Salmos 80
80
Vi kakantaꞌuo ja na chituu ña ia Dios
Yaa ni tee Asaf
1Konini ni joo tnoꞌo kaꞌan san, vi Dios, maa ni ja jito jini ni ñayiu Israel,
vi ndeka nduu ni ndikin tata José na kuinio ndikachi,
maa ni ja nukoo ni tatnuni ni neꞌu nuu ka nukuiin ja ka nani querubin siki jatnu ii ni.
Xtuu nuu ni,
2te xneꞌe ni jakaꞌnu ni nuu ndikin tata Efraín vi nuu ndikin tata Benjamín,
vi nuu ndikin tata Manasés.
Neꞌe ni te skaku niꞌnu ña ni.
3Tata Dios, ndasaꞌa ña ni nagua ni ka oo san ndee ama ka.
Kundaꞌu ini ña ni jin in in san, te skaku niꞌnu ña ni.
4Jitoꞌo ja kuu ni ia Dios ndakui ndevaꞌa, ¿nasaa ka kiuu kuu ja kokiti ini ni
ja vi ma konini kuiti ni tnoꞌo ja ka ndakuatu ñayiu ñuu ni?
5Te ni saꞌa ni ja ka kusuchi ndevaꞌa ini san,
te vi tenuu san kuu ja ka jaa ka jiꞌi san.
6Te ni jandetu ni ja ka saꞌa kuasun ña ñayiu sava ka ñuu ja ka oo yatni jin san,
vi ka jaku ndee ña ñayiu ka kaꞌan uꞌu ña jin san.
7Tata Dios ja kuu ni ia ndakui ndevaꞌa, ndasaꞌa ña ni nagua ni ka oo san ndee ama ka.
Kundaꞌu ini ña ni jin in in san, te skaku niꞌnu ña ni.
8Chi ni ndeneꞌe ña ni na kuinio in tnu uva ndee ñuu Egipto,
te ni skunu ni ñayiu tu ka jini ña jin ni,
ja ni ka oo ñuu yaꞌa, te yun ni ndaxtee ña ni na kuinio in tnu uva.
9Te ni ndasavii ni ñundeꞌi nuu oo tnu,
te ni ndee yoꞌo tnu, te ni chitu nii ñuu yaꞌa.
10Te ni chisaꞌu kati tnu yuku ka oo yaꞌa,
vi ni ka chisaꞌu ndaꞌa tnu uva yun tnu itni naꞌnu.
11Te ni ka kuu nani ndaꞌa tnu ja ni kentakuei guaa ndee yuꞌu ndute mar,
te seꞌe tnu ja ni nana ndee yika tnu, ni kentakuei guaa ndee yute Éufrates.
12Te ¿nau ja ni xnani ni korra ja ndesi nuu oo tnu uva ni?
Te ndiꞌi ni ñayiu ka yaꞌa ichi yun ka jaꞌnde ti.
13Te ka skuechi kueli ña kini yuku
vi ka jaa ña kiti yuku.
14Vitna te ndajiokuiin ni, vi Dios, ja kuu ni ia ndakui ndevaꞌa,
te nuu oo ni ndee andivi, kondiaꞌa ni naxa ndoꞌo tnu uva ni.
Neꞌe ni te kokoto ni tnu.
15Chi jin ndaꞌa maa ni ni ndaxtee ni tnu,
te ni saꞌa yutnu maa ni seꞌe tnu ja ni nana ndee yika tnu.
16Te ni ka jaꞌnde ñayiu tnu uva ni vi ni ka teñuꞌu tnu.
Te xnaa ni ñayiu yun jin ja kiti ini ni.
17Su chituu ni tee ni kaji maa ni
vi seꞌe tee ni jani yutnu ni.
18Chi saa te ma vi kujioo san nuu ni.
Ndataa ni ja ka teku san, te vi kondakakuneꞌe ña san jin ni.
19Jitoꞌo ja kuu ni ia Dios ndakui ndevaꞌa, ndasaꞌa ña ni nagua ni ka oo san ndee ama ka.
Kundaꞌu ini ña ni jin in in san, te skaku niꞌnu ña ni.
Currently Selected:
Salmos 80: xtnNTplus
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
