Proverbios 6
6
Tnoꞌo ja xteku ña naxa saꞌo nuu kaꞌan niꞌnuo ja jaꞌa inka ñayiu
1Seꞌe maa rin, nuu ja ni kaꞌan niꞌnu ron ja jaꞌa tnaꞌa ron ja kinuu de xuꞌun,
axi ni kee yuꞌu ron ja kuiso siki ron ja jaꞌa in ñayiu tu jini ron,
2te masu vatuka ni saꞌa ron,
chi ni tnaa ron xeyu sukun ron jin tnoꞌo ni kaꞌan ron.
Nuu saa, te ja ni kanakau ron nuu tnoꞌo ni kaꞌan ron.
3Su suaꞌa saꞌa ron vitna, vi seꞌe, te skaku niꞌnu ron maa ron,
chi ni kanakau ron nuu ndaꞌa tnaꞌa ron:
Kuaꞌan te kaꞌan ndaꞌu kaꞌan kee ron jin de, ja ma kotavi ka ron.
4Ma kusun ini ron,
te ni ma ndatatu nuu ron, guaa ndee kundaa ini ron.
5Skaku niꞌnu maa ron na kuinio isu nuu ndaꞌa tee ka jaꞌni ti,
axi na kuinio tisala nuu ka kuini ja vi kakuiko ti.
Xteku ña jin ñayiu kuꞌndu
6Kuaꞌan te kondiaꞌa ron chioko, vi tee kuꞌndu.
Kondiaꞌa naxa ka saꞌa ti, te kuu ndichi ron.
7Chi kiti yun, visi tu na tatnuni nuu ti,
ni tu na jito ña jin ti, te ni tu na jitoꞌo ti,
8su ni saa, te ka tavaꞌa ti ja vi kokaa ti nuu ndukuii yutnu,
vi ka ndaxtutu ti ja vi kokaa ti tiempu kei.
9¿Nasaa ka ore guaa kotuu ron, vi tee kuꞌndu?
¿Na ore saa ndakoo ron ja kixin ron?
10Su nuu ja ndakani ini ron ja joo ni ka kokusun ron
vi joo ni ka kokusun ndei ron,
vi joo ni ka ndakanu ndee ndaꞌa ron ja ndatatu ron.
11Su yun, te sanaa ni kenta ja kundaꞌu ron na kuinio in kuiꞌna,
te ja jaꞌni ña jin ron na kuinio in tee nee xeen.
Naxa vi ndoꞌo ñayiu kueꞌe
12In tee kueꞌe vi in tee saꞌa janeꞌe jayichi
kuu tee kuaꞌan ndakani tnoꞌo tnoꞌo.
13Te saꞌa de seña jin nduchi nuu de, vi jin siꞌin de,
vi xnendaꞌa de.
14Te jin jakueꞌe oo anu de, ndiꞌi ni jichi ndakani kueꞌe ini de,
vi nduku de ja kiti ini.
15Te yun guaa sanaa ni kii tnundoꞌo tnaꞌa de,
te vi sanaa ni te naa de, te tu na tatna.
Ja skexiko Jitoꞌo
16Oo iñu ja skexiko Jitoꞌo
vi ndee ja kuu uja skexiko ya:
17Nduchi nuu ja saꞌa teyii maa,
vi yaa ja kaꞌan tnoꞌo tnoꞌo,
vi ndaꞌa ja jati niñi ñayiu tu na kuechi,
18vi anu ja ndakani kueꞌe ini,
vi siꞌin ja jino jiꞌi ja saꞌa jakueꞌe,
19vi testiu kueꞌe ja kaꞌan tnoꞌo tnoꞌo,
vi ñayiu nduku ja kiti ini neꞌu tnaꞌa kuikion.
Ma chitnaꞌa ni jin inka ñasiꞌi
20Tavaꞌa tnoꞌo ja tatnuni tata ron nuu ron, vi seꞌe,
te ma xndendoo ron tnoꞌo ja kaxtnoꞌo nana ron nuu ron.
21Tnaa vaꞌa ndee ini ndee anu ron,
te tnaa na kuꞌun sukun ron.
22Te na kondeka ña jin ron nuu ichi jika ron,
te na koto na kuni ña jin ron nuu kixin ron,
te nuu ndoto ron, te kondatnoꞌo jin ron.
23Chi tnoꞌo ja tatnuni kuu na kuinio lámpara,
te tnoꞌo ja kaxtnoꞌo kuu ñuꞌu ja yeꞌe niꞌnu nuu ron,
te tnoꞌo xeen ja ka xteku ña jin ron kuu ichi ja koteku ron,
24nagua ja tavaꞌa ña jin ron ja ma kanakau ron nuu ndaꞌa ñasiꞌi kueꞌe,
vi nuu tnoꞌo luu ndevaꞌa ja kaꞌan ñaꞌa skindee yii ña.
25Te ma kojioꞌo ron jin ndee anu ron ja luu kaa ña,
ni ma kuandetu ron ja kee nuu ña ña jin ron.
26Chi ja jaꞌa ñaꞌa xiko maa yun, te skiꞌin in teyii in sava xtaa jaa de,
te ñaꞌa skindee yii kuaꞌan ña nduku ña anu in tee ndee yaꞌu ndevaꞌa nuu ia Dios.
27Chi ¿a kuu kanundee in teyii ñuꞌu tikayi ndika de,
te ma kai saꞌun de?
28¿Te a kuu kaka in tee siki ñuꞌu tikayi,
te ni ma kai siꞌin de?
29Te suni saa ni kuu jin tee chitnaꞌa jin ñasiꞌi tnaꞌa kuikin de,
chi nani kuu tee nitnaꞌa jin ña, te ma yaꞌa suaꞌa ni,
chi tniuyaꞌu de yika kuechi de.
30Te tu na in skexiko ña jin kuiꞌna nuu suꞌi
ja niꞌi ja kuꞌun chii nuu kokin.
31Su nuu ja na vi niꞌi ña jin nuu suꞌi yun,
te kuini ja ndatniuyaꞌui uja jichi nagua ni suꞌi,
visi na ndatniuyaꞌu ndiꞌi nagua nevaꞌi nuu veꞌi.
32Te nase ndeꞌe tu jini tee skindee ñasiꞌi yun nagua saꞌa de,
chi na in saꞌa siun, te xnai mai.
33Chi maa ni ja niꞌi tee yun kuu ja vi kani ña jin de,
te vi kaneꞌe ña, te ma naa saꞌun jakanoo de yun.
34Chi tnoꞌo kuiñu yun saꞌa ja kiti ndevaꞌa ini yii ña
te ma kuakaꞌnu ini de kiuu ja kani ña de.
35Te ma kuantaꞌu de nagua vi kuñaꞌa nuu de jin jakueꞌe ja ni ka saꞌa ña jin de,
te ni ma ndusii ini de, visi kuakuaꞌa ja vi skutaꞌu ña jin de.
Currently Selected:
Proverbios 6: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
