Proverbios 11
11
1Skexiko Jitoꞌo nuu tu ka chikuaꞌa ndaa ñayiu ka xiko,
su junkuaan ini ya nuu ka chikuaꞌa ndaa ñayiu.
2Nuu vaji tnoꞌo teyii, te suni yun vaji tnoꞌo kanoo.
Su oo tnoꞌo ndichi jin ñayiu ka saꞌa ndaꞌu mai.
3Tniuu ndaa ja ka saꞌa ñayiu ndaa kuu ja ndeka ndaa kuiti ña jin.
Su yika kuechi ja ka saꞌa ñayiu kueꞌe yun xnaa ña jin.
4Tu nagua jiniuꞌu ja kokuo ñayiu kuika kiuu ja sandaa ia Dios kuechi.
Su tniuu ndaa ja ka saꞌo skaku niꞌnu ña ja ma vi kuo.
5Tniuu ndaa ja ka saꞌa ñayiu ndaa kuu ja ndakanu ichi ndaa ña.
Su ñayiu kueꞌe, chi junkuei nuu jakueꞌe ka saꞌa mai yun.
6Tniuu ndaa ja ka saꞌa ñayiu ndaa yun kuu ja skaku niꞌnu ña jin.
Su ñayiu ka saꞌa yika kuechi, chi ka ndesi mai jin ja ka ndioo ini.
7Te nuu jiꞌi ñayiu kueꞌe yun, te naa ja ndetu kaꞌnui,
vi naa ja ni ondioo ini ja kentai konevaꞌi.
8Su ñayiu ndaa, chi skaku niꞌnu ña ia Dios nuu tnundoꞌo tnaꞌi,
te ñayiu kueꞌe yun, ndatnaꞌa tnundoꞌo nuu tniui.
9Te tnoꞌo kaꞌan ñayiu kueꞌe yun, saꞌa ja skunaa ña jin tnaꞌa kuikin.
Su ñayiu ndaa, chi kaku niꞌnui jin tnoꞌo ndichi ja jini.
10Nuu kee vii kee vaꞌa ñayiu ndaa, te ka kusii ini ñayiu ñuu.
Su nuu ka jiꞌi ñayiu kueꞌe, te ka kanai ja ka kusii ndevaꞌa ini.
11Jin javii javaꞌa ja ka niꞌi ñayiu ndaa yun saꞌa ja kuu kaꞌnu ñui.
Su jin tnoꞌo ka kaꞌan ñayiu kueꞌe xnaa ñuu yun.
12Ñayiu ja tu jinkuiꞌnu ini, chi skexikoi tnaꞌa kuikin.
Su ñayiu jinkuiꞌnu ini, chi jasi yuꞌi.
13Ñayiu jika jin kuentu, chi ndiꞌi ni tnoꞌo ndakani.
Su ñayiu kukanu inio, chi ndiꞌi ni tnoꞌo tavaꞌi nuu anui.
14Nuu ja tu na in tee xteku guaꞌa in ñuu, te skunaa.
Su nuu ka oo kuaꞌa tee ka xteku ña, te kee guaꞌa ñuu yun.
15Ñayiu kaꞌan niꞌnu jaꞌa ñayiu inka ñuu ja kinui xuꞌun, chi tnaꞌi tnundoꞌo.
Su ñayiu tu kuini ja kaꞌan niꞌnu jaꞌa inka ñayiu, te osii ini.
16Ñasiꞌi guaꞌa, chi niꞌi ña jayiñuꞌu.
Su tee inu xeen, chi maa ni jakuika ka niꞌi de.
17Te tee kundaꞌu ini inka ñayiu, te suni saꞌa de javaꞌa maa de.
Su tee saꞌa jakueꞌe inka ñayiu, chi suni ndasaꞌa kueꞌe de maa de.
18Ñayiu kueꞌe niꞌi in yaꞌu ja xndaꞌu ña jin.
Su ñayiu saꞌa ndaa, chi niꞌi yaꞌu ndaa ndijai.
19Na ñayiu saꞌa ndaa, te niꞌi ja kotekui.
Su ñayiu ndikin jakueꞌe, te kuaꞌin ja kui.
20Skexiko Jitoꞌo ñayiu anu kueꞌe,
su junkuaan ini ya ñayiu ka jika ndaa.
21Jandaa ndija ja vi tniuyaꞌu ñayiu kueꞌe yun ja ka saꞌi.
Su vi kaku niꞌnu tatatnoꞌo ñayiu ndaa.
22Na kuinio xeꞌe kuu oro ja yiꞌi kutu kuchi,
saa kuu ñasiꞌi vii ndevaꞌa ja tu kukanoo ña nagua saꞌa ña.
23Ja ka ndioo ini ñayiu ndaa kuu maa ni ja kee guaꞌa.
Su ja ka ndetu ñayiu kueꞌe kuu ja kiti ini.
24Ka oo sava ñayiu guaꞌa ja ka jiñaꞌa kuaꞌi,
te viꞌi ka ka ndaniꞌi saa nagua ka jiñaꞌi.
Su sava ñayiu, chi saa suaꞌa ka tavaꞌi ja vi kuñaꞌi,
saa te ka nduu ndaꞌu kai.
25Na ñayiu vaꞌa ini, te jinkoo vaꞌa kai,
te na ñayiu jiñaꞌa, te suni ndaniꞌi kai.
26Na in saꞌa jajin triu, te ka xtau tniaꞌa ña ñayiu jin.
Su na in xiko, te ka kaꞌan vii ka kaꞌan vaꞌa ñayiu jin.
27Na in vi ni ini ni anui ndukui javaꞌa, te niꞌi jayiñuꞌu.
Su na in nduku jakueꞌe, te jakueꞌe yun kii siki.
28Na in kukanu ini ja kuika nevaꞌi, te nai na kuinio ndaꞌa yuku yichi.
Su ñayiu ndaa, chi vi nduu jai na kuinio ndaꞌa yutnu.
29Na in saꞌa ja oo tnundoꞌo nuu ñayiu veꞌi, te tu saꞌun ka nagua kendoo.
Te ñayiu vasa, chi kokunukuechi nuu ñayiu ndichi.
30Te tniuu ja saꞌa ñayiu ndaa kuu na kuinio in yutnu ja jiñaꞌa ja teku ñayiu.
Te ñayiu ndichi kuu ñayiu ndatau sava ka ñayiu nuu jakueꞌe.
31Chi ja ndaa ja ka niꞌi yaꞌu ñayiu ndaa nuu ñuyiu yaꞌa,
te viꞌi ka kokuu jin ñayiu kueꞌe vi ñayiu ka saꞌa yika kuechi.
Currently Selected:
Proverbios 11: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
