Proverbios 5
5
Vi koto ni maa ni nuu inka ñasiꞌi
1Tanuu tnoꞌo ndichi ja kaꞌan rin nuu ron, vi seꞌe,
te konini tnoꞌo ja jinkuiꞌnu ini rin,
2nagua ja kuni ron tavaꞌa ron tnoꞌo yun,
te tavaꞌa ron tnoꞌo ndichi.
3Chi yuꞌu ñaꞌa skindee yii ña kee tnoꞌo luu ndevaꞌa na kuinio nduxi ñuñu,
te vita ndevaꞌa ka yaa ña saa texeꞌen.
4Su nuu xndiꞌi ron ja koo ron jin ña, te nduu ugua, na kuinio yuku ugua,
te xeen na kuinio yuchi kani ja xeen nduu jioo nuu.
5Te kuaꞌan maa ña jin siꞌin ña ichi nuu kuu ña,
te ja jika ña kuaꞌan ndaa ña nuu yau ñaña.
6Te tu ndiꞌni ña ja kaka ña ichi jiñaꞌa ja teku ña,
te yakua ichi chindaa ja jika ña, te tu jini ña ndenu kiꞌin ña.
7Te vitna te konini tnoꞌo kaꞌan rin, vi seꞌe,
te ma kujioo ron nuu tnoꞌo kaxtnoꞌo rin nuu ron.
8Te kujioo nuu ichi jika ñaꞌa yun,
te ni ma kuyatni ron yeꞌe veꞌe oo ña,
9nagua ja ma kuñaꞌa ron jandakui ron nuu inka ñasiꞌi,
ni kuia ja teku ron nuu ñaꞌa saꞌa ja tnaꞌa ron tnundoꞌo.
10Chi kana saa ndenuu ini inka ñayiu jin jandakui ron,
te ja ni niꞌi ron ja satniuu ron kuꞌun veꞌe inka ñayiu.
11Te sandiꞌi te kondaꞌi ron ja kondatnaꞌu ini ron
nuu ndi joo ndi joo kuaꞌan yiki kuñu ron mayichi.
12Te kachi ron: “¿Naxa ni kuu ja ni skexiko tnoꞌo ja ni ka kaxtnoꞌo nuo?
Te ni skexiko anuo tnoꞌo ja ni ka xteku ña jion.
13Te tu ni oninio tnoꞌo ni ka kaꞌan tee ni ka kaxtnoꞌo nuo,
te ni tu ni tanuo tnoꞌo ni ka kaꞌan tee ni ka xteku ña jion.
14Te vi ja oo ja skunaa ndiꞌo
maꞌñu ñayiu ñuo vi nuu ka ndututuo”, kachi ron.
15Su vitna, vi seꞌe, te koꞌo ndute ñuꞌu nuu poso maa ron ja kuu ñasiꞌi maa ron,
vi ndute ja kee nuu poso ron.
16Te ma kati ron nuu ndute kee ja nevaꞌa ron nuu ichi,
te ni ma kaka ndute yute nevaꞌa ron nuu yaꞌu.
17Te na kokuu kuenta maintnoꞌo ni maa ron,
te ma kokuñaꞌa ron nuu inka ñayiu.
18Na taꞌu na ndetu nuu ndute ron,
te kokuu sii ini jin ñasiꞌi ni jaka tnaꞌa jin ron ndee nuu kuechi ron.
19Chi kuu ña na kuinio in jitna ja kutoo ndevaꞌa ron,
axi na kuinio ndiñini ja luu ndevaꞌa kaa ti.
Te ndiꞌi ni jichi kondutoo ña ña jin ron,
te ja kutoo ña ña siun ni kokuu sii ini jin ron.
20¿Te nau ja koxnaꞌa tnaꞌa ron jin ñaꞌa skindee yii, vi seꞌe?
¿Te nau ja kokuinee ron sukun ndaꞌa inka ñasiꞌi ja tu jini ron?
21Chi ndiaꞌa maa Jitoꞌo ichi ka jika teyii,
te yinuu guaꞌa ya ndiꞌi ichi ka jika de.
22Te tee kueꞌe, chi ndakakuiko ña jakueꞌe saꞌa de yun,
te ndakasi ña yika kuechi saꞌa de ja kuu na kuinio in yoꞌo.
23Te kuu de, chi tu ni onini de nuu ni ka ndakanu ichi ndaa ña jin de,
te junaa de jin kuaꞌa tniuu vasa saꞌa de.
Currently Selected:
Proverbios 5: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
