El Apocalipsis 10

Ia jinokuechi nuu Dios yindaꞌa ya in liuru luluu

1Yun te ni jini san inka ia ndakui ja jinokuechi nuu Dios ja makuun ya ichi andivi in nuu viko, te ichi xini ya oo in tikoyeꞌnde. Te yeꞌe nuu ya na kuinio nikandii, te siꞌin ya, chi vi na kuinio ja kandaꞌa kuakuaꞌa. 2Te yindaꞌa ya in liuru luluu ja nune nuu. Te ni jani ya siꞌin kuaꞌa ya nuu ndute mar, te siꞌin satni ya nuu ñuꞌu yichi. 3Yun te ni kana jaa ya na kuinio nuu ndaꞌi in ndikaꞌa. Te nuu sandaꞌa ja ni kana ya yun ni kana uja tajan. 4Te nuu ni kana uja tajan nuu sandaꞌa yun, ja oo tuaꞌa san ja tee san tnoꞌo yun nuu siun. Su ni onini san in tnoꞌo ja kaꞌan ichi andivi, te kachi:

―Tavaꞌa maa ron tnoꞌo ja ni kaꞌan ndi uja tajan yun, te kuun ini maa ron, te ma tee ron ―kachi.

5Te ia jinokuechi nuu Dios ja ni jini san nukuiin in siꞌin ya nuu ndute mar, te inka nuu ñuꞌu yichi, ni kaneꞌe ya ndaꞌa kuaꞌa ya ichi andivi. 6Te ni kee yuꞌu ya nuu ia teku nikuii nikani, ia ni saꞌa andivi jin ñuyiu vi ndute mar vi ndiꞌi taka ja oo nui, te ni kachi ya:

―Ja ni kuyatni tiempu ja skunkuu tnoꞌo ni kaꞌan ia Dios. 7Chi nuu na jino kiuu ja kaꞌan ia kuu uja, te nuu jinkondee ya ja xndaꞌi ya trompeta ya, saa te skunkuu ia Dios ja saꞌa ya nagua yiyuꞌu, nagua ni kaꞌan ya nuu tee ka jinokuechi nuu ya ja ni ka ndakani de tnoꞌo ya ndee janaꞌa.

8Te tnoꞌo ja ni onini san ichi andivi, ni kaꞌan tuku jin san inka jichi, te kachi:

―Kuaꞌan te tnii ron liuru luluu ja nune, nee ia jinokuechi nuu Dios ja nukuiin in siꞌin nuu ndute mar, te inka nuu ñuꞌu yichi ―kachi.

9Te ni jaꞌan san nuu oo ya, te ni jikan san ja na taa ya liuru luluu yun. Te kachi ya:

―Tnii te kaa ron. Te ini yuꞌu ron, chi kuni vixin ron na kuinio nduxi, su nuu kunjino chii ron, te kuu ugua ―kachi ya.

10Yun te ni tnii san liuru luluu nee ia yun, te ni jaa san. Te vixin ni kuu ini yuꞌu san na kuinio nduxi, su nuu ni ndiꞌi ni jaa san, te ni kuu ugua nuu ni kunjino chii san. 11Te kachi ya nuu san:

―Nini kuu ja kiꞌin tuku ron, te ndakani ron tnoꞌo ia Dios naxa kokuu siki kuaꞌa ñayiu ñuu kueli vi ñuu naꞌnu vi taka saꞌan ja ka kaꞌan ñayiu vi nuu tee ka tatnuni ―kachi ya.

Currently Selected:

El Apocalipsis 10: xtnNTplus

Highlight

Copy

Compare