Salmos 35
35
Vi kakantaꞌuo nuu ia Dios ja na skaku niꞌnu ña ya
Yaa ni tee David
1Ndakoo maa ni siki ñayiu ka ndakoo siki san, vi Jitoꞌo,
te kaxin tnaꞌa maa ni jin ñayiu ka kuini ja vi kaxin tnaꞌa jin san.
2Kakuiko ni kaa tikute ni,
te neꞌe ni, chituu ña ni jin san.
3Keneꞌe ni lanza ni, te kasi ni nuu vajikuei ñayiu ka sondikin ña jin san.
Te kuini san konini san kaꞌan ni:
“Maa rin kuu ia skaku niꞌnu ña jin ron”.
4Te na vi kunu nuu ini,
vi na vi kendoo kanoo maa ñayiu ka nduku ja vi kaꞌni ña jin san.
Te na vi ndakaka yata maa ñayiu
ka kuini ja vi saꞌa ña jakueꞌe jin san ja ka ndukanoi.
5Te na vi kokui na kuinio miꞌi ja xtechi ña tachi,
ja ni ka sondikin ña ia ka jinokuechi nuu Jitoꞌo.
6Te ichi nuu vi kunu yuꞌi na kokuu ichi nee vi ichi ndiꞌvi,
te na vi sondikin ña ia ka jinokuechi nuu Jitoꞌo jin.
7Chi vini masu nagua saꞌa san, te ni ka ndukui naxa vi skanakau ñai,
vi ni ka jatei in yau nagua ja yun na kanakau san.
8Te vini ma vi kuni, te tetniuu ni jakueꞌe siki,
te na vi nanakau mai nuu jakueꞌe ka saꞌi yun,
te na vi nanakau mai nuu yau ni ka jatei.
9Yun te kokusii ini anu san nuu ni, vi Jitoꞌo,
te kokusii ini san ja skaku niꞌnu ña ni.
10Te ndiꞌi san jin anu san kachi san:
“Tu na inka ia saa maa ni, vi Jitoꞌo san,
chi skaku niꞌnu ni ñayiu ka tnaꞌa tnundoꞌo nuu ndaꞌa ñayiu inu ndakui,
te skaku niꞌnu ni ñayiu ka kundaꞌu vi ka jaꞌni ña jin, nuu ndaꞌa ñayiu ka suꞌu ña jin”.
11Te ka ndakoo testiu kueꞌe ndevaꞌa,
te ka jikan tnoꞌo ña tnoꞌo ja tu jini san ja vi skanakau ña.
12Te ka ndasaꞌa ña de jakueꞌe jin san nuu tniuu ja guaꞌa saꞌa san,
te yun kuu ja ndendeꞌe kusuchi ini san.
13Su ndia sein, chi nuu ni ka okuꞌu maa de,
te ni okusuchi ini san, ni okekuiꞌnu san saꞌun ndayi,
vi ni ondite san, te vi ni ini ni anu san ni ondakuatu san ja jaꞌa de.
14Ni okusuchi ini san ja jaꞌa de,
na kuinio in ñani maa san axi na kuinio in tee ndeka tnaꞌa guaꞌa jin san,
te ni osaꞌa ndaꞌu ni osaꞌa kee san ja tnaꞌu ini san, na kuinio ja ni jiꞌi nana san.
15Su nuu ni tnaꞌa san tnundoꞌo, te ni ka kusii ini de,
ni ka kututu tee tneꞌe ndevaꞌa ja tu jini san na in ka kuu,
te ni ka ndakoo de siki san, te ndevaꞌa ndetnuni ni ka saꞌa ña de jin san.
16Te ka skexiko ña de vi ka saꞌa kuasun ña de,
te vi ka kaꞌñi noꞌo de ja ka kiti ini ndevaꞌa de nuu san.
17Jitoꞌo san, ¿nasaa ka tiempu kondiaꞌa ni ja siun kondoꞌo san?
Skaku niꞌnu ña ni nuu jakueꞌe ka saꞌa ña de.
Skaku niꞌnu ña ni nuu ndaꞌa tee ka kuu na kuinio ndikaꞌa yun.
18Te ndakuantaꞌu san nuu ni, nuu ka ndututu kuaꞌa ñayiu ka chiñuꞌu ña jin ni,
vi saꞌa kaꞌnu ña san nuu ka oo kuakuaꞌa ñayiu ñuu ni.
19Te ma kuandetu ni ja kendoo kueꞌe san, te vi kokusii ini tee ka kaꞌan uꞌu ña jin san.
Te ni ma vi kondakuene tee ka skexiko ña jin san nuu san,
chi masu nagua saꞌa san.
20Chi tu ka kaꞌan de tnoꞌo mani,
chi suaꞌa ka ndakani ini de ja vi xndaꞌu ña de
jin ñayiu ka oo mani ñuu yaꞌa.
21Te ka june koꞌo de yuꞌu de ka xtavi kuechi ña de,
te ka kachi de: “Ni ka jini san de ja siun saꞌa de”.
22Su maa ni, chi jini ni, vi Jitoꞌo san,
te ma kasi yuꞌu ni, te ni ma kuu jika ni nuu oo san.
23Ndakoo ni, vi Dios, te saꞌa ndaa ni ja jaꞌa san,
kuiin niꞌnu kuiin sagua ni ja jaꞌa san, vi Jitoꞌo san.
24Ndanduku niꞌnu ni ja jaꞌa san, vi Dios, chi ia saꞌa ndaa kuu ni,
te ma kuandetu ni ja vi kokuaku ndee ka ña de jin san.
25Te ma vi ndakani ini de jin anu de: “Vi ni kee nagua ni ka kuinio”.
Te ni ma vi kachi de: “Vi ni ka koko nio de”.
26Na vi kendoo kanoo maa de,
vi na vi kunu nuu ini maa tee ka kusii ini jin tnundoꞌo tnaꞌa san,
te saꞌa ni ja na vi kuu kanoo vi na vi kunu nuu ini maa tee ka saꞌa kaꞌnu ka maa siki sein, vi Dios.
27Su maa ni ja ka chituu ña ni jin san ja kundee san, vi kata ni, te vi kokusii ini ni.
Te siun ni vi kokuñaꞌa ni: “Kaꞌnu kuu Jitoꞌo,
te junkuaan ini ya ja vi koo vii vi koo vaꞌa ñayiu ka jinokuechi nuu ya”.
28Te jin yuꞌu maa san kokaꞌan san ja saꞌa ndaa ni,
te ndiꞌi ni kiuu kosaꞌa kaꞌnu ña san, vi Dios.
Currently Selected:
Salmos 35: xtnNTplus
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
