Salmos 64
64
Vi kakaon nuu ia Dios ja na koto ña ya
Yaa ni tee David
1Konini ni joo tnoꞌo kaꞌan kuechi san nuu ni, vi Dios,
te koto ña ni jin san, chi ka skoto ioo ña ñayiu ka kaꞌan uꞌu ña jin san.
2Tayuꞌu ña ni jin san nuu ndaꞌa ñayiu kueꞌe ja ka ndatnoꞌo yuꞌi ja vi ndakoi siki san,
vi tavaꞌa ña ni nuu ndaꞌa ñayiu ka saꞌa jakueꞌe ja ka ndakoo vai siki san.
3Chi ka ndasaꞌa xein yai na kuinio yuchi kani,
te ka kaꞌin tnoꞌo xeen ndevaꞌa na kuinio yutnu ndugua.
4Te ka neni yuꞌu ñai, te ndee yun, te ka tiuu ñai jin ñayiu tu na kuechi,
te vi sanaa ni, te ka tiuu ñai, te tu ka yuꞌi.
5Te ka skaꞌan tnaꞌi ja vi saꞌi jakueꞌe,
te ka ndatnoꞌi naxa vi saꞌi ja tnoꞌo yuꞌu vi skanakaui ñayiu,
te ka kachi: ¿Na in jini nagua ka saꞌo?
6Te ñayiu ka ndakani ini ja vi saꞌi jakueꞌe, chi ka skuaꞌa guaguaꞌi nagua vi saꞌi,
te tu na in jini nagua ka ndakani ini in in ñayiu jin anui.
7Su tiuu ña ia Dios jin yutnu ndugua ya,
te vi sanaa ni, te xtuji ña ya.
8Te vi nanakau mai nuu tnoꞌo ka kaꞌin,
te ndiꞌi ñayiu vi kuaku ndee ña jin nuu vi kuni ja siun ka ndoꞌi.
9Yun te ndiꞌi ñayiu vi koyuꞌu niꞌnu ia Dios,
te vi ndakani tniuu naꞌnu saꞌa ya, te vi junkuiꞌnu ini tniuu saꞌa ya.
10Te vi kokusii ini ñayiu ndaa nuu Jitoꞌo,
te vi kokukanu ini ñai jin ya,
te vi saꞌa kaꞌnu ña ñayiu ndaa jin ya.
Currently Selected:
Salmos 64: xtnNTplus
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
