1 Timoteo 2

Kaxtnoꞌo Pablo naxa vi ndakuatu ñayiu

1Te xteku ña san in tniuu kanuu ka ja vi kakan taꞌu ni nuu ia Dios, te vi ndakuatu ni nuu ya, suni vi kaꞌan ndaꞌu ni jin ya, te vi ndakuantaꞌu ni nuu ya ja jaꞌa ndiꞌi ñayiu. 2Te vi kakan taꞌu ni ja jaꞌa tee ka tatnuni nuu ñuu vi ja jaꞌa ndiꞌi tee ka netniuu, nagua ja na vi kosii inio, te na vi koo jin tnoꞌo mani, nagua ja vi chiñuꞌu guaꞌo ia Dios, te na vi kosaꞌa vii vi kosaꞌa vaꞌo. 3Chi yaꞌa kuu javaꞌa ja junkuaan ini Dios, ia skaku niꞌnu ña jion. 4Chi kuini maa ya ja vi kaku niꞌnu ndiꞌi ñayiu, te kiukuei ja vi kuni tnoꞌo ndaa. 5Chi invaa ni maa ya kuu Dios, te suni invaa ni ia inee in sagua maꞌñu Dios jin ñayiu, te suu ya kuu Jesukristu ja suni kuu ya teyii. 6Te suu ya kuu ia ni soko maa ja ni tniuyaꞌu ya ja jaꞌa ndiꞌi ñayiu ja ni skaku niꞌnu ña ya, te yun ni xneꞌe ya maa ya ja ni ka jini ñayiu tniuu ni saꞌa ya kiuu ni jani maa ia Dios. 7Te yun guaa ni kaji ña ia Dios ja xtutenuu san tnoꞌo ya nuu ñayiu, chi ni chitniuu ña maa Jesukristu, te kaxtnoꞌo san nuu ñayiu ja masu judio ka kui ja na vi kandija ndai. Te kaꞌan ndaa san, tu xndaꞌu san jin.

8Te ja kuini san ja vi saꞌa ñayiu yii kuu ja ndeni nuu ni kuu ja ka ndakuatu de nuu ia Dios, te na vi kaneꞌe de ndaꞌa de jin anu vii in anu vaꞌa de. Te ma vi kokiti ini de, ni ma vi kotee tnaꞌa de. 9Te saa ni ñayiu siꞌi, na vi kuiꞌnu vii vi kuiꞌnu vaꞌa ña jin in saꞌun kisaꞌu guaꞌa ña ja ma koo tnoꞌo kanoo. Te ma vi kuiꞌnu vixin ña ni ma vi ndioo ini ña ja vi kuiꞌnu ña saꞌun yaꞌu ndevaꞌa. Te ma vi ndaskutu vii ndevaꞌa ña xini ña ni ma vi chindee ña kaa vii ndevaꞌa ja kuu oro xini ña, ni ma vi kundeku ña yuu vii ndevaꞌa ja kuu perla. 10Su na vi saꞌa ña in tniuu guaꞌa, nagua ka saꞌa ñasiꞌi ja ka chiñuꞌu ia Dios. 11Te ñayiu siꞌi na vi kutuaꞌa ña vi kasi yuꞌu ña nuu ka skuaꞌa ña, te na vi kuanyuꞌu vi kuandetu ña nuu tee kaxtnoꞌo. 12Chi ma kuandetu san ja in ñasiꞌi, te kokaxtnoꞌo ña, ni ma kotatnuni ña nuu teyii, chi na kasi yuꞌu ña, te na konini ña. 13Chi xtnañuꞌu ka ni saꞌa Dios Adán, te nuu kuee ka ni saꞌa ya Eva. 14Te masu Adán ni xndaꞌu ña koo, chi ñasiꞌi yun kuu ñaꞌa ni xndaꞌu ña ti, te ni kana kau ña nuu yika kuechi. 15Su ñasiꞌi ja ka oo yii ña, na vi skaku vii vi skaku vaꞌa ña seꞌe ña, te kuu vi kaku ña, nuu ja ka kandija ndaa ña, te vi kondaꞌu ini ña jin tnaꞌa ña, te vi koo vii anu ña, te ma vi kokuu vixin ña.

Currently Selected:

1 Timoteo 2: xtnNTplus

Highlight

Copy

Compare