ngictauac enacdedea ngickuneng Hegai yeng dederecge ammiec, imocac sirihau modaru ngicngac sasawa yeneng Estaac negenggec ngereec. 16Naso imohai ngictau Dzeksingo ngictau ua mema kecmanu kifa sewen anec. Anu kifa imocac afo ten nga afo kpara Tebet#2:16 TebetImoc Isracel yeneac afo ten, nenang afo 9 Soarop imoc Septemba ande. imohai Esta ngictauac kekecfu wangecma kenggec.
17Anu ngictaungo ngacnaroang goa ngicfu mi kengkena yeneac songo negenec, imoc Estango feracyunuma yeac here ferahau ngictaungo Esta hembokoec. Ifi amma ngictaungo ngactauac ira imoc mema Esta heimiu yeng Wasitiac tatac meec. 18Anu ngictaungo Estaac amma ngickiwa nga ngicenara yenigoc neneyaka negecdeac me-mengere anec. Ifi amma kecnegeng nasongina fingerudeac deu siduc imoc prowins sasawa sokodarec. Sokomanu ubangerecac iwai goa ifingoc hendzicma faiu yenearu kenec.
19Anu ngac ngicfu mi kengkena yeni monggoc kpedzucyunugec, naso imohai Modekaingo ngictauac oda naguu tarec. 20Anu Estango kapiaunacngoc Modekaiac yoac modacma kecma yadiecac amma Modekaingo dederac ammiec isoc modacma ine yengena dahacnac nga meracac arenunac, imoc mi deficdeficge yengenaarusac feu kefec.
Modekaingo dekiricngira hengfingerec
21Modekaingo ngictauac oda naguyau tarec naso imohai ngictauac nagu gareng yohockang Biktana nga Teres, yereng ngictau Dzeksiac herebu negemma kpebucgeecdeac dekiric anoc. 22Ifi anec Modekaingo imoc negemma faka imocac ngactau Esta edeec. Ifi edeu yeng ngictauaru kemma Modekaingo yoac ifi edenude dema edeec. 23Anu yoac imocac hania mesigec fora anu nagu gareng yohockang imoc yeri icfu gbedicyurugec homeoc. Ifi amma faka imocac siduc imoc ngictauac siduc kibiu ohogec.
© (Active), Wycliffe Bible Translators, Inc. All rights reserved.