Salmos 37
37
Siin nuu kiꞌinkuei ñayiu guaꞌa te siin nuu kiꞌinkuei ñayiu kueꞌe
Yaa ni tee David
1Ma kiti ini ni ja jaꞌa ñayiu kueꞌe,
te ni ma kokuu kuasun ini ni jin ñayiu ka saꞌa jakueꞌe.
2Chi ka kui na kuinio yuku ja ñama xii,
axi na kuinio ite kuii ja ñama yichi te jiꞌi.
3Kukanu ini ni Jitoꞌo, te saꞌa ni javaꞌa,
saa te koo ni nuu ñuꞌu ja ni kee yuꞌu ia Dios, te kokaka ni nuu ichi ndaa.
4Kokusii ini ni nuu Jitoꞌo,
te taa ya nagua jikan ni jin anu ni.
5Kuñaꞌa ni nuu Jitoꞌo ja maa ya na kondeka kunduu ña nuu ichi jika ni.
Kukanu ini ni ya, te na chituu ña ya jin ni.
6Te saꞌa ya ja koyeꞌe tniuu ndaa ja saꞌa ni na kuinio ñuꞌu,
te yeꞌe tniuu guaꞌa ja saꞌa ni na kuinio nikandii nuu sagua nduu.
7Kasi yuꞌu ni, ma kaꞌan saꞌun ni nuu Jitoꞌo, te kondetu kaꞌnu ni ja na chituu ña ya.
Ma kuxii ini ni jin ñayiu ka saꞌa jakueꞌe ja kekuei guaꞌi jin ja ka saꞌi.
8Ma kukuiꞌa ini ni; xndoo ni ja kiti ini ni.
Ma kuxii ini ni, chi nani ja jaka ña ja saꞌa ni jakueꞌe kuu.
9Chi vi naa ñayiu ka saꞌa jakueꞌe,
te ñayiu ka ndetu kaꞌnu Jitoꞌo vi saꞌa jajin ñuꞌu ni kee yuꞌu ya.
10Chi joo ni ka kiuu, te ma vi koo ka ñayiu kueꞌe.
Visi na ndanduku ka ni, su ma ndaniꞌi ka ni jin.
11Su ñayiu ka saꞌa ndaꞌu ka saꞌa kee maa, chi vi niꞌi ñuꞌu vi saꞌa jajin,
te vi koo vii vi koo vaꞌi, te vi koo mani.
12Ñayiu kueꞌe, chi ndakani ini ja ndakoi siki ñayiu ndaa,
te vi suaꞌa kaꞌñi noꞌi ja kiti ini siki ñayiu yun.
13Su jaku ndee ni ña Jitoꞌo jin ñayiu kueꞌe yun,
chi jini ya ja makuyatni kiuu ja vi tnaꞌi tnundoꞌo nuu sandaa ya kuechi.
14Ñayiu kueꞌe, chi taui yuchi kani nuu ñii ñuꞌu,
vi tnai yutnu ndugua nuu kuji,
nagua ja skuntai ñayiu ka kundaꞌu vi ñayiu ka saꞌa ndaꞌu ka saꞌa kee maa,
vi ja kaꞌni ñayiu ka saꞌa ndaa.
15Su vi maa anu mai ndiuu yuchi kani,
te kuechi kueli kuji.
16Te guaꞌa ka kuu jin joo ni ja nevaꞌa ñayiu ndaa,
saa jakuika ja ka nevaꞌa kuaꞌa ñayiu kueꞌe.
17Chi kindee ya jandakui ñayiu kueꞌe,
su kotnii guaꞌa ña maa Jitoꞌo jin ñayiu ndaa.
18Chi jito ña maa Jitoꞌo jin ñayiu ka saꞌa ndaa in kiuu in kiuu ja ka tekui,
te nikuii nikani oo ja vi saꞌa jajin.
19Te ma vi kendoo kanoi kiuu nuu kenta jakueꞌe,
chi vi konevaꞌi ja vi kokai nuu koo tnundoꞌo soko.
20Su ñayiu kueꞌe, chi vi nai, na kuinio ita oo nuu yuku,
te ñayiu ka nee uꞌu tnaꞌa jin Jitoꞌo, vi ndutei na kuinio ñuaꞌa.
21Ñayiu kueꞌe, chi ka kinui, su tu ka ndatniuyaꞌui,
su ñayiu ndaa, chi inu ndaꞌu ini, te ka jiñaꞌi.
22Chi ñayiu ni saꞌa vii ni saꞌa vaꞌa ia Dios, ni ka niꞌi ñuꞌu ja vi saꞌa jajin,
su ñayiu ni xtau tniaꞌa ya, chi vi nai.
23Chi maa Jitoꞌo ndeka nduu ña jin ñayiu,
te jani ña ya nuu ichi junkuaan ini maa ya.
24Te nuu ja ka kachi jaꞌa ñayiu yun, te ma vi ndonsoi,
chi tnii guaꞌa maa Jitoꞌo ndaꞌi.
25Chi ni oo lule san, te vitna makunijaꞌnu san,
su tu na in kiuu, te kuni san in ñayiu ndaa ja xndendoo ndaꞌu ña ia Dios,
te ni ndikin tatai ja vi kokakain ja vi kai.
26Te ndiꞌi ni kiuu ka kundaꞌu ini sava ka ñayiu, te ka jiñaꞌa nui nuu ñayiu yun,
te seꞌi ka kuu in javii javaꞌa.
27Vi kujioo ni nuu jakueꞌe, te vi saꞌa ni javaꞌa,
te vi niꞌi ni in nuu vi koo ni nikuii nikani.
28Chi kutoo Jitoꞌo ja saꞌa ndaa ya,
te ma xndendoo ya ñayiu maa ya,
chi tavaꞌa ña ya nikuii nikani,
su ndikin tata ñayiu kueꞌe, chi xnaa ya.
29Ñayiu ndaa, chi vi saꞌa jajin ñuꞌu,
te nikuii nikani vi koi nuu ñuꞌu yun.
30Ñayiu ndaa, chi ka kaꞌin tnoꞌo ndichi,
vi ka kaꞌin tnoꞌo ndaa.
31Te tnoꞌo ja tatnuni maa ia Dios oo ini anui,
te ma vi kekai ja vi kujioi nuu tnoꞌo ya.
32Ka ndiaꞌa yuꞌu ña ñayiu kueꞌe jin ñayiu ndaa,
chi ka nduku ndei ja vi kaꞌni ñai.
33Su ma kuandetu Jitoꞌo ja junkuei ñayiu ndaa nuu ndaꞌa ñayiu kueꞌe,
te ni ma kuandetu ya ja vi xtavi kuechi ña tee ka jaꞌnde kuechi.
34Vi kondetu kaꞌnu ni Jitoꞌo, te vi kaka ni nuu ichi ya,
te saꞌa kaꞌnu ña maa ya jin ni, nagua ja vi saꞌa jajin ni ñuꞌu ni kee yuꞌu ya,
te vi kuni ni jin nuu ni, nuu vi naa ñayiu kueꞌe yun.
35Chi ni jini san in tee kueꞌe ja ni saꞌa teyii ndevaꞌa de,
te saꞌa kaꞌnu de maa de na kuinio in yutnu ndoko.
36Su kuaꞌan de, te tu ka de oo.
Ni ndanduku san de, su tu ni nukuꞌun ka san de.
37Vi kondiaꞌa ni tee tu saꞌa jakueꞌe ja kuu de tee ndaa,
chi kiuu sandiꞌi, te oo in nuu sii ini kiꞌin de ja koo mani de.
38Su tee ka saꞌa jakueꞌe, chi vi naa ndiꞌi de,
te nuu kiꞌinkuei ñayiu kueꞌe yun kuu nuu vi nai.
39Su maa Jitoꞌo skaku niꞌnu ñayiu ndaa,
te jiñaꞌa ya jandakui nuu ka tnaꞌi tnoꞌo suchi ini.
40Maa Jitoꞌo chituu ña vi skaku niꞌnu ña.
Te ndatau ña ya nuu ndaꞌa ñayiu ka saꞌa jakueꞌe,
chi ni ka kukanu ini ñai jin ya.
Currently Selected:
Salmos 37: xtnNTplus
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
